Riyadh airport: రియాద్ ఎయిర్‌పోర్టులో పేలుడు కలకలం.. పలు విమానాలు రద్దు
ఈ వార్తాకథనం ఏంటి
సౌదీ అరేబియా రాజధాని రియాద్‌లోని కింగ్ ఖాలిద్ అంతర్జాతీయ విమానాశ్రయంలో శనివారం భారీ పేలుడు శబ్దం వినిపించింది. దీంతో విమానాశ్రయంలోని కొన్ని ప్రాంతాల నుంచి ప్రయాణికులను అధికారులు ఖాళీ చేయించారు. ఘటన జరిగిన ప్రాంతానికి పదికి పైగా అంబులెన్సులు వేగంగా చేరుకున్నట్లు ప్రత్యక్ష సాక్షులు తెలిపారు. యెమెన్‌కు చెందిన ఇరాన్ మద్దతు ఉన్న హౌతీ తిరుగుబాటుదారులు సౌదీ అరేబియాపై క్షిపణి దాడులను తీవ్రతరం చేసిన నేపథ్యంలో ఈ ఘటన చోటుచేసుకుంది. ఈ వారంలోనే రియాద్ విమానాశ్రయంపై రెండుసార్లు దాడులు జరిగాయి. ఈ దాడుల్లో నలుగురు మరణించగా, పలువురు గాయపడ్డారు. ఓ విమానం కూడా తీవ్రంగా దెబ్బతిన్నట్లు సమాచారం.
వివరాలు
విమానాల రాకపోకలకు అంతరాయం
శనివారం పేలుడు ఘటన తర్వాత రియాద్‌కు వెళ్లాల్సిన విమానాల రాకపోకలకు తీవ్ర అంతరాయం ఏర్పడింది.
ఫ్లైట్ ట్రాకింగ్ వెబ్‌సైట్ ఫ్లైట్‌రాడార్24 సమాచారం ప్రకారం.. రియాద్‌కు రావాల్సిన విమానాలను ఇతర విమానాశ్రయాలకు మళ్లించడం లేదా రద్దు చేయడం జరిగింది.
ప్రయాణికులు విమానాశ్రయానికి బయలుదేరే ముందు తమ విమానాల స్థితిగతులను పరిశీలించుకోవాలని, సంబంధిత విమానయాన సంస్థలను నేరుగా సంప్రదించాలని విమానాశ్రయ అధికారులు సూచించారు.
ఎతిహాద్ ఎయిర్‌వేస్, ఖతార్ ఎయిర్‌వేస్ సంస్థలు తమ ప్రధాన కేంద్రాల నుంచి రియాద్‌కు నడిపే పలు విమానాలను రద్దు చేశాయి. కొన్ని విమానాల రద్దులు సోమవారం వరకు కొనసాగనున్నట్లు సమాచారం.
వివరాలు
ఈ వారంలో వరుస దాడులు
గురువారం, అంతకుముందు ఈ వారంలో జరిగిన హౌతీ దాడుల కారణంగా ఇప్పటికే పలు విమానయాన సంస్థలు రియాద్‌కు తమ సర్వీసులను నిలిపివేయడం లేదా రద్దు చేయడం చేశాయి.
ఈ పరిణామాలు సౌదీ రాజధానిలో జరగనున్న కీలక ఇంధన, పెట్టుబడుల సదస్సులకు కొద్దిరోజుల ముందు చోటుచేసుకోవడం ప్రాధాన్యం సంతరించుకుంది.
అయితే, ఈ సదస్సులు ముందుగా నిర్ణయించిన షెడ్యూల్ ప్రకారమే జరుగుతాయని నిర్వాహకులు శనివారం ప్రకటించారు. పాల్గొనే ప్రతినిధుల భద్రతపై ఆందోళన చెందాల్సిన అవసరం లేదని భరోసా కల్పించే ప్రయత్నం చేశారు.
వివరాలు
సౌదీ గగనతలంపై హౌతీల హెచ్చరిక
ఈ నెల ప్రారంభంలో సౌదీ మద్దతు ఉన్న యెమెన్ ప్రభుత్వం హౌతీ తిరుగుబాటుదారులపై సైనిక దాడులు ప్రారంభించింది.
దీనికి ప్రతిస్పందనగా సౌదీ అరేబియా గగనతలాన్ని సైనిక కార్యకలాపాల ప్రాంతంగా ప్రకటించిన హౌతీలు.. ఆ దేశ గగనతలం మీదుగా విమానాలు ప్రయాణించవద్దని హెచ్చరించారు.
శనివారం జరిగిన పేలుడు ఘటనపై సౌదీ ప్రభుత్వ మీడియా కార్యాలయం, పౌర విమానయాన సంస్థ వెంటనే స్పందించలేదు. ఘటనకు సంబంధించిన పూర్తి వివరాలు ఇంకా వెల్లడికావాల్సి ఉంది.