Bangladesh: యూనస్ నోటి నుంచి మరోసారి రెచ్చగొట్టే వ్యాఖ్యలు.. సెవెన్ సిస్టర్స్పై వివాదాస్పద వ్యాఖ్యలు
ఈ వార్తాకథనం ఏంటి
బంగ్లాదేశ్లో కొత్త ప్రభుత్వం కొలువుదీరనుంది. ఇప్పటివరకు తాత్కాలిక ప్రభుత్వానికి నాయకత్వం వహించిన మహమ్మద్ యూనస్ (Muhammad Yunus) సోమవారం తన పదవికి రాజీనామా చేశారు. ఈ సందర్భంగా ఆయన జాతిని ఉద్దేశించి చేసిన ప్రసంగంలో మరోసారి భారత వ్యతిరేక భావాలను వ్యక్తం చేశారు. ముఖ్యంగా భారత్కు చెందిన ఈశాన్య రాష్ట్రాలు, అంటే 'సెవెన్ సిస్టర్స్'ను ప్రస్తావిస్తూ తీవ్ర వ్యాఖ్యలు చేశారు. తన ప్రసంగంలో యూనస్ మాట్లాడుతూ, "విశాలమైన సముద్రం బంగ్లాదేశ్కు కేవలం భౌగోళిక హద్దు మాత్రమే కాదు. ప్రపంచ ఆర్థిక వ్యవస్థతో మమేకమయ్యే ప్రధాన ద్వారం కూడా అదే. నేపాల్, భూటాన్, అలాగే సెవెన్ సిస్టర్స్ ప్రాంతాలతో కలిసి ఈ ప్రాంతం అపారమైన ఆర్థిక శక్తిని కలిగి ఉంది" అని పేర్కొన్నారు.
వివరాలు
ఈ రాష్ట్రాలను కలిపే ప్రాంతాన్ని 'సెవెన్ సిస్టర్స్'గా పిలుస్తారు
భారత్ పేరును ప్రత్యక్షంగా ప్రస్తావించకపోయినా, భారత ఈశాన్య రాష్ట్రాలను బంగ్లాదేశ్తో కలిపి ఒక ప్రత్యేక ఉపప్రాంతంగా పేర్కొనడం రెచ్చగొట్టే చర్యగా భావించబడుతోంది. యూనస్ నుంచి ఇలాంటి వ్యాఖ్యలు రావడం ఇదే తొలిసారి కాదు. గతంలో ఆయన చైనా పర్యటనలో కూడా భారత ఈశాన్య రాష్ట్రాలపై వివాదాస్పద వ్యాఖ్యలు చేశారు. ఆ రాష్ట్రాలకు సముద్ర మార్గం లేదని, సముద్రానికి వెళ్లే ద్వారాన్ని తామే నియంత్రిస్తున్నామని చెప్పిన ఆయన, ఈ అంశాన్ని చైనా ఆర్థిక విస్తరణకు గొప్ప అవకాశంగా అభివర్ణించారు. ఈ వ్యాఖ్యలపై అప్పట్లో భారత్ తీవ్ర అభ్యంతరం వ్యక్తం చేసింది. అరుణాచల్ ప్రదేశ్, అస్సాం, మణిపూర్, మేఘాలయ, మిజోరం, నాగాలాండ్, త్రిపుర రాష్ట్రాలను కలిపే ఈ ప్రాంతాన్ని 'సెవెన్ సిస్టర్స్'గా పిలుస్తారన్న విషయం తెలిసిందే.
వివరాలు
బంగ్లాదేశ్ ఎట్టి పరిస్థితుల్లోనూ లొంగిపోయే దేశం కాదు
ఇదిలా ఉండగా, బంగ్లాదేశ్ పార్లమెంట్ ఎన్నికల్లో విజయం సాధించిన బీఎన్పీ మంగళవారం అధికారికంగా ప్రభుత్వాన్ని ఏర్పాటు చేయనుంది. బీఎన్పీ ముఖ్య నేత తారిఖ్ రెహ్మాన్ నూతన ప్రధానిగా ప్రమాణస్వీకారం చేయనున్నారు. 2024లో విద్యార్థుల ఉద్యమాల నేపథ్యంలో అప్పటి ప్రధాని షేక్ హసీనా అధికారాన్ని వదిలివేయాల్సి వచ్చింది. అనంతరం ఏర్పడిన తాత్కాలిక ప్రభుత్వానికి యూనస్ నాయకత్వం వహించారు. సుమారు 18 నెలల పాటు ఆయన పాలన కొనసాగింది. ఈ కాలంలో ఆయన నిర్ణయాలు, వ్యాఖ్యల కారణంగా అనేక విమర్శలను ఎదుర్కొన్నారు. తన పదవికి రాజీనామా చేస్తూ యూనస్, బంగ్లాదేశ్ ఎట్టి పరిస్థితుల్లోనూ లొంగిపోయే దేశం కాదని స్పష్టం చేశారు. ఇతర దేశాల సూచనలు లేదా ఆదేశాల ప్రకారం తమ ప్రభుత్వం పనిచేయదని ఆయన తేల్చిచెప్పారు.