Giant Pandas: అట్లాంటాకు చేరిన కొత్త జెయింట్ పాండాలు.. పింగ్ పింగ్, ఫు షువాంగ్ ప్రత్యేకతలు ఇవే..
ఈ వార్తాకథనం ఏంటి
చైనాలోని చెంగ్డూ జెయింట్ పాండా బ్రీడింగ్ రీసెర్చ్ బేస్ నుంచి రెండు జెయింట్ పాండాలు అమెరికాలోని అట్లాంటా జూకు చేరుకున్నాయి. ఆరేళ్ల మగ పాండా పింగ్ పింగ్, ఐదేళ్ల ఆడ పాండా ఫు షువాంగ్ ఆదివారం అట్లాంటాకు చేరాయి. వీటి ద్వారా పాండాల సంఖ్యను పెంచడంతో పాటు అంతరించిపోయే ప్రమాదంలో ఉన్న ఈ జాతి సంరక్షణకు తోడ్పడాలని అధికారులు భావిస్తున్నారు. పింగ్ పింగ్ అంటే 'శాంతి', ఫు షువాంగ్ అంటే 'రెట్టింపు ఆశీర్వాదాలు' అని అర్థం.
వివరాలు
సుమారు 8,000 మైళ్ల ప్రయాణం
ఈ రెండు పాండాలు చైనాలోని చెంగ్డూ నుంచి సుమారు 8,000 మైళ్ల ప్రయాణం చేశాయి.
ప్రయాణానికి ముందు నెల రోజుల పాటు ప్రత్యేక క్వారంటైన్లో ఉంచారు.
అలాగే పెద్ద శబ్దాలు, ప్రత్యేక పెట్టెల్లో ఉండే పరిస్థితులకు అలవాటు చేశారు.
ఆదివారం ఉదయం సిచువాన్ నుంచి బోయింగ్ 777 విమానంలో 16 గంటల ప్రయాణం చేసి అట్లాంటా చేరుకున్నాయి.
ఫెడ్ఎక్స్ పాండా ఎక్స్ప్రెస్"గా పిలిచే ఈ విమానంలో పాండాలను ప్రత్యేకంగా తరలించారు. వాటితో పాటు తాజా వెదురు, నీరు, ఇష్టమైన ఆహార పదార్థాలను కూడా తీసుకెళ్లారు.
అట్లాంటా జూలో కొత్త పాండా కాంప్లెక్స్లో సుమారు నెల రోజుల పాటు క్వారంటైన్లో ఉంచనున్నారు.
వివరాలు
చైనా-అమెరికా సంబంధాల్లో పాండాలకు ప్రత్యేక ప్రాధాన్యం
ఆ తర్వాతే సందర్శకులు వాటిని చూసే అవకాశం ఉంటుంది. ప్రస్తుతం అమెరికాలో జెయింట్ పాండాలు ఉన్న మూడు జూలలో అట్లాంటా కూడా ఒకటి.
2024లో అట్లాంటా జూ నాలుగు పాండాలను చైనాకు తిరిగి పంపింది. అనంతరం కొత్త ఒప్పందంలో భాగంగా పింగ్ పింగ్, ఫు షువాంగ్ను 10 ఏళ్ల కాలానికి అట్లాంటాకు పంపారు.
చైనా-అమెరికా సంబంధాల్లో పాండాలకు ప్రత్యేక ప్రాధాన్యం ఉంది.
ఐదు దశాబ్దాలుగా పాండాలను 'స్నేహ రాయబారులు'గా చైనా ఉపయోగిస్తోంది.
ప్రస్తుతం అమెరికా జూలలో మొత్తం ఆరు పాండాలు ఉన్నాయి. ప్రపంచవ్యాప్తంగా పాండాల సంరక్షణకు కూడా ఈ ఒప్పందాలు నిధులు అందిస్తాయి.
వివరాలు
'అంతరించిపోతున్న' స్థాయి నుంచి 'ప్రమాదంలో ఉన్న' స్థాయికి..
పాండాల సహజ ఆవాసాలు తగ్గిపోవడంతో వాటి సంఖ్య గతంలో గణనీయంగా పడిపోయింది.
ప్రస్తుతం చైనాలోని ఆరు పర్వత ప్రాంతాల్లో సుమారు 1,900అడవి పాండాలు ఉన్నట్లు అంచనా.
సంరక్షణ చర్యలతో వాటి సంఖ్య క్రమంగా పెరుగుతోంది.
2016లో పాండాల స్థితిని 'అంతరించిపోతున్న' స్థాయి నుంచి 'ప్రమాదంలో ఉన్న' స్థాయికి మార్చారు.
చెంగ్డూ బ్రీడింగ్ కేంద్రంలో సుమారు 240పాండాలు ఉన్నాయి.
బందిఖానాలో పాండాల సంతానోత్పత్తి చాలా కష్టమైన ప్రక్రియ.ఆడ పాండాలు ఏడాదిలో కేవలం ఒకటి నుంచి మూడు రోజులే సంతానోత్పత్తికి అనుకూలంగా ఉంటాయి.
పింగ్ పింగ్,ఫు షువాంగ్లను వయసు,ఆరోగ్యం, జన్యు లక్షణాలు, స్వభావం ఆధారంగా ఎంపిక చేశారు.
వీటి మధ్య సహజంగా జతకట్టేలా చేసి కొత్త పాండాల జననానికి మార్గం సుగమం చేయాలని అధికారులు ఆశిస్తున్నారు.