Pakistan: పాకిస్థాన్లో గ్యాస్ కష్టాలు.. బెలూన్లలో స్టోరేజీ
ఈ వార్తాకథనం ఏంటి
ఇరాన్ యుద్ధ ప్రభావం ప్రపంచంలోని పలు దేశాలపై తీవ్రంగా కనిపిస్తోంది. ఈ ప్రభావంతో కొన్ని దేశాల్లో వంటగ్యాస్, పెట్రోలు, డీజిల్ సరఫరాలు దెబ్బతిన్నాయి. ముఖ్యంగా దాయాది దేశం పాకిస్థాన్లో వంటగ్యాస్ కొరత తీవ్ర స్థాయికి చేరుకుంది. సరఫరా లోపంతో కరాచీ నగర ప్రజలు తీవ్ర ఇబ్బందులు పడుతున్నారు. ముఖ్యంగా మోమినాబాద్ ప్రాంతంలో గ్యాస్ అందుబాటు లేక ప్రజలు ప్రమాదకర మార్గాలను ఆశ్రయిస్తున్న పరిస్థితి కనిపిస్తోంది. పైపుల ద్వారా కొద్దిసేపు గ్యాస్ సరఫరా అందిన వెంటనే, ప్రత్యేకంగా తయారు చేసిన ప్లాస్టిక్ బెలూన్లలో దాన్ని నింపుకుంటున్నారు.
వివరాలు
'మొబైల్ బాంబులు'గా నిల్వ చేసిన గ్యాస్
కరాచీ మార్కెట్లలో ఈ బెలూన్లు వెయ్యి నుంచి వెయ్యి ఐదు వందల రూపాయల వరకు అమ్ముడవుతున్నాయి. గ్యాస్ సరఫరా నిరంతరం లేకపోవడంతో, ఇలా నిల్వ చేసుకోవడం తప్ప తమకు మరో మార్గం లేదని స్థానికులు ఆవేదన వ్యక్తం చేస్తున్నారు. అయితే ఈ విధానం అత్యంత ప్రమాదకరమని నిపుణులు హెచ్చరిస్తున్నారు. బెలూన్లలో నిల్వ చేసిన గ్యాస్ను 'మొబైల్ బాంబులు'గా వారు అభివర్ణిస్తున్నారు. స్వల్ప అజాగ్రత్త జరిగినా పెద్ద ప్రమాదం సంభవించే అవకాశముందని చెబుతున్నారు. చిన్న మంట తగిలినా, రాపిడి లేదా పీడనంలో మార్పులు వచ్చినా అవి పేలిపోవచ్చని ఆందోళన వ్యక్తం చేస్తున్నారు. కాబట్టి గ్యాస్ సరఫరాలో అంతరాయం లేకుండా తక్షణ చర్యలు తీసుకోవాలని స్థానికులు అధికారులను కోరుతున్నారు.