Bangladesh: ఎన్నికల సమయంలో బీఎన్పీ అవామీ లీగ్,భారత్'తో చేతులు కలిపింది: నాహిద్ ఇస్లాం
ఈ వార్తాకథనం ఏంటి
బంగ్లాదేశ్ రాజకీయాల్లో తాజా పరిణామాలు వేడెక్కుతున్నాయి. ఎన్నికల సమయంలో అవామీ లీగ్ అక్రమాలకు పాల్పడిందని ఆరోపిస్తూ విద్యార్థి నాయకులు తీవ్ర ఆందోళనలు చేపట్టారు. ఆ ఒత్తిడితో అప్పటి ప్రధాని షేక్ హసీనా పదవి నుంచి తప్పుకుని భారత్ పారిపోయి వచ్చేలా చేశారు. అనంతరం మహ్మద్ యూనస్ను తాత్కాలిక దేశాధినేతగా నియమించారు. ఆయన ఆధ్వర్యంలో నిర్వహించిన తాజా ఎన్నికల్లో బంగ్లాదేశ్ నేషనలిస్ట్ పార్టీ (బీఎన్పీ) స్పష్టమైన మెజారిటీ సాధించింది. ఆ పార్టీ అధ్యక్షుడు తారిఖ్ రెహ్మాన్ ప్రధాని పదవిని చేపట్టారు. అయితే ఇప్పుడు విద్యార్థి నాయకుల విమర్శలు బీఎన్పీపై కేంద్రీకృతమయ్యాయి.
వివరాలు
ఎన్నికల ఫలితాలపై అనుమానాలు
షేక్ హసీనాను పదవి నుంచి దించడంలో కీలక పాత్ర పోషించిన విద్యార్థి నాయకుడు నాహిద్ ఇస్లాం సంచలన వ్యాఖ్యలు చేశారు. నేషనల్ సిటిజన్ పార్టీ (ఎన్సీపీ) కన్వీనర్గా, ప్రతిపక్ష విప్గా ఉన్న ఆయన మాట్లాడుతూ, ఈ ఎన్నికల్లో విజయం సాధించేందుకు బీఎన్పీ భారత్తో చేతులు కలిపిందని ఆరోపించారు. 2026 ఎన్నికల నేపథ్యంలో భారత్, అవామీ లీగ్ మధ్య అవగాహన కుదిరి బీఎన్పీకి అనుకూల పరిస్థితులు సృష్టించాయని పేర్కొన్నారు. ఎన్నికల ఫలితాలపై అనుమానాలు వ్యక్తం చేసిన ఆయన, స్వతంత్రంగా, నిష్పక్షపాతంగా దర్యాప్తు జరపాలని డిమాండ్ చేశారు.
వివరాలు
అవామీ లీగ్ ని తిరిగి బలపర్చే యత్నాలు జరిగితే రాజకీయ పోరాటానికి సిద్ధం
ఓటు బ్యాంక్ రాజకీయాల కోసం అవామీ లీగ్ను మళ్లీ బలోపేతం చేసే ప్రయత్నాలు జరిగితే ప్రజలు తీవ్రంగా ప్రతిస్పందిస్తారని నాహిద్ హెచ్చరించారు. దేశ ప్రజలు రాజకీయ పునరుద్ధరణ చర్యలను ఒప్పుకోరని, ప్రజాస్వామ్య మార్గాల్లోనే వాటిని అడ్డుకుంటామని స్పష్టం చేశారు. అవామీ లీగ్ అంశంపై ప్రభుత్వం సరైన చర్చలు జరపకపోతే దాని బాధ్యత పూర్తిగా కొత్త ప్రభుత్వానిదేనని అన్నారు. ఆ పార్టీని తిరిగి బలపర్చే యత్నాలు జరిగితే రాజకీయ పోరాటానికి సిద్ధంగా ఉంటామని తెలిపారు. దేశంలోని పలు ప్రాంతాల్లో అవామీ లీగ్ కార్యాలయాలు మళ్లీ ప్రారంభమవుతున్నాయని, ఇది ఒక వ్యూహాత్మక రాజకీయ చర్య కావచ్చని నాహిద్ ఇస్లాం వ్యాఖ్యానించారు.