Indian Woman: అమెరికాలో తెలుగు యువతి దారుణ హత్య.. మాజీ ప్రియుడి నివాసంలో మృతదేహం లభ్యం
ఈ వార్తాకథనం ఏంటి
అమెరికాలోని మేరీల్యాండ్ రాష్ట్రంలో తెలుగు యువతి నిఖితా రావు గొడిశాల (27) దారుణంగా హత్యకు గురయిన ఘటన చోటుచేసుకుంది. హోవర్డ్ కౌంటీ, ఎలికాట్ సిటీకి చెందిన తన మాజీ ప్రియుడు అర్జున్ శర్మ నివాసంలోనే ఆమె మృతదేహం కనుగొన్నారు. కత్తిపోట్లతో అతని అపార్ట్మెంట్లో విగతజీవిగా పడి ఉండగా పోలీసులు కనుగొన్నారు. మృతికి ముందు నిఖితా కనిపించకపోవడంతో, ఆమె మాజీ బాయ్ఫ్రెండ్ అర్జున్ శర్మ జనవరి 2న స్థానిక పోలీస్ స్టేషన్లో ఫిర్యాదు చేసాడు. చివరిసారిగా డిసెంబర్ 31 సాయంత్రం తన అపార్ట్మెంట్లోనే ఆమెను చూశానని అతను తెలిపాడు. ఈ ఫిర్యాదుపై పోలీసులు సెర్చ్ వారెంట్ జారీ చేసి, జనవరి 3న అర్జున్ నివాసంలో సోదాలు నిర్వహించారు.
వివరాలు
జనవరి 2వ తేదీ సాయంత్రమే భారత్కు..
అప్పుడే కత్తిపోట్ల గాయాలతో నిఖితా మృతదేహం గుర్తించారు. డిసెంబర్ 31 సాయంత్రం 7 గంటల తర్వాత నిఖితను అర్జున్ చంపేసి ఉండొచ్చని పోలీసులు అనుమానిస్తున్నారు. ఈ నేపథ్యంలో అర్జున్ కోసం ఆరా తీయగా.. జనవరి 2వ తేదీ సాయంత్రమే భారత్కు వెళ్లిపోయినట్లు గుర్తించారు. ఈ నేపథ్యంలో అతడే నిఖితను హత్య చేసి దేశం విడిచి పారిపోయినట్లు పోలీసులు భావిస్తున్నారు. హోవర్డ్ కౌంటీ పోలీసులు అతడిపై ఫస్ట్ డిగ్రీ, సెకండ్ డిగ్రీ మర్డర్ కేసుల కింద అరెస్టు వారెంట్ జారీ చేసినట్లు తెలిపారు. ఫెడరల్ లా ఎన్ఫోర్స్మెంట్ ఏజెన్సీలు అర్జున్ను గుర్తించడానికి సాయం అందిస్తున్నాయి. నిఖిత హత్యకు ప్రధాన కారణాలు ఇంకా తెలియాల్సి ఉందని, దర్యాప్తు కొనసాగుతోందని అధికారులు పేర్కొన్నారు.
వివరాలు
నిఖిత కుటుంబ మూలాలు సికింద్రాబాద్లో..
ఈ ఘటనపై భారత దౌత్య కార్యాలయం స్పందిస్తూ, నిఖిత కుటుంబ సభ్యులతో సంప్రదింపులు కొనసాగుతున్నాయని, అవసరమైన అన్ని దౌత్య సహాయాలను అందిస్తామని తెలిపింది. అలాగే, స్థానిక అధికారులతో కూడా నిరంతర ఫాలోఅప్లో ఉన్నట్లు వెల్లడించింది. నిఖిత కుటుంబ మూలాలు సికింద్రాబాద్లో ఉన్నాయని, కానీ ఆమె భారత్లో ఏప్రాంతానికి చెందిన యువతి అన్నది మాత్రం కచ్చితంగా అధికారులు ప్రకటించలేదు.