Khamenei: ట్రంప్ ఒత్తిడితోనే అమెరికా-ఇరాన్ ఒప్పందం: ఖమేనీ కీలక వ్యాఖ్యలు
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ తీవ్ర నిరాశాజనక పరిస్థితుల్లో ఉండటంతోనే ఇరాన్తో శాంతి ఒప్పందం కోసం అన్ని విధాలుగా ఒత్తిడి తెచ్చారని ఇరాన్ సుప్రీం లీడర్ మొజ్తాబా ఖమేనీ పేర్కొన్నారు. ఈ ఒప్పందం కుదరడంలో అమెరికా వైపే ఎక్కువ ఆసక్తి కనిపించిందని, ఇరాన్కు మాత్రం ప్రత్యేక ఉత్సాహం లేదని స్పష్టం చేశారు. అమెరికాతో ఒప్పందం కోసం ఇరాన్ ప్రతినిధులు నిబద్ధతతో కృషి చేశారని ఖమేనీ వెల్లడించారు. ఈ ఒప్పందంపై తనకు వ్యక్తిగతంగా కొన్ని సందేహాలు, భిన్నాభిప్రాయాలు ఉన్నప్పటికీ దేశ ప్రయోజనాల దృష్ట్యా దానికి అనుమతి ఇచ్చినట్లు తెలిపారు. అమెరికాతో ఇరాన్ ఒప్పందంపై సంతకం చేసిన విషయాన్ని కూడా ఆయన ధ్రువీకరించారు.
వివరాలు
దేశ ప్రయోజనాలకు భంగం కలిగించే చర్యలు సహించం: ఖమేనీ
"సూత్రప్రాయంగా చూస్తే ఈ ఒప్పందంపై నాకు పూర్తిగా అనుకూల అభిప్రాయం లేదు. అయినప్పటికీ ఇరాన్ హక్కులు, జాతీయ ప్రయోజనాలను కాపాడేందుకు అధ్యక్షుడు పెజెష్కియాన్ చేస్తున్న ప్రయత్నాలకు మద్దతుగా నిలిచి ఆమోదం తెలిపాను" అని ఖమేనీ పేర్కొన్నారు. అయితే, ఒప్పందంలో ఉన్న నిబంధనలకు మించి అమెరికా అదనపు డిమాండ్లు చేస్తే వాటిని ఇరాన్ ఎట్టి పరిస్థితుల్లోనూ అంగీకరించదని ఆయన స్పష్టం చేశారు. తమ దేశ ప్రయోజనాలకు భంగం కలిగించే చర్యలను సహించబోమని హెచ్చరించారు. ఇదిలా ఉండగా, అమెరికాతో నేరుగా చర్చలు జరిపేందుకు తాను ఆమోదం తెలిపిన విషయాన్ని కూడా ఖమేనీ వెల్లడించారు. అయితే ఆ చర్చలు ఇరాన్ హక్కులు, సార్వభౌమాధికారాన్ని కాపాడే విధంగానే కొనసాగుతాయని స్పష్టం చేశారు.