Iodine tablets: అమెరికా దాడుల భయం.. అణు కేంద్రాల సమీపంలో ప్రజలకు అయోడిన్ టాబ్లెట్లు పంచుతున్న ఇరాన్!
ఈ వార్తాకథనం ఏంటి
ఇరాన్‌లో యుద్ధ వాతావరణం మరింత ఆందోళనకరంగా మారుతోంది. అమెరికాతో ఉద్రిక్తతలు కొనసాగుతున్న నేపథ్యంలో తమ దేశ ప్రజలకు ఇరాన్ ప్రభుత్వం అయోడిన్ టాబ్లెట్లను పంపిణీ చేస్తోంది. యుద్ధం ఎప్పుడు, ఎలాంటి మలుపు తిరుగుతుందో తెలియని పరిస్థితుల్లో ముందుజాగ్రత్త చర్యగా ఈ ఔషధాలను అందిస్తోంది. అసలు యుద్ధానికి, అయోడిన్ టాబ్లెట్లకు సంబంధం ఏమిటి? ఇరాన్ ఈ నిర్ణయం తీసుకోవడానికి కారణమేంటి? 'అణు కేంద్రాలకు సమీపంలో నివసించే ప్రజలకు ముందుజాగ్రత్తగా అయోడిన్ టాబ్లెట్లను పంపిణీ చేస్తున్నాం. అమెరికా అధ్యక్షుడు డొనాల్డ్ ట్రంప్‌ను నమ్మలేం. ఆయన ఇలాంటి చర్యకు పాల్పడే అవకాశం ఉందని ఇరాన్ అధికారి ఒకరు మీడియాకు వెల్లడించారు.
వివరాలు
రేడియేషన్ నుంచి థైరాయిడ్‌కు రక్షణ
ఇటీవల అమెరికాతో ఉద్రిక్తతలు తీవ్రస్థాయికి చేరిన సమయంలోనూ టెహ్రాన్ ప్రభుత్వం అణు స్థావరాల చుట్టూ 2 నుంచి 3 కిలోమీటర్ల పరిధిలో నివసించే ప్రజలకు ఈ టాబ్లెట్లను పంపిణీ చేసింది.
అణు కేంద్రాలపై దాడులు జరిగితే వెలువడే రేడియోధార్మికత ప్రభావం ప్రజలపై పడకుండా ఉండేందుకు ఈ చర్యలు చేపట్టింది.
అణు ప్రమాదాలు లేదా అణు దాడుల సమయంలో వెలువడే రేడియేషన్ మనిషి ఆరోగ్యంపై తీవ్ర ప్రభావం చూపే ప్రమాదం ఉంది.
ముఖ్యంగా రేడియోధార్మిక అయోడిన్ థైరాయిడ్ గ్రంథిలో పేరుకుపోయి ఆ కణాలను దెబ్బతీయవచ్చు. దీంతో థైరాయిడ్ గ్రంథి పనితీరు మందగించి, హార్మోన్ల ఉత్పత్తికి ఆటంకం కలగవచ్చు.
వివరాలు
భవిష్యత్తులో థైరాయిడ్ క్యాన్సర్ వచ్చే ప్రమాదం
రేడియేషన్‌కు గురైనవారికి భవిష్యత్తులో థైరాయిడ్ క్యాన్సర్ వచ్చే ప్రమాదం కూడా ఉంటుందని నిపుణులు చెబుతున్నారు.
అయోడిన్ టాబ్లెట్లలో ఉండే పొటాషియం అయోడైడ్ థైరాయిడ్ గ్రంథిలో సాధారణ అయోడిన్ నిల్వలను పెంచుతుంది.
తద్వారా రేడియోధార్మిక అయోడిన్ శరీరంలోకి చేరినప్పుడు థైరాయిడ్ గ్రంథి దానిని గ్రహించకుండా కొంతవరకు అడ్డుకుంటుంది.
అయితే ఈ టాబ్లెట్లు అన్ని రకాల రేడియేషన్ నుంచి రక్షణ కల్పించవు. వైద్యులు లేదా సంబంధిత అధికారులు సూచించినప్పుడు మాత్రమే వీటిని తీసుకోవాలి.
