Loading...
Israel-Hamas: పశ్చిమాసియాలో మళ్లీ ఉద్రిక్తతలు.. గాజాలో హమాస్ టాప్ కమాండర్ హతం
పశ్చిమాసియాలో మళ్లీ ఉద్రిక్తతలు.. గాజాలో హమాస్ టాప్ కమాండర్ హతం

Israel-Hamas: పశ్చిమాసియాలో మళ్లీ ఉద్రిక్తతలు.. గాజాలో హమాస్ టాప్ కమాండర్ హతం

వ్రాసిన వారు Sirish Praharaju
Nov 16, 2026
03:14 pm

ఈ వార్తాకథనం ఏంటి

పశ్చిమాసియాలో మరోసారి ఉద్రిక్త పరిస్థితులు నెలకొన్నాయి. దక్షిణ గాజాలో ఇజ్రాయెల్ నిర్వహించిన వైమానిక దాడిలో హమాస్‌కు చెందిన రఫా బ్రిగేడ్ కమాండర్ సమీర్ మహమూద్ హసన్ అబూ యూనిస్‌ మరణించారు. ఈ విషయాన్ని ఇజ్రాయెల్ సైన్యం ప్రకటించగా.. హమాస్ సాయుధ విభాగం కూడా ఆయన మృతిని ధ్రువీకరించింది. మరోవైపు బహ్రెయిన్‌లోని అమెరికా సైనిక స్థావరంపై దాడి చేసినట్లు ఇరాన్ ప్రకటించింది. సౌదీ అరేబియాపై హూతీలు ప్రయోగించిన క్షిపణులను ఆ దేశ రక్షణ వ్యవస్థ అడ్డుకుంది. ఈ పరిణామాలతో పశ్చిమాసియాలో ఉద్రిక్తతలు మరింత పెరిగాయి.

వివరాలు 

హమాస్ రఫా బ్రిగేడ్ కమాండర్ అబూ యూనిస్ హతం

దక్షిణ గాజాలో శనివారం అర్ధరాత్రి దాటిన తర్వాత ఇజ్రాయెల్ సైన్యం, భద్రతా సంస్థ షిన్ బెట్ సంయుక్తంగా వైమానిక దాడి నిర్వహించాయి.

ఈ దాడిలో హమాస్ రఫా బ్రిగేడ్ కమాండర్ సమీర్ మహమూద్ హసన్ అబూ యూనిస్‌ మరణించినట్లు ఇజ్రాయెల్ ప్రకటించింది.

హమాస్ సాయుధ విభాగంలో ఆయన కీలక బాధ్యతలు నిర్వహిస్తున్నారని ఆరోపించింది. ఆదివారం హమాస్ కూడా ఆయన మరణాన్ని ధ్రువీకరించింది.

గత సెప్టెంబర్‌లో ఇజ్రాయెల్ దాడిలో మరణించిన నాయెల్ అబూ ఒబైద్ స్థానంలో అబూ యూనిస్ రఫా బ్రిగేడ్ బాధ్యతలు చేపట్టారు.

అయితే బాధ్యతలు స్వీకరించిన రెండు నెలలకే ఆయన కూడా ఇజ్రాయెల్ దాడిలో ప్రాణాలు కోల్పోయారు.

ఆదివారం ఆయన అంత్యక్రియలు నిర్వహించినట్లు హమాస్ వెల్లడించింది.

వివరాలు 

బహ్రెయిన్‌లో అమెరికా సైనిక స్థావరంపై ఇరాన్ దాడి?

బహ్రెయిన్‌లోని అమెరికా సైనిక స్థావరంలో ఏర్పాటు చేసిన రాడార్ వ్యవస్థను లక్ష్యంగా చేసుకుని దాడి చేసినట్లు ఇరాన్ రివల్యూషనరీ గార్డ్స్ ప్రకటించారు.

అల్ రిఫా హెలికాప్టర్ స్థావరంపై ఆరు డ్రోన్లతో దాడి చేసినట్లు ఇరాన్ మీడియా కథనాలు వెల్లడించాయి.

అయితే ఈ దాడిలో రాడార్ వ్యవస్థ ధ్వంసమైందా? ఎంత మేర నష్టం జరిగింది? అనే విషయాలపై ఇప్పటివరకు స్పష్టత రాలేదు.

మరోవైపు అమెరికా సెంట్రల్ కమాండ్ రెండు ఇరాన్ డ్రోన్లను అడ్డుకున్నట్లు తెలిపింది.

అయితే రాడార్ వ్యవస్థ ధ్వంసమైన విషయాన్ని మాత్రం ధ్రువీకరించలేదు.

ఈ పరిణామాల నేపథ్యంలో బహ్రెయిన్ హోం శాఖ దేశవ్యాప్తంగా రెండు భద్రతా హెచ్చరికలు జారీ చేసింది.

ప్రజలు అప్రమత్తంగా ఉండాలని, సురక్షిత ప్రాంతాలకు వెళ్లాలని సూచించింది.

ADVERTISEMENT

వివరాలు 

జోర్డాన్ చర్చి కాల్పుల కేసులో ముగ్గురికి మరణశిక్ష

జోర్డాన్‌లో గత నెల జరిగిన చర్చి కాల్పుల ఘటనపై న్యాయస్థానం కీలక తీర్పు వెలువరించింది.

అక్టోబర్ 23న కరక్ ప్రాంతంలోని హమూద్ గ్రామంలో ఉన్న గ్రీక్ ఆర్థోడాక్స్ చర్చిలో అంత్యక్రియలు జరుగుతున్న సమయంలో కొందరు దుండగులు కాల్పులకు తెగబడ్డారు.

ఈ ఘటనలో తొమ్మిది మంది మరణించగా.. మరో 34 మంది గాయపడ్డారు.

ఈ కేసులో ముగ్గురిని దోషులుగా నిర్ధారించిన జోర్డాన్ స్టేట్ సెక్యూరిటీ కోర్టు ఆదివారం వారికి మరణశిక్ష విధించింది.

ఉగ్రవాద చర్యలకు పాల్పడటం, ఆయుధాలు కలిగి ఉండటం తదితర అభియోగాలపై ఈ తీర్పు ఇచ్చింది.

అయితే ఈ తీర్పును సవాలు చేస్తూ దోషులు అప్పీల్ చేసుకునేందుకు అవకాశం ఉంది. అంతేకాకుండా జోర్డాన్ అత్యున్నత న్యాయస్థానం సమీక్ష కూడా జరగాల్సి ఉంది.

ADVERTISEMENT

వివరాలు 

యెమెన్‌లో దాడి.. నలుగురికి గాయాలు

యెమెన్ రాజధాని సనాలో జరిగిన దాడిలో ఇద్దరు మహిళలు,ఇద్దరు చిన్నారులు గాయపడినట్లు హూతీల ఆధీనంలోని ఆరోగ్య శాఖ అధికారులు వెల్లడించారు.

నగరంలోని షుఆబ్ ప్రాంతంలో నివాస ప్రాంతాన్ని లక్ష్యంగా చేసుకుని ఈ దాడి జరిగినట్లు ఆరోపించారు.

ఈ ఘటనకు సౌదీ అరేబియానే కారణమని హూతీ వర్గాలు పేర్కొన్నాయి.

అయితే ఈ ఆరోపణలను స్వతంత్రంగా ధ్రువీకరించే సమాచారం అందుబాటులో లేదు. ఇదిలా ఉండగా.. సౌదీ అరేబియాపై హూతీలు ప్రయోగించిన రెండు బాలిస్టిక్ క్షిపణులను తమ రక్షణ వ్యవస్థ అడ్డుకున్నట్లు సౌదీ నేతృత్వంలోని సంకీర్ణ దళాలు ప్రకటించాయి.

అంతేకాకుండా దేశంలోని తూర్పు ప్రాంతంలో మూడు డ్రోన్లను కూడా కూల్చివేసినట్లు వెల్లడించాయి.

గాజా,బహ్రెయిన్,జోర్డాన్, యెమెన్‌లలో వరుసగా చోటుచేసుకుంటున్న ఈ పరిణామాలు పశ్చిమాసియాలో పరిస్థితులను మరింత ఆందోళనకరంగా మారుస్తున్నాయి.

ADVERTISEMENT