JD Vance: అమెరికా ఉద్యోగాలు అమెరికన్లకే.. హెచ్1-బీపై జేడీ వాన్స్ సంచలన వ్యాఖ్యలు
ఈ వార్తాకథనం ఏంటి
అమెరికాలో ఉద్యోగ అవకాశాలు ముందుగా అమెరికా పౌరులకే దక్కాలని, హెచ్1-బీ వీసా వ్యవస్థను దుర్వినియోగం చేసే విదేశీ సంస్థలకు అవకాశం ఇవ్వబోమని అమెరికా ఉపాధ్యక్షుడు జేడీ వాన్స్ స్పష్టం చేశారు. విదేశీ కార్పొరేట్ సంస్థలు అమెరికన్ ఉద్యోగుల వేతనాలను తగ్గించేందుకు హెచ్1-బీ వీసా కార్యక్రమాన్ని ఉపయోగిస్తున్నాయని ఆరోపించిన ఆయన, అలాంటి చర్యలను ట్రంప్ ప్రభుత్వం అడ్డుకుంటుందని తెలిపారు. డొనాల్డ్ ట్రంప్ రెండోసారి అధ్యక్ష బాధ్యతలు చేపట్టిన తర్వాత అక్రమ వలసలు, వీసా విధానాలపై మరింత కఠిన వైఖరిని అవలంబిస్తున్న విషయం తెలిసిందే. ఈ నేపథ్యంలో వచ్చే నెల నుంచి హెచ్1-బీ వీసా నిబంధనలను మరింత కఠినతరం చేయనున్నట్లు వార్తలు రావడంతో వాటిపై వస్తున్న విమర్శలకు జేడీ వాన్స్ స్పందించారు.
వివరాలు
హెచ్1-బీ అసలు ఉద్దేశం మారిపోయింది
హెచ్1-బీ వీసా కార్యక్రమం ప్రతిభావంతులైన సాంకేతిక నిపుణులు, శాస్త్రవేత్తలు, వైద్యులు వంటి అత్యున్నత నైపుణ్యం కలిగిన వ్యక్తులు అమెరికాలో చట్టబద్ధంగా పనిచేయడానికి రూపొందించబడిందని జేడీ వాన్స్ గుర్తు చేశారు. అయితే కాలక్రమేణా ఈ కార్యక్రమం అసలు లక్ష్యానికి భిన్నంగా ఉపయోగించబడుతోందని ఆయన అన్నారు. కొన్ని విదేశీ కార్పొరేట్ సంస్థలు ఈ వీసా విధానాన్ని దుర్వినియోగం చేస్తూ అమెరికన్ ఉద్యోగుల వేతనాలపై ఒత్తిడి తీసుకువస్తున్నాయని ఆయన విమర్శించారు. అలాంటి సంస్థలకు ఇకపై అవకాశం ఉండదని స్పష్టం చేస్తూ, హెచ్1-బీ నిబంధనలను ఉల్లంఘించేందుకు ప్రయత్నించే వారిని అమెరికాలోకి అనుమతించబోమని హెచ్చరించారు.
వివరాలు
అమెరికా ఉద్యోగాలు అమెరికన్లకే
అమెరికాలో ఉన్న ఉద్యోగాలపై మొదటి హక్కు అమెరికా పౌరులకేనని జేడీ వాన్స్ మరోసారి నొక్కిచెప్పారు. విదేశీ సంస్థలు లేదా మోసపూరితంగా వ్యవహరించే వ్యక్తుల కోసం అమెరికన్ కార్మికుల ప్రయోజనాలను త్యాగం చేయబోమని పేర్కొన్నారు. అమెరికా కార్మికుల హక్కులు, ఉపాధి అవకాశాలను కాపాడేందుకు కార్మిక శాఖ కట్టుబడి పనిచేస్తుందని వెల్లడించారు.
వివరాలు
హెచ్1-బీ నిబంధనల్లో కఠిన మార్పులకు సిద్ధం
అమెరికన్ కంపెనీలు విదేశీ నిపుణులను నియమించుకునేందుకు ఉపయోగించే హెచ్1-బీ వీసాలపై త్వరలో మరిన్ని కఠిన నిబంధనలు అమల్లోకి వచ్చే అవకాశం కనిపిస్తోంది. వీసా దరఖాస్తు ఫీజులను గణనీయంగా పెంచే ప్రతిపాదనతో పాటు, ఉద్యోగి వివరాలు మాత్రమే కాకుండా ఆయా కంపెనీల సమాచారాన్ని కూడా మరింత లోతుగా పరిశీలించనున్నారు. అంతేకాదు, క్లయింట్ సంస్థల వద్ద పనిచేసే హెచ్1-బీ ఉద్యోగులు ఏ పనులు చేస్తున్నారో పూర్తి వివరాలను సమర్పించాల్సి ఉంటుంది. వీసా నిబంధనలను ఉల్లంఘించిన సంస్థలపై కఠిన చర్యలు తీసుకునే అవకాశముందని సమాచారం.
వివరాలు
యూనివర్శిటీలు, గ్రీన్కార్డుపైనా ప్రభావం
ప్రస్తుతం విశ్వవిద్యాలయాలు,పరిశోధనా సంస్థలకు ఉన్న హెచ్1-బీ వార్షిక కోటా మినహాయింపులను రద్దు చేయడం లేదా తగ్గించే అంశాన్ని కూడా ప్రభుత్వం పరిశీలిస్తున్నట్లు తెలుస్తోంది. అమెరికాలో శాశ్వత నివాసానికి దారితీసే గ్రీన్కార్డు ప్రక్రియలో భాగమైన PERM లేబర్ సర్టిఫికేషన్ ఫీజులను కూడా పెంచాలని అమెరికా కార్మిక శాఖ ప్రతిపాదిస్తోంది. సాధారణంగా కంపెనీలు తమ వద్ద పనిచేస్తున్న హెచ్1-బీ వీసాదారులకు గ్రీన్కార్డు మంజూరు చేయాలని ప్రభుత్వానికి ప్రతిపాదనలు పంపుతాయి.
వివరాలు
యూనివర్శిటీలు, గ్రీన్కార్డుపైనా ప్రభావం
ఈ ప్రక్రియలో,అమెరికా పౌరులు చేయలేని ప్రత్యేక నైపుణ్యంతో కూడిన పనిని హెచ్1-బీ ఉద్యోగి చేస్తున్నాడని,అతడికి అమెరికన్ ఉద్యోగుల కంటే అధిక వేతనం చెల్లిస్తున్నామని కంపెనీ నిరూపిస్తేనే PERM లేబర్ సర్టిఫికేషన్ లభిస్తుంది. ఇప్పుడు ఈ ప్రక్రియకు సంబంధించిన ఖర్చులను పెంచడం ద్వారా గ్రీన్కార్డుల మంజూరును కూడా మరింత కఠినతరం చేసే అవకాశం ఉందని విశ్లేషకులు భావిస్తున్నారు.