Green Card: అమెరికా గ్రీన్ కార్డ్ ప్రక్రియలో మార్పులు.. భారతీయులకు ఊరటనిచ్చే కీలక బిల్లు
ఈ వార్తాకథనం ఏంటి
అమెరికాలో శాశ్వత నివాస హోదా (గ్రీన్ కార్డ్) కోసం ఏళ్ల తరబడి ఎదురుచూస్తున్న లక్షలాది మంది వలసదారులకు ఊరటనిచ్చేలా కొత్త ఇమ్మిగ్రేషన్ ప్రతిపాదన ముందుకు వచ్చింది. కాలిఫోర్నియా సెనేటర్ అలెక్స్ పాడిల్లా ప్రవేశపెట్టిన ఈ బిల్లు చట్టరూపం దాల్చితే,H-1B వీసాదారులు,వారి కుటుంబ సభ్యులు,అలాగే చాలా కాలంగా అమెరికాలో నివసిస్తున్న ఇతర విదేశీయులకు గ్రీన్ కార్డ్ పొందేందుకు మరో ప్రత్యామ్నాయ మార్గం అందుబాటులోకి వచ్చే అవకాశం ఉంది. అయితే ప్రస్తుతం ఇది కేవలం బిల్లు దశలోనే ఉంది. చట్టంగా అమలులోకి రావాలంటే అమెరికా సెనేట్, ప్రతినిధుల సభ (హౌస్ ఆఫ్ రిప్రజెంటేటివ్స్) ఆమోదంతో పాటు అధ్యక్షుడి సంతకం కూడా అవసరం. అయినప్పటికీ అమెరికాలో స్థిరపడాలని ఆశిస్తున్న విదేశీ నిపుణుల దృష్టిని ఈ ప్రతిపాదన ఆకర్షిస్తోంది.
వివరాలు
ఉద్యోగ ఆధారిత గ్రీన్ కార్డ్ వ్యవస్థలో ఇబ్బందులు ఎదుర్కొంటున్న భారతీయులే..
ఉద్యోగ ఆధారిత గ్రీన్ కార్డ్ వ్యవస్థలో అత్యధికంగా ఇబ్బందులు ఎదుర్కొంటున్న వారిలో భారతీయులే ముందున్నