Canada: కెనడాలో 'కాంబాటింగ్ హేట్' బిల్లుకు ఆమోదం.. ఖలిస్థానీల ఆగడాలకు చెక్!
ఈ వార్తాకథనం ఏంటి
కెనడా చట్టసభ కీలక నిర్ణయం తీసుకుంది. విద్వేషపూరిత చర్యలు, ద్వేష నేరాలను అరికట్టేందుకు రూపొందించిన 'కాంబాటింగ్ హేట్' (సీ-9 బిల్లు)కి ఆమోదం తెలిపింది. ఇప్పటికే ఈ బిల్లుకు హౌస్ ఆఫ్ కామన్స్ గ్రీన్ సిగ్నల్ ఇవ్వగా, ఇప్పుడు దీనిని ఎగువసభ అయిన సెనెట్కు పంపించారు. ఈ బిల్లు అమల్లోకి వస్తే విద్వేష చిహ్నాలను బహిరంగంగా ప్రదర్శించడం నేరంగా పరిగణించబడుతుంది. ముఖ్యంగా ప్రార్థనా స్థలాలపై దాడులు, అలాగే ఖలిస్థానీ మద్దతుదారుల ఆగడాలను నియంత్రించడంలో ఇది కీలకంగా మారుతుందని విశ్లేషకులు భావిస్తున్నారు. కెనడాలో నివసిస్తున్న భారత సంతతి ప్రజలు ఈ చట్టం కోసం చాలా కాలంగా ఎదురు చూస్తున్నారు.
వివరాలు
ఖలిస్థానీ కార్యకలాపాల పెరుగుదలపై ఆందోళనలు
ఇటీవల కాలంలో కెనడాలో ఖలిస్థానీ మద్దతుదారుల చర్యలు గణనీయంగా పెరిగాయి. కొన్ని వర్గాలను లక్ష్యంగా చేసుకుని బెదిరింపులు చేయడం, విధ్వంసానికి పాల్పడటం వంటి ఘటనలు తరచూ చోటుచేసుకుంటున్నాయి. ఈ పరిస్థితిపై ప్రవాస భారతీయులు ఎన్నో ఏళ్లుగా ఆందోళన వ్యక్తం చేస్తున్నారు. ఇలాంటి సందర్భంలో విద్వేష నేరాలను అరికట్టేందుకు ఈ కొత్త బిల్లు ఆమోదం పొందడం వారికి కొంత ఊరటనిచ్చే అంశంగా మారింది.
వివరాలు
కఠిన శిక్షలు.. కీలక నిబంధనలు
కొత్త బిల్లులో పలు కఠిన నిబంధనలు ఉన్నాయి. నిషేధిత సంస్థల చిహ్నాలను బహిరంగంగా ప్రదర్శించడం, ప్రత్యేక వర్గాలను లక్ష్యంగా చేసుకుని ద్వేషాన్ని రెచ్చగొట్టడం వంటి చర్యలను తీవ్ర నేరాలుగా పరిగణిస్తారు. అలాగే యూదులు, ముస్లింలు సహా ఇతర మతాలకు చెందిన వారిని వారి ప్రార్థనా స్థలాల్లోకి వెళ్లకుండా అడ్డుకోవడం కూడా నేరంగా పరిగణించబడుతుంది. ఇటువంటి చర్యలకు పాల్పడితే గరిష్ఠంగా 10 సంవత్సరాల వరకు జైలు శిక్ష విధించే అవకాశం ఉంది.