Iran War Impacts: ఇరాన్ యుద్ధ ప్రభావం.. కండోమ్లకుపెరిగిన డిమాండ్.. 20-30% ధరలు పెరిగే అవకాశం
ఈ వార్తాకథనం ఏంటి
ఇరాన్ యుద్ధం ప్రపంచవ్యాప్తంగా కండోమ్ సరఫరాపై తీవ్ర ప్రభావం చూపుతోంది. ప్రపంచంలోనే అతిపెద్ద కండోమ్ తయారీ సంస్థ కారెక్స్ బెర్హాద్(Karex Berhad)ధరలను 20-30 శాతం వరకు పెంచే యోచనలో ఉంది. డ్యూరెక్స్, ట్రోజన్(Durex, Trojan)వంటి ప్రముఖ బ్రాండ్లకు సంవత్సరానికి ఐదు బిలియన్లకు పైగా కండోమ్స్ తయారు చేసే ఈ కంపెనీకి ముడి సరుకుల ఖర్చులు పెరగడం పెద్ద సవాల్గా మారింది. ముఖ్యంగా సిలికాన్ ఆయిల్, సింథటిక్ రబ్బర్ వంటి పదార్థాల సరఫరా హార్ముజ్ జలసంధి నిర్బంధం కారణంగా ప్రభావితమైంది. ఇదే సమయంలో రవాణా ఖర్చులు భారీగా పెరిగి, సరుకు రవాణా ఆలస్యమవుతోంది. సాధారణంగా 30 రోజుల్లో చేరాల్సిన సరుకు ఇప్పుడు 60 రోజులకు పైగా పడుతోంది.
వివరాలు
ఈ ఏడాది 30 శాతం పెరిగిన కండోమ్ల డిమాండ్
దీంతో యూరప్, ఉత్తర అమెరికా ప్రాంతాల్లో స్టాక్ కొరత కనిపిస్తోంది. "గమ్యానికి చేరక ముందే నౌకల్లోనే నిలిచిపోయిన సరుకు ఎక్కువగా ఉంది" అని కంపెనీ సీఈఓ గో మియా కియాట్(Goh Miah Kiat)తెలిపారు. పరిస్థితి చాలా సున్నితంగా ఉందని, పెరిగిన ఖర్చులను వినియోగదారులపై మోపక తప్పదని చెప్పారు. కండోమ్లు లగ్జరీ కాదు, అవసరమైన వైద్య ఉత్పత్తి అని ఆయన స్పష్టం చేశారు. అయితే ధరలు పెరగడం, సరఫరా తగ్గడం వల్ల అనుకోని గర్భధారణలు, లైంగిక వ్యాధులు పెరిగే ప్రమాదం ఉందని నిపుణులు హెచ్చరిస్తున్నారు. ఈ ఏడాది కండోమ్ల డిమాండ్ సుమారు 30 శాతం పెరిగినట్లు కంపెనీ తెలిపింది. అనిశ్చిత పరిస్థితుల్లో ప్రజలు కుటుంబ విస్తరణపై జాగ్రత్త పడుతున్నారని పేర్కొన్నారు.
వివరాలు
రబ్బర్ ఆధారిత ఆరోగ్య ఉత్పత్తుల్లో ప్రపంచవ్యాప్తంగా కొరత ఏర్పడే ప్రమాదం
ఇదే సమస్య ఇతర వైద్య ఉత్పత్తులపైనా ప్రభావం చూపుతోంది. మెడికల్ గ్లౌజ్ ధరలు దాదాపు 40 శాతం పెరిగాయి. మలేషియా, సింగపూర్ దేశాల్లో ఆసుపత్రులు సరఫరాను పరిమితం చేస్తున్నాయి. సముద్ర మార్గాలు త్వరగా తెరుచుకోకపోతే రబ్బర్ ఆధారిత ఆరోగ్య ఉత్పత్తుల్లో ప్రపంచవ్యాప్తంగా కొరత ఏర్పడే ప్రమాదం ఉందని విశ్లేషకులు హెచ్చరిస్తున్నారు.