Israel Hamas war: గాజాలోకి ప్రవేశించిన ఇజ్రాయెల్ దాళాలు.. హమాస్ మిలిటెంట్ల కోసం వేట షురూ
ఈ వార్తాకథనం ఏంటి
హమాస్ మిలిటెంట్లను తుద ముట్టించడమే లక్ష్యంగా ఇజ్రాయెల్ సైన్యం గాజాలోకి ప్రవేశించింది. ఈ క్రమంలో తమ సైన్యం గాజా స్ట్రిప్ లోపల చిన్న చిన్న దాడులు నిర్వహించినట్లు ఇజ్రాయెల్ సైన్యం తెలిపింది.
ఈ సందర్భంగా దేశ ప్రజలను ఉద్దేశించించి ఇజ్రాయెల్ ప్రధాన మంత్రి బెంజమిన్ నెతన్యాహు మాట్లాడారు.
తమ దేశం ఇప్పుడే ప్రతీకారం తీర్చుకోవడం ప్రారంభించిందని అన్నారు. తమ బలగాలు సింహాల్లా పోరాడుతున్నాయన్నారు.
భావిష్యత్‌లో ఏం జరుగుతుందో చెప్పలేనన్నారు. శత్రువులు చేసిన దురాగతాలను ఎప్పటికీ మరచిపోమన్నారు. వారిని ఎప్పటికీ క్షమించేదిలేదన్నారు.
అక్టోబర్ 7న హమాస్-ఇజ్రాయెల్ మధ్య యుద్ధం ప్రారంభమైనప్పటి నుంచి ఇజ్రాయెల్ ప్రజలు 1,300 మందికి పైగా మరణించారు, గాజా, వెస్ట్ బ్యాంక్‌లో 1,900 మందికి పైగా ప్రాణాలు కోల్పోయారు.
గాజా
గాజా ప్రజలకు 24గంటల డెడ్ లైన్ విధించిన ఇజ్రాయెల్
గాజాలోని పాలస్తీయులు 24గంటల్లో ఈ ప్రాంతాన్ని విడిచివెళ్లాలని ఇజ్రాయెల్ సైన్యం డెడ్ లైన్ విధించింది.
దీంతో ఇజ్రాయెల్ సైన్యం భూతల దాడులకు పాల్పడుతుందన్న ఊహాగానాల నేపథ్యంలో గాజాలోని ప్రజలు ప్రాణాలను అరచేతిలో పెట్టుకొని, దక్షిణ గాజావైపు వెళ్లిపోయారు.
డెడ్ లైన్ గడువు ముగిసిత తర్వాత, ఇజ్రాయెల్ దళాలు భూమార్గం గుండా గాజాలోకి ప్రవేశించాయి.
24గంటల గడువు ముగిసిన తర్వాత ఇజ్రాయెల్ దళాలు గాజాలోకి ప్రవేశించాయి.
అయితే, ఉత్తర గాజా నుంచి పారిపోతున్న పౌరులను ఇజ్రాయెల్ లక్ష్యంగా చేసుకుంటోందని హమాస్ ఆరోపించింది.
దక్షిణ దిశగా వెళుతున్న ప్రజలపై ఇజ్రాయిలీలు జరిపిన వైమానిక దాడుల్లో కనీసం 70 మంది చనిపోయినట్లు హమాస్ తెలిపింది. అయితే ఈ దాడిపై ఇజ్రాయెల్ ఇంకా స్పందించలేదు.
గాజా
24గంటల్లో తరలింపు అసాధ్యం: ఐక్యరాజ్య సమితి
గాజాలోని ప్రజలు ఆ ప్రాంతాన్ని ఖాళీ చేసేందుకు ఇజ్రాయెల్ సైన్యం 24గంటల గడవు ఇవ్వడంపై ఐక్యరాజ్య సమితి స్పందించింది.
గాజాలోని 1.1 మిలియన్ల మందిని 24 గంటల్లో వెంటనే దక్షిణాదికి మకాం మార్చడం అసాధ్యమని చెప్పింది.
జనాభాను బలవంతంగా తరలించడం మానవత్వానికి విరుద్ధం అని వెల్లడించింది.
ఇజ్రాయెల్ వైమానిక దాడులు, షెల్లింగ్ కారణంగా మరణించిన, గాయపడిన వారి సంఖ్యను తెలుసుకోవడానికి, చికిత్సను అందించడానికి గాజాలోని ఆసుపత్రులు కష్టపడుతున్నాయని ప్రపంచ ఆరోగ్య సంస్థ (డబ్ల్యూహెచ్ఓ) తెలిపింది.
గాజాలోని ఆరోగ్య వ్యవస్థ విచ్ఛిన్నమైపోయిందని వెల్లడించింది.
గాజా
రాయిటర్స్ జర్నలిస్టు మృతి
గాజాలోని సమాన్య ప్రజలపై ఇజ్రాయెల్ వైమానిక దాడులు చేస్తున్న నేపథ్యంలో పశ్చిమాసియాలోని ఇతర దేశాల్లో నిరసనలు వెల్లువెత్తుతున్నాయి.
పాలస్తీనియన్లకు మద్దతుగా బీరూట్, ఇరాక్, ఇరాన్, జోర్డాన్, బహ్రెయిన్‌లలో వేలాది మంది నిరసనలు తెలిపారు.
ఇదిలా ఉంటే, మరోవైపు ఇజ్రాయెల్ సైన్యం.. లెబనాన్ మిలిటెంట్ గ్రూపు హిజ్బుల్లా మధ్య సరిహ్దదులో ఉద్రిక్త పరిస్థితులు నెలకొన్నాయి.
పరస్పరం కాల్పులకు పాల్పడుతున్నాయి. లెబనాన్‌పై ఇజ్రాయెల్ సైన్యం జరిపిన దాడిలో రాయిటర్స్ వీడియో జర్నలిస్ట్ మరణించగా, మరో ఇద్దరు రాయిటర్స్ రిపోర్టర్లు, ఏఎఫ్‌పీ ఇద్దరు జర్నలిస్తులు గాయపడ్డారు.