Sea Mines: దాడి చేస్తే.. పర్షియన్ గల్ఫ్లో సీమైన్స్.. ఇరాన్ స్ట్రాంగ్ వార్నింగ్..
ఈ వార్తాకథనం ఏంటి
ఇరాన్పై అమెరికా భూదాడులు జరగొచ్చనే సంకేతాలు వెలువడుతున్న నేపథ్యంలో పరిస్థితి మరింత ఉద్రిక్తంగా మారుతోంది. ముఖ్యంగా ఖర్గ్ ద్వీపాన్ని స్వాధీనంలోకి తీసుకునే ప్రయత్నాలు జరుగుతున్నాయనే వార్తలు వినిపిస్తున్నాయి. ఈ పరిణామాలపై ఇరాన్ తీవ్ర హెచ్చరికలు జారీ చేసింది.
వివరాలు
'దాడి చేస్తే సముద్రాన్ని మైన్స్తో నింపేస్తాం'
తమ దేశ తీర ప్రాంతాలు లేదా ద్వీపాలపై ఎలాంటి దాడి జరిగినా తీవ్ర పరిణామాలు ఉంటాయని ఇరాన్ స్పష్టం చేసింది. పర్షియన్ గల్ఫ్ అంతటా సీమైన్స్ (Sea Mines) పరుస్తామని ఇరాన్ డిఫెన్స్ కౌన్సిల్ హెచ్చరించింది. ఈ సమాచారం రాయిటర్స్ కథనంలో వెల్లడైంది. ఇరాన్ తెలిపిన ప్రకారం, తమ తీర ప్రాంతాల నుంచే ఈ మైన్స్ను సముద్రంలో ప్రవేశపెట్టే సామర్థ్యం తమకు ఉంది. దీనివల్ల గల్ఫ్ ప్రాంతంలో షిప్పింగ్ మార్గాలు, కమ్యూనికేషన్ లైన్లు పూర్తిగా దెబ్బతినే ప్రమాదం ఉందని పేర్కొంది. ఇలాంటి చర్యలతో గల్ఫ్ ప్రాంతం మొత్తం హర్మూజ్ జలసంధిలో ఉండే ఉద్రిక్త పరిస్థితుల్లానే మారిపోతుందని ఇరాన్ హెచ్చరించింది.
వివరాలు
ఖర్గ్ ఐలాండ్పై అమెరికా దృష్టి?
1980లలో స్వల్ప సంఖ్యలో వదిలిన సీమైన్స్ను తొలగించేందుకు 100 మైన్ స్వీపర్లు ప్రయత్నించినా విఫలమైన విషయాన్ని కూడా గుర్తుచేసింది. ఇరాన్ చమురు ఎగుమతుల్లో ఖర్గ్ ద్వీపం కీలక పాత్ర పోషిస్తోంది. హర్మూజ్ జలసంధిని తెరవాలనే ఒత్తిడి కోసం అమెరికా ఈ ద్వీపాన్ని స్వాధీనంలోకి తీసుకునే యోచనలో ఉందనే వార్తలు వస్తున్నాయి. ఈ నేపథ్యంలో అమెరికా సైనిక మోహరింపులు పెంచింది. సుమారు 4,500 మంది సెయిలర్లు, మెరైన్లను పంపినట్లు సమాచారం. అదనంగా హెలికాప్టర్లు, ఎఫ్-35 ఫైటర్ జెట్స్, సాయుధ ల్యాండింగ్ వాహనాలతో కూడిన బెటాలియన్ను కూడా మోహరించింది. అయితే ఈ భారీ మోహరింపు హర్మూజ్ జలసంధిని తెరవడానికా లేదా ఖర్గ్ ద్వీపాన్ని స్వాధీనంలోకి తీసుకోవడానికా అన్న విషయంపై ఇంకా స్పష్టత రాలేదు.