Iran: అమెరికా,ఇజ్రాయెల్ మరోసారి దాడులు చేస్తే.. గల్ఫ్‌లో చమురు, ఏఐ కేంద్రాలపై దాడులు చేస్తాం: ఇరాన్
ఈ వార్తాకథనం ఏంటి
అమెరికా, ఇజ్రాయెల్ మరోసారి తమపై దాడులకు దిగితే గల్ఫ్ ప్రాంతంలోని చమురు కేంద్రాలు, సముద్రగర్భ కేబుళ్లు, డేటా సెంటర్లు, కృత్రిమ మేధ (ఏఐ) కేంద్రాలను లక్ష్యంగా చేసుకుంటామని ఇరాన్ హెచ్చరించింది. గల్ఫ్‌లోని ఏడు దేశాల వరకు దాడులు విస్తరించే అవకాశముందని ఇరాన్ సుప్రీం నేషనల్ సెక్యూరిటీ కౌన్సిల్ కార్యదర్శి మొహ్సెన్ రెజాయీ ప్రకటించినట్లు ఇరాన్ మీడియా వెల్లడించింది. తమ ఆర్థిక వ్యవస్థను దెబ్బతీసే దాడులు జరిగితే,వాటికి సహకరించే వ్యవస్థలను కూడా వదిలిపెట్టబోమని ఆయన స్పష్టం చేశారు. అమెరికా అధ్యక్షుడు డొనాల్డ్ ట్రంప్,ఇజ్రాయెల్ ప్రధాని బెంజమిన్ నెతన్యాహు మరోసారి దాడులకు సూత్రప్రాయంగా అంగీకరించారని ఇరాన్ చర్చల బృందానికి సలహాదారుగా వ్యవహరించిన మెహ్దీ మొహమ్మదీ ఆరోపించారు.
వివరాలు
మరోసారి సైనిక చర్య చేపట్టవచ్చనే ఆందోళనలు
తదుపరి యుద్ధాన్ని ఇరాన్ ఉనికికే ముప్పుగా చూస్తున్నామని, అది గతంలో కంటే ఎక్కువ కాలం, విస్తృత భౌగోళిక ప్రాంతంలో కొనసాగే అవకాశం ఉందని హెచ్చరించారు.
అమెరికా, ఇజ్రాయెల్ సంయుక్తంగా ఇరాన్‌పై కొత్త దాడులకు ప్రణాళికలు సిద్ధం చేసినట్లు అమెరికా మీడియా కథనాలు వెల్లడిస్తున్నాయి.
నవంబర్ 3న జరిగే అమెరికా మధ్యంతర ఎన్నికల తర్వాత క్షిపణి స్థావరాలు, చమురు కేంద్రాలు, అణు కేంద్రాలను లక్ష్యంగా చేసుకునే అవకాశం ఉందని సమాచారం.
అయితే ట్రంప్ గత నాలుగు నెలల్లో ఏడుసార్లు ఇరాన్‌పై దాడుల ఆలోచన నుంచి వెనక్కి తగ్గినట్లు కథనాలు పేర్కొన్నాయి.
దౌత్య చర్చల్లో ప్రతిష్ఠంభన కొనసాగుతుండటంతో మరోసారి సైనిక చర్య చేపట్టవచ్చనే ఆందోళనలు పెరుగుతున్నాయి.
వివరాలు
హోర్ముజ్‌లో ఉద్రిక్తతలు.. చమురు ధరల పెరుగుదల, కాల్పుల విరమణకు దౌత్య ప్రయత్నాలు
ఇదిలా ఉండగా, హర్ముజ్ జలసంధి గుండా ప్రయాణించేందుకు ప్రయత్నించిన నాలుగు వాణిజ్య నౌకలపై తమ నౌకాదళం దాడి చేసిందని ఇరాన్ రివల్యూషనరీ గార్డ్స్ ప్రకటించింది.
మరో మూడు నౌకలు మందుపాతరలను తాకాయని తెలిపింది. అయితే ఈ వివరాలకు స్వతంత్ర ధ్రువీకరణ లేదు.
తాజా ఉద్రిక్తతల నేపథ్యంలో బ్రెంట్ క్రూడ్ చమురు ధర బ్యారెల్‌కు 113.4 డాలర్లకు చేరింది.
వివరాలు
హోర్ముజ్‌లో ఉద్రిక్తతలు.. చమురు ధరల పెరుగుదల, కాల్పుల విరమణకు దౌత్య ప్రయత్నాలు
మరోవైపు, ఇరాన్, యెమెన్, పాలస్తీనా సంక్షోభాలపై చర్చించేందుకు యూరప్‌లోని మూడు దేశాలతో పాటు టర్కీ, సౌదీ అరేబియా, పాకిస్థాన్, ఈజిప్ట్ విదేశాంగ మంత్రులు ఇస్తాంబుల్‌లో సమావేశం కానున్నారు.
హోర్ముజ్ జలసంధి దిగ్బంధనాన్ని ఎత్తివేయడం, నిలిపివేసిన ఇరాన్ నిధులను విడుదల చేయడం, అణు కార్యక్రమంపై చర్చలు జరపడం వంటి అంశాలపై కాల్పుల విరమణ మధ్యవర్తులు ప్రతిపాదనలు పరిశీలిస్తున్నారు.
అయితే అమెరికా ఆంక్షలు ఎత్తివేస్తేనే దిగ్బంధనాన్ని తొలగించి అణు చర్చలు ప్రారంభిస్తామని ఇరాన్ షరతు విధించింది.