వివరాలు
పికాక్స్‌ మౌంటైన్ అణు కేంద్రంపై దాడి భయాలు
ఇదిలా ఉండగా.. రెండు రోజుల క్రితం అమెరికా అధ్యక్షుడు డొనాల్డ్ ట్రంప్ జాతీయ భద్రతా బృందంతో సమావేశమయ్యారు.
ఇరాన్‌పై సైనిక చర్యలను కొనసాగించాలా? వద్దా? అనే అంశంపై చర్చించినట్లు సమాచారం. ఈ పరిణామాల నేపథ్యంలో ఇరాన్‌లోని పికాక్స్‌ మౌంటైన్ (Pickaxe Mountain) ప్రాంతంలో ఉన్న అణు కేంద్రంపై అమెరికా దాడి చేయవచ్చనే భయాలు వ్యక్తమవుతున్నాయి.
అమావాస్య కారణంగా రాబోయే రెండు రోజుల్లో చంద్రుడి వెలుతురు తక్కువగా ఉండనుంది. రాత్రి వేళల్లో దాడులు నిర్వహించడానికి ఇది అనుకూలమైన సమయమని భావిస్తున్న నేపథ్యంలో ఇరాన్‌లో ఆందోళనలు మరింత పెరిగాయి.
యుద్ధాన్ని తిరిగి ప్రారంభించే విషయంలో తమ ప్రభుత్వం త్వరలోనే నిర్ణయం తీసుకుంటుందని ఇటీవల ట్రంప్ ప్రకటించారు.
వివరాలు
అణు సమాచారం ఇస్తే.. రూ.188 కోట్లకుపైగా రివార్డు!
ఈ పరిణామాలన్నీ ఇరాన్‌పై మరోసారి దాడులు జరిగే అవకాశాలపై భయాలను పెంచుతున్నాయి. దీంతో టెహ్రాన్ ప్రభుత్వం ముందస్తు జాగ్రత్త చర్యలకు దిగింది.
మరోవైపు, ఇరాన్ అణు కార్యక్రమానికి సంబంధించిన కీలక సమాచారం అందించే వారికి అమెరికా భారీ బహుమతిని ప్రకటించింది.
ఈ వివరాలు అందించిన వారికి 20 మిలియన్ డాలర్లు (రూ.188 కోట్లకుపైగా) రివార్డుగా ఇస్తామని వెల్లడించింది. అంతేకాకుండా వారికి పునరావాసం కల్పిస్తామని తెలిపింది.
ఇరాన్‌లోని అణు కేంద్రాలు, అక్కడ ఉపయోగించే పరికరాలు, పనిచేసే సిబ్బంది, శాస్త్రవేత్తలకు సంబంధించిన సమాచారం అందించినవారికి అమెరికా విదేశాంగ శాఖకు చెందిన 'రివార్డ్స్ ఫర్ జస్టిస్' (Rewards for Justice) కార్యక్రమం కింద ఈ ఆఫర్ ప్రకటించింది.
వివరాలు
ఇరాన్‌పై అమెరికా దాడులు
ఇదిలా ఉండగా, శుక్రవారం ఇరాన్‌పై అమెరికా పరిమిత స్థాయిలో సైనిక దాడులు నిర్వహించింది.
కొన్ని నిమిషాల పాటు ఇరాన్ వైమానిక రక్షణ వ్యవస్థలను లక్ష్యంగా చేసుకుని దాడులు చేసినట్లు ట్రంప్ వెల్లడించారు. మరోవైపు, ఖేష్మ్ ద్వీపంలో పేలుడు శబ్దాలు వినిపించినట్లు టెహ్రాన్ మీడియా పేర్కొంది.
అమెరికా మధ్యంతర ఎన్నికల ఫలితాల్లో ట్రంప్‌కు ఎదురుదెబ్బ తగిలిన తర్వాత ఇరాన్‌పై జరిగిన తొలి దాడులు ఇవేనని కథనం పేర్కొంది.
దీంతో ఇరాన్‌పై అమెరికా తదుపరి చర్యలు ఎలా ఉండబోతున్నాయనే ఉత్కంఠ నెలకొంది.