China: చైనా నుంచి ప్రాణాలకు తెగించి పారిపోయిన మాజీ పోలీసు.. సముద్రంలో 30 గంటల పోరాటం
ఈ వార్తాకథనం ఏంటి
చైనా ప్రభుత్వ విధానాలను బహిరంగంగా వ్యతిరేకిస్తూ ఎన్నో ఇబ్బందులు ఎదుర్కొన్న ఓ మాజీ పోలీసు అధికారి ప్రాణాలకు తెగించి దేశం విడిచిపెట్టిన ఘటన ఇప్పుడు ప్రపంచవ్యాప్తంగా చర్చనీయాంశంగా మారింది. చిన్న రబ్బరు పడవలో దాదాపు 30 గంటల పాటు సముద్రంలో ప్రయాణించి దక్షిణ కొరియాకు చేరుకోవడం సంచలనంగా మారింది. 68 ఏళ్ల డాంగ్ గ్వాంగ్పింగ్ చైనాలో మాజీ పోలీసు అధికారిగా పనిచేశాడు. 1989లో జరిగిన తియాన్మెన్ స్క్వేర్ ఘటనపై ప్రభుత్వ చర్యలను వ్యతిరేకిస్తూ పదేళ్ల తర్వాత విడుదలైన ఓ లేఖకు ఆయన మద్దతు ప్రకటించాడు. ఆ నిర్ణయం కారణంగా ఉద్యోగాన్ని కోల్పోయాడు. అప్పటి నుంచి ప్రభుత్వ విధానాలపై విమర్శలు చేస్తూ పలుమార్లు అరెస్టులకు గురయ్యాడు.
వివరాలు
2019లో దేశం విడిచి వెళ్లేందుకు ప్రయత్నాలు
చైనాలో తనకు స్వేచ్ఛగా జీవించే అవకాశం లేదని భావించిన డాంగ్.. 2015లో కుటుంబంతో కలిసి థాయిలాండ్కు వెళ్లాడు. అక్కడి నుంచి అతడి కుటుంబ సభ్యులకు కెనడాలో ఆశ్రయం లభించింది. అయితే డాంగ్ను మాత్రం థాయ్లాండ్ అధికారులు తిరిగి చైనాకు పంపించారు. అనంతరం ఆయన మళ్లీ జైలు శిక్ష అనుభవించాల్సి వచ్చింది. 2019లో జైలు నుంచి విడుదలైన తర్వాత కుటుంబ సభ్యులను కలుసుకోవాలనే లక్ష్యంతో మరోసారి దేశం విడిచి వెళ్లేందుకు ప్రయత్నాలు ప్రారంభించాడు. అక్రమంగా సరిహద్దు దాటేందుకు యత్నించాడనే ఆరోపణలతో చైనా అధికారులు మరోసారి అదుపులోకి తీసుకున్నారు. విడుదల అనంతరం వెయిహై ప్రాంతం నుంచి సముద్ర మార్గంలో తప్పించుకునే ప్రణాళిక అమలు చేశాడు.
వివరాలు
రబ్బరు పడవలో ఒంటరిగా సముద్ర ప్రయాణం
చిన్న రబ్బరు పడవలో ఒంటరిగా సముద్ర ప్రయాణం ప్రారంభించిన డాంగ్.. దాదాపు 30 గంటల పాటు ప్రాణాలకు తెగించి ప్రయాణించాడు. చివరకు దక్షిణ కొరియా తీరానికి చేరుకున్నాడు. సముద్రంలో అతడిని గుర్తించిన మత్స్యకారులు అధికారులకు సమాచారం అందించారు. వెంటనే తీరరక్షక సిబ్బంది అక్కడికి చేరుకుని అతడిని అదుపులోకి తీసుకున్నారు. ఈ ఘటన చైనా-దక్షిణ కొరియా సంబంధాలపై ప్రభావం చూపే అవకాశం ఉందని అంతర్జాతీయ వర్గాలు భావిస్తున్నాయి. దక్షిణ కొరియా ప్రభుత్వం అతడిని తిరిగి చైనాకు పంపించే అవకాశమూ ఉన్నట్లు సమాచారం. అయితే స్వేచ్ఛ కోసం, కుటుంబ సభ్యులతో కలిసేందుకు ఎన్నో సంవత్సరాలుగా పోరాడుతున్న డాంగ్ను వెనక్కి పంపించవద్దని మానవహక్కుల సంస్థలు విజ్ఞప్తి చేస్తున్నాయి.