Senior citizens outnumber children: మానవ చరిత్రలో తొలిసారి.. పిల్లల కంటే వృద్ధులే ఎక్కువ!
ఈ వార్తాకథనం ఏంటి
ప్రపంచ జనాభా నిర్మాణంలో కీలక మార్పు చోటుచేసుకుంటోంది. మానవ చరిత్రలో తొలిసారిగా 65 ఏళ్లు, అంతకంటే ఎక్కువ వయసున్న వారి సంఖ్య.. ఐదేళ్లలోపు చిన్నారుల సంఖ్యను అధిగమించింది. అమెరికా సెన్సస్ బ్యూరో తాజాగా విడుదల చేసిన నివేదికలో ఈ విషయం వెల్లడైంది. నివేదిక ప్రకారం.. 2025 నాటికి ప్రపంచ జనాభాలో 65 ఏళ్లు, అంతకంటే ఎక్కువ వయసున్న వారు 10.5 శాతానికి చేరుకున్నారు. అంతకుముందు ఐదేళ్ల కాలంలో ఏదో ఒక దశలో శిశువులు, పసిపిల్లలు, ప్రీస్కూల్ పిల్లల కంటే వృద్ధుల శాతం అధికమైంది. జనాభా శాస్త్రవేత్తలు గతంలో అంచనా వేసిన దానికంటే ఈ కీలక మలుపు చాలా ముందుగానే రావడం గమనార్హం.
వివరాలు
అమెరికా పరిస్థితి ఇదీ..
ప్రపంచవ్యాప్తంగా జననాల రేట్లు భారీగా తగ్గిపోవడం, అదే సమయంలో మనుషుల సగటు ఆయుర్దాయం పెరగడం ఇందుకు ప్రధాన కారణాలుగా ఉన్నాయి.
ప్రస్తుతం ప్రపంచంలోని అత్యంత వృద్ధ జనాభా కలిగిన దేశాల జాబితాలో అమెరికా 48వ స్థానంలో ఉంది. ఆ దేశ జనాభాలో 18.9 శాతం మంది 65 ఏళ్లు, అంతకంటే ఎక్కువ వయసున్న వారే. ఈ సంఖ్య 2060 నాటికి 23.4 శాతానికి చేరుతుందని అంచనా.
అయితే ఇతర దేశాల్లో వృద్ధుల జనాభా మరింత వేగంగా పెరగనుండటంతో.. అదే సమయానికి వృద్ధ జనాభా పరంగా అమెరికా ర్యాంకు 110వ స్థానానికి పడిపోతుందని నివేదిక అంచనా వేసింది.
వివరాలు
71 శాతం జనాభా.. తక్కువ జననాలున్న దేశాల్లోనే
ప్రస్తుతం ప్రపంచ జనాభాలో దాదాపు 71 శాతం మంది.. ఒక మహిళకు సగటున 2.1 మంది పిల్లలు జన్మించే రీప్లేస్మెంట్ స్థాయి లేదా అంతకంటే తక్కువ జననాల రేటు ఉన్న దేశాల్లో నివసిస్తున్నారు.
2013లో ఈ వాటా 43 శాతంగా మాత్రమే ఉండేది. దీంతో జనాభా వృద్ధాప్యం కేవలం సంపన్న దేశాలకే పరిమితం కావడం లేదని స్పష్టమవుతోంది.
ప్రపంచంలో అత్యధిక జనాభా కలిగిన దేశాల్లో చైనా, భారత్, బంగ్లాదేశ్, మెక్సికో, వియత్నాం ఉన్నాయి. ఈ ఐదు దేశాల్లోనూ జననాల రేటు రీప్లేస్మెంట్ స్థాయి కంటే తక్కువగా ఉంది.
వివరాలు
2060 నాటికి 200 కోట్లకు వృద్ధుల సంఖ్య
అదే సమయంలో ఆయుర్దాయం పెరగడం, కోట్లాది మంది పేదరికం నుంచి బయటపడటం వంటి కారణాలతో 65 ఏళ్లు, అంతకంటే ఎక్కువ వయసున్న వారి సంఖ్య భారీగా పెరిగింది.
2025లో ప్రపంచవ్యాప్తంగా 65 ఏళ్లు పైబడిన వారి సంఖ్య 85.2 కోట్లుగా ఉంది. ఇది 2060 నాటికి 200 కోట్లకు చేరుతుందని అంచనా.
అంటే 2025-2060 మధ్య ప్రపంచ జనాభాలో జరిగే మొత్తం నికర పెరుగుదలలో ఏకంగా 55 శాతం వృద్ధుల జనాభా నుంచే ఉండనుంది.
ప్రపంచ మొత్తం జనాభా 2025లో 813 కోట్ల నుంచి 2060 నాటికి 1,023 కోట్లకు పెరుగుతుందని అంచనా.
అదే సమయంలో భూమిపై ప్రతి ఐదుగురిలో ఒకరు 65 ఏళ్లు లేదా అంతకంటే ఎక్కువ వయసున్న వారిగా ఉండనున్నారు.
వివరాలు
సంక్షేమ వ్యవస్థలపై పెరగనున్న భారం
వృద్ధుల సంఖ్య ఇంత భారీగా పెరగడం వల్ల ప్రపంచంలోని అనేక దేశాల సంక్షేమ వ్యవస్థలపై తీవ్ర ఒత్తిడి ఏర్పడే అవకాశం ఉందని నిపుణులు భావిస్తున్నారు.
పనిచేసే వయసులో ఉన్న జనాభా క్రమంగా తగ్గిపోతుండగా.. పదవీ విరమణ చేసిన వారి సంఖ్య పెరుగుతోంది.
దీంతో తక్కువ సంఖ్యలో ఉన్న ఉద్యోగులు, కార్మికులు ఎక్కువ మంది రిటైర్లకు మద్దతు ఇవ్వాల్సిన పరిస్థితి ఏర్పడనుంది.
ఇప్పటివరకు ఈ సమస్య ప్రధానంగా ఉత్తర అమెరికా, యూరప్ దేశాలకు సంబంధించినదిగా భావించారు.
అయితే అభివృద్ధి చెందుతున్న దేశాల్లో జనాభా మార్పులు మరింత తీవ్రంగా ఉండనున్నాయని అంచనాలు చెబుతున్నాయి.
వివరాలు
ఆఫ్రికాలో నాలుగు రెట్లకు పైగా వృద్ధుల పెరుగుదల
2025 నుంచి 2060 మధ్య ప్రపంచవ్యాప్తంగా 65 ఏళ్లు, అంతకంటే ఎక్కువ వయసున్న జనాభా 134.7 శాతం పెరగనుంది.
ప్రస్తుతం ప్రపంచంలోనే అత్యంత యువ జనాభా కలిగిన ఖండంగా ఉన్న ఆఫ్రికాలో వృద్ధుల సంఖ్య ఏకంగా నాలుగు రెట్లకు పైగా పెరగనుంది.
2025లో అక్కడ 6 కోట్లుగా ఉన్న 65 ఏళ్లు పైబడిన వారి సంఖ్య.. 2060 నాటికి 24.9 కోట్లకు చేరుతుందని అంచనా. దీంతో ఆఫ్రికాలోని వృద్ధుల జనాభా 315 శాతం పెరగనుంది.
వివరాలు
65 ఏళ్లు పైబడిన వారి జనాభా 158 శాతం పెరగనుంది
2060 నాటికి ఇది యూరప్లోని 21.4 కోట్ల వృద్ధుల జనాభాను కూడా అధిగమించనుంది. లాటిన్ అమెరికా, కరేబియన్ ప్రాంతాల్లో 65 ఏళ్లు పైబడిన వారి జనాభా 158 శాతం పెరగనుంది.
ఇక సంఖ్యాపరంగా అత్యధిక పెరుగుదల ఆసియాలోనే కనిపించనుంది.
2025లో ఆసియాలో 48.7 కోట్లుగా ఉన్న 65 ఏళ్లు పైబడిన వారి సంఖ్య.. 2060 నాటికి 124 కోట్లకు చేరుతుందని అంచనా వేస్తున్నారు.