Riyadh airport attack: రియాద్‌ ఎయిర్‌పోర్టుపై దాడి.. 12 మంది మృతి, 309 మందికి గాయాలు!
ఈ వార్తాకథనం ఏంటి
సౌదీ అరేబియా రాజధాని రియాద్‌లోని కింగ్ ఖాలిద్ అంతర్జాతీయ విమానాశ్రయాన్ని లక్ష్యంగా చేసుకుని జరిగినట్లు అనుమానిస్తున్న దాడిలో 12 మంది మరణించగా, మరో 309 మంది గాయపడ్డారు. సౌదీ అధికారులు ఆదివారం ఈ వివరాలను వెల్లడించారు. యెమెన్‌లోని హౌతీ తిరుగుబాటుదారులు, సౌదీ అరేబియా మధ్య పరస్పర దాడులు తీవ్రతరం కావడంతో ఈ పరిణామం చోటుచేసుకుంది. 2022లో ఐక్యరాజ్యసమితి మధ్యవర్తిత్వంతో కుదిరిన కాల్పుల విరమణ ఒప్పందం తర్వాత పెద్ద ఎత్తున ఘర్షణలు తగ్గినప్పటికీ, తాజాగా మళ్లీ పరిస్థితులు ఉద్రిక్తంగా మారాయి.
వివరాలు
విమానాశ్రమయే లక్ష్యంగా దాడులు
శనివారం మధ్యాహ్నం రియాద్‌లోని కింగ్ ఖాలిద్ అంతర్జాతీయ విమానాశ్రయాన్ని లక్ష్యంగా చేసుకుని దాడి జరిగినట్లు సమాచారం.
ఈ ఘటనలో మరణించిన 12 మందిలో నలుగురు సౌదీ పౌరులు కాగా, మరో ఎనిమిది మంది విదేశీయులు ఉన్నారని సౌదీ జనరల్ అథారిటీ ఆఫ్ సివిల్ ఏవియేషన్ వెల్లడించింది.
మరణించిన విదేశీయుల్లో ఇద్దరు బంగ్లాదేశ్‌ పౌరులు ఉన్నారు. అమెరికా, ఈజిప్ట్‌, జోర్డాన్‌, సిరియా, పాలస్తీనా, సూడాన్‌ దేశాలకు చెందిన ఒక్కొక్కరు మరణించినట్లు జిన్హువా వార్తా సంస్థ తెలిపింది.
ఈ దాడిలో గాయపడిన వారికి పలు ఆసుపత్రుల్లో చికిత్స అందిస్తున్నారు. కొందరి పరిస్థితి విషమంగా ఉన్నట్లు సౌదీ పౌర విమానయాన సంస్థ పేర్కొంది.
వివరాలు
విమానాశ్రయంలో కార్యకలాపాలు తాత్కాలికంగా నిలిపివేత
దాడి నేపథ్యంలో విమానాశ్రయంలో కార్యకలాపాలను తాత్కాలికంగా నిలిపివేసినట్లు సౌదీ అధికారులు అంతకుముందు ప్రకటించారు.
విమానాశ్రయానికి జరిగిన నష్టాన్ని అంచనా వేయడంతో పాటు భద్రతా తనిఖీలు పూర్తయ్యే వరకు ఈ నిర్ణయం తీసుకున్నట్లు తెలిపారు.
మరోవైపు ఈ ఘటన అనంతరం సౌదీ అరేబియాతో పరస్పర చర్యలకు తాము సిద్ధంగా ఉన్నామని హౌతీ సంస్థ ప్రకటించింది.
విమానాశ్రయాలు, సముద్ర ఓడరేవులు, మానవతా అవసరాలకు ఉపయోగపడే ఇతర మౌలిక సదుపాయాలను పెరుగుతున్న సైనిక ఘర్షణల నుంచి దూరంగా ఉంచాలని పేర్కొంది.
వివరాలు
యెమెన్‌లో సౌదీ వైమానిక, క్షిపణి దాడులు
రియాద్‌ విమానాశ్రయంపై దాడి జరిగిన రోజే యెమెన్‌లో హౌతీల ఆధీనంలో ఉన్న ప్రాంతాలపై సౌదీ అరేబియా మరో విడత వైమానిక, క్షిపణి దాడులు చేపట్టినట్లు హౌతీల ఆధ్వర్యంలోని అల్‌ మసీరా టీవీ వెల్లడించింది.
హౌతీల నియంత్రణలో ఉన్న యెమెన్‌ రాజధాని సనాలోని అంతర్జాతీయ విమానాశ్రయాన్ని లక్ష్యంగా చేసుకున్నట్లు తెలిపింది. వ్యూహాత్మకంగా కీలకమైన బాబ్‌ అల్‌ మందబ్‌ జలసంధి సమీప ప్రాంతాలతో పాటు ఉత్తర యెమెన్‌లోని పలు ప్రావిన్సులపైనా దాడులు జరిగినట్లు పేర్కొంది.
ఇదిలా ఉండగా, గత 24 గంటల్లో యెమెన్‌లోని పలు యుద్ధ రంగాల్లో 1,900కు పైగా దాడులు జరిగాయని ఆ దేశ ప్రభుత్వ దళాలు వెల్లడించాయి.
వివరాలు
తైజ్‌ నగరం చుట్టూ తీవ్ర ఘర్షణలు
ఈ దాడుల్లో 1,150 మందికి పైగా హౌతీ యోధులను నిర్వీర్యం చేసినట్లు, 180కు పైగా సైనిక, లాజిస్టిక్స్‌ వాహనాలను ధ్వంసం చేసినట్లు లేదా దెబ్బతీసినట్లు పేర్కొన్నాయి.
అయితే, ఈ గణాంకాలను స్వతంత్రంగా ధ్రువీకరించలేదని సమాచారం. యెమెన్‌ నైరుతి ప్రాంతంలోని తైజ్‌ నగరం చుట్టూ కూడా పోరాటం తీవ్రరూపం దాల్చింది. హౌతీ దళాల ముందడుగుతో నగరాన్ని రక్షిస్తున్న ప్రభుత్వ బలగాలపై ఒత్తిడి పెరుగుతోందని ప్రభుత్వ సైనిక వర్గాలు జిన్హువాకు తెలిపాయి.
దక్షిణ యెమెన్‌లో ప్రభుత్వ ఆధీనంలోని ప్రాంతాలతో తైజ్‌ను అనుసంధానించే కీలక రహదారులపై కూడా ఈ పరిణామాలు ప్రభావం చూపుతున్నాయి.
నగరానికి దక్షిణంగా ప్రభుత్వ దళాలు, హౌతీ యోధుల మధ్య తీవ్ర ఘర్షణలు కొనసాగుతున్నట్లు సైనిక వర్గాలు వెల్లడించాయి.
వివరాలు
2014 నుంచి కొనసాగుతున్న యెమెన్‌ సంక్షోభం
సౌదీ వైమానిక దాడుల మద్దతుతో యెమెన్‌ ప్రభుత్వం సోమవారం భారీ సైనిక దాడిని ప్రారంభించింది. హౌతీల ఆధీనంలో ఉన్న భూభాగాలను తిరిగి స్వాధీనం చేసుకోవడమే ఈ ఆపరేషన్‌ లక్ష్యమని తెలిపింది.
వ్యూహాత్మకంగా కీలకమైన బాబ్‌ అల్‌ మందబ్‌ జలసంధి పరిసరాల్లో అత్యంత తీవ్రమైన పోరాటం జరుగుతున్నట్లు సమాచారం.
యెమెన్‌లో 2014 చివరి నుంచి అంతర్యుద్ధం కొనసాగుతోంది. ఆ సమయంలో హౌతీ తిరుగుబాటుదారులు రాజధాని సనాతో పాటు దేశంలోని ఉత్తర ప్రాంతాల్లో అధిక భాగాన్ని తమ ఆధీనంలోకి తీసుకున్నారు.
అంతర్జాతీయంగా గుర్తింపు పొందిన యెమెన్‌ ప్రభుత్వానికి మద్దతుగా సౌదీ అరేబియా నేతృత్వంలోని సంకీర్ణ దళాలు 2015లో యుద్ధంలో జోక్యం చేసుకున్నాయి.
వివరాలు
దాడులు మళ్లీ తీవ్రతరం
ప్రస్తుతం ఆ ప్రభుత్వం దక్షిణ తీర నగరమైన ఏడెన్‌ నుంచి కార్యకలాపాలు నిర్వహిస్తోంది.
2022లో ఐక్యరాజ్యసమితి మధ్యవర్తిత్వంతో కుదిరిన కాల్పుల విరమణ ఒప్పందం కారణంగా ప్రధాన స్థాయి ఘర్షణలు చాలావరకు తగ్గాయి.
అయితే, తాజాగా సౌదీ అరేబియా, హౌతీ దళాల మధ్య పరస్పర దాడులు మళ్లీ తీవ్రతరం కావడంతో యెమెన్‌లో పరిస్థితులు మరింత ఉద్రిక్తంగా మారాయి.
విమానాశ్రయాలు, వ్యూహాత్మక ప్రాంతాలే లక్ష్యంగా దాడులు జరుగుతుండటంతో ప్రాంతీయ భద్రతపై ఆందోళనలు పెరుగుతున్నాయి.