Srilanka: వృద్ధుల సంరక్షణ కేంద్రం ఘోర అగ్నిప్రమాదం.. 12 మంది మృతి
ఈ వార్తాకథనం ఏంటి
శ్రీలంకలోని వాణిజ్య రాజధాని కొలంబోకు సుమారు 65 కిలోమీటర్ల దూరంలో ఉన్న అంగురువాథోటు పట్టణంలో విషాదకర ఘటన చోటుచేసుకుంది. అక్కడ ప్రైవేటుగా నిర్వహిస్తున్న వృద్ధుల సంరక్షణ కేంద్రంలో బుధవారం సాయంత్రం భారీ అగ్నిప్రమాదం సంభవించి 12 మంది ప్రాణాలు కోల్పోయినట్లు పోలీసులు గురువారం వెల్లడించారు. ప్రమాదం జరిగిన వెంటనే 10 మంది అక్కడికక్కడే మృతిచెందగా, తీవ్రంగా గాయపడిన మరో ఇద్దరు ఆసుపత్రిలో చికిత్స పొందుతూ కన్నుమూశారు. మరో ఏడుగురు గాయాలతో చికిత్స పొందుతున్నారు.
వివరాలు
సంరక్షణ కేంద్రంలో 70 మందికి పైగా వృద్ధులు
ప్రాథమిక సమాచారం ప్రకారం గ్యాస్ సిలిండర్ పేలడంతో మంటలు చెలరేగి వేగంగా వ్యాపించినట్లు అధికారులు భావిస్తున్నారు. ప్రమాదం సంభవించిన సమయంలో సంరక్షణ కేంద్రంలో 70 మందికి పైగా వృద్ధులు ఉన్నారు. వారిలో 51 మందిని సురక్షితంగా బయటకు తీసుకువచ్చిన అధికారులు, సమీపంలోని ఓ పాఠశాలలో తాత్కాలిక వసతి ఏర్పాటు చేశారు. ఘటనపై దర్యాప్తు ప్రారంభించిన పోలీసులు, ప్రమాదం అనంతరం సంరక్షణ కేంద్ర యజమానిని అరెస్టు చేశారు.