Hormuz: హర్మూజ్ జలసంధిలో సీమైన్ను ఢీకొని పేలిన చమురు ట్యాంకర్.. అమెరికాతో చర్చలకు ఇరాన్ మూడు షరతులు
ఈ వార్తాకథనం ఏంటి
పశ్చిమాసియాలో ఉద్రిక్త పరిస్థితులు ఇంకా కొనసాగుతూనే ఉన్నాయి. గత రెండు వారాలుగా అమెరికా-ఇరాన్ మధ్య నెలకొన్న ఉద్రిక్తతలకు తాత్కాలిక విరామం లభించడంతో అంతర్జాతీయ మార్కెట్లో ముడి చమురు ధరలు కొంత మేర తగ్గాయి. అయితే హర్మూజ్ జలసంధిలో చోటుచేసుకున్న తాజా ఘటనతో పరిస్థితి పూర్తిగా సాధారణ స్థితికి చేరలేదనే సంకేతాలు కనిపిస్తున్నాయి. హర్మూజ్ జలసంధిలో సీమైన్ను ఢీకొన్న ఓ చమురు ట్యాంకర్ భారీ పేలుడుకు గురైంది. ఇరాన్ సూచించిన అధికారిక జలమార్గాన్ని అనుసరించకుండా ప్రత్యామ్నాయ మార్గంలో ప్రయాణిస్తున్న సమయంలో ఈ ప్రమాదం జరిగినట్లు ఆ దేశ అధికారిక వార్తా సంస్థ తస్నిమ్ వెల్లడించింది. అయితే ఈ ఘటనలో ప్రాణనష్టం జరిగిందా లేదా అనే విషయంపై ఇప్పటివరకు ఎలాంటి అధికారిక సమాచారం వెలువడలేదు.
వివరాలు
చర్చలు పునఃప్రారంభించాలంటే మూడు కీలక షరతులు
ఇదిలా ఉండగా, తాజా ఉద్రిక్తతల నేపథ్యంలో చర్చలకు అవకాశం కల్పించే ఉద్దేశంతో అమెరికా, ఇరాన్ తాత్కాలికంగా ఘర్షణలను నిలిపివేశాయి.
అయినప్పటికీ హర్మూజ్ జలసంధిలో కొత్త లేదా ప్రత్యామ్నాయ నౌకా మార్గాల ఏర్పాటుకు సంబంధించిన ప్రతిపాదనలను ఇరాన్ స్పష్టంగా తిరస్కరించింది.
చర్చలు పునఃప్రారంభించాలంటే మూడు కీలక షరతులను అంగీకరించాలని టెహ్రాన్ స్పష్టం చేసింది.
మొదటగా, హర్మూజ్ జలసంధిపై పూర్తి నియంత్రణ తమదేనని అధికారికంగా గుర్తించాల్సి ఉంటుందని పేర్కొంది.
రెండోగా, గతంలో నిలిపివేసిన ఇరాన్ నిధులను విడుదల చేయాలని డిమాండ్ చేసింది.
ఈ రెండు అంశాలు పరిష్కారమైన తర్వాతే అణు కార్యక్రమానికి సంబంధించిన అంశాలపై చర్చలు కొనసాగిస్తామని స్పష్టం చేసింది.
వివరాలు
రుసుముల అంశంపై ఇరాన్, ఒమన్ దేశాలు చర్చలు
మరోవైపు, హర్మూజ్ జలసంధిలో వసూలు చేసే రుసుముల అంశంపై ఇరాన్, ఒమన్ దేశాలు ప్రత్యేకంగా చర్చలు కొనసాగిస్తున్నాయి.
తమ సార్వభౌమాధికారానికి ఎలాంటి భంగం కలగకుండా, అంతర్జాతీయ వాణిజ్య నౌకల రాకపోకలకు ఆటంకం ఏర్పడకుండా తీసుకోవాల్సిన చర్యలపై ఇరు దేశాల ప్రతినిధులు అభిప్రాయాలు పంచుకున్నారు.