Austria: పాఠశాలల్లో హిజాబ్ను నిషేధించే బిల్లుకు ఆస్ట్రియాన్ పార్లమెంట్ ఆమోదం
ఈ వార్తాకథనం ఏంటి
ఆస్ట్రియా పార్లమెంట్ గురువారం జరిగిన ఓటింగ్లో, 14 ఏళ్ల లోపు అమ్మాయిలు పాఠశాలల్లో హిజాబ్ ధరించడం నిషేధించే కొత్త చట్టానికి పెద్దఎత్తున మద్దతు తెలిపింది. ఈ నిర్ణయం వివక్షతకు దారి తీస్తుందని, సమాజంలో విభేదాలు మరింత పెరగవచ్చని హక్కుల సంస్థలు, నిపుణులు హెచ్చరిస్తున్నారు. దేశంలో పరిరక్షణవాద ప్రభుత్వం వలస వ్యతిరేక భావనలు పెరుగుతున్న నేపథ్యంలో ఈ చట్టాన్ని ఈ ఏడాది ప్రారంభంలో ప్రతిపాదించింది. చిన్నారులను "అణచివేత నుండి రక్షించేందుకు" ఈ నిషేధం అవసరమని ప్రభుత్వం వాదించింది. 2019లో ఆస్ట్రియా ప్రాథమిక పాఠశాలల్లో హెడ్స్కార్ఫ్ నిషేధం తీసుకువచ్చినా, రాజ్యాంగ కోర్టు దాన్ని కొట్టివేసింది. అయినప్పటికీ ఈసారి తమ కొత్త చట్టం రాజ్యాంగానికి తగ్గట్టే ఉందని ప్రభుత్వం చెబుతోంది.
వివరాలు
ఈ నిషేధానికి వ్యతిరేకంగా ఓటేసిన గ్రీన్ పార్టీ
కానీ నిపుణుల అభిప్రాయం ప్రకారం, ఈ చట్టం ఒకే మతమైన ఇస్లాంను లక్ష్యంగా చేసిందనే భావన రావచ్చు, పిల్లలను కూడా ఇబ్బందులో పడేసే అవకాశం ఉంది. కొత్త చట్టం ప్రకారం, ఇస్లామిక్ సంప్రదాయాల ప్రకారం తలను పూర్తిగా కప్పే హెడ్స్కార్ఫ్ను 14 ఏళ్ల లోపు అమ్మాయిలు ఏ పాఠశాలలోనూ ధరించకూడదు. గురువారం జరిగిన చర్చలో, గ్రీన్ పార్టీ మాత్రమే ఈ నిషేధానికి వ్యతిరేకంగా ఓటేసింది. వోటింగ్కు ముందు, లిబరల్ పార్టీకి చెందిన నేత యానిక్ షెట్టి మాట్లాడుతూ హెడ్స్కార్ఫ్ "కేవలం దుస్తులలో భాగం కాదు, అది అమ్మాయిలను లైంగికంగా చూపించేలా చేస్తుంది" అని అన్నారు.
వివరాలు
సెప్టెంబర్లో కొత్త విద్యాసంవత్సరం ప్రారంభం నుంచి పూర్తిగా అమల్లోకి..
ఇంటిగ్రేషన్ మంత్రిణి క్లౌడియా ప్లకోమ్ బిల్లును పరిచయం చేస్తూ,"ఒక అమ్మాయికి తన శరీరాన్ని పురుషుల చూపుల నుంచి రక్షించుకోవడం కోసం దాచుకోవాలని చెప్పడం ఇది ఆధ్యాత్మిక ఆచారం కాదు, అణచివేత" అని వ్యాఖ్యానించారు. ఈ నిషేధం హిజాబ్,బుర్ఖా సహా అన్ని రకాల ఇస్లామిక్ దుప్పట్లకు వర్తిస్తుంది. సెప్టెంబర్లో కొత్త విద్యాసంవత్సరం ప్రారంభం నుంచి పూర్తిగా అమల్లోకి వస్తుందని ప్రభుత్వం తెలిపింది. ఫిబ్రవరి నుంచి మొదటి దశలో, ఉపాధ్యాయులు, తల్లిదండ్రులు, పిల్లలకు ఈ నిబంధన గురించి వివరించే పనులు చేపడతారు. ఈ సమయంలో నిబంధనలు ఉల్లంఘించినా శిక్షలు ఉండవు. అయితే, పదేపదే నిబంధనలు పాటించని పరిస్థితుల్లో, తల్లిదండ్రులకు 150 నుంచి 800 యూరోలు (సుమారు ₹15,000-₹70,000) వరకు జరిమానా విధిస్తారు.
వివరాలు
ఈ నిషేధం వల్ల సుమారు 12,000 మంది అమ్మాయిలపై ప్రభావం
ప్రభుత్వం అంచనా ప్రకారం, ఈ నిషేధం వల్ల సుమారు 12,000 మంది అమ్మాయిలు ప్రభావితమవుతారు. హక్కుల సంఘాలు, కార్యకర్తలు ఈ నిషేధం మహిళలకు ఏమి ధరించాలో చెప్పడం ద్వారా వారి స్వేచ్ఛను హరించడమేనని విమర్శిస్తున్నారు. అమ్నెస్టీ ఇంటర్నేషనల్ ఆస్ట్రియా కూడా ఈ బిల్లును తీవ్రంగా విమర్శించింది. ఇది "ముస్లిం అమ్మాయిలపై వివక్ష" అని, "ముస్లింలపై జాత్యహంకార భావజాలం బలపడే ప్రమాదం ఉందని" హెచ్చరించింది.
వివరాలు
ఈ చట్టాన్ని ఖండించిన IGGOe సంస్థ
ఆస్ట్రియాలోని ముస్లిం సమాజాలను ప్రతినిధిత్వం చేసే IGGOe అనే సంస్థ కూడా ఈ చట్టాన్ని ఖండించింది. "ఇది సామాజిక ఏకత్వాన్ని దెబ్బతీసే చర్య"గా పేర్కొంటూ,"పిల్లలను శక్తివంతం చేయడం బదులుగా వారిని అపహాస్యం చేస్తున్నది" అని తెలిపింది. అమజోన్ ఉమెన్స్ రైట్స్ అసోసియేషన్ డైరెక్టర్ ఏంజెలికా అజింగర్ మాట్లాడుతూ,హెడ్స్కార్ఫ్ నిషేధం "అమ్మాయిలకు తమ శరీరంపై నిర్ణయాలు ఇతరులు తీసుకోవడం సబబే అని అనిపించేలా చేస్తుంది" అని విమర్శించారు. వారి వ్యాఖ్యలను SOS మిట్మెన్ష్ అనే వ్యతిరేక వివక్ష సంస్థ ఒక ప్రకటనలో ప్రచురించింది. ఇదే సమయంలో,వలస వ్యతిరేక భావజాలంతో ముందుకు సాగే కుడిపక్ష ఫ్రీడమ్ పార్టీ (FPOe)మాత్రం ఈ నిషేధం సరిపోదని,ఇది విద్యార్థులు మాత్రమే కాకుండా ఉపాధ్యాయులు, సిబ్బందికి కూడా వర్తించాలనేది వారి డిమాండ్.
వివరాలు
ఇతర దేశాల పరిస్థితి
ఫ్రాన్స్లో 2004లోనే స్కూల్ విద్యార్థులు హెడ్స్కార్ఫ్లు, తలపాగాలు, యూదుల స్కల్క్యాప్లు వంటి మత గుర్తులు ధరించకుండా చట్టం తీసుకువచ్చారు. దేశం అనుసరించే ధర్మనిరపేక్ష సిద్ధాంతాల ప్రకారం, ప్రభుత్వ సంస్థల్లో మత ప్రభావం లేకుండా ఉండాలని ఆ చట్టం పేర్కొంటుంది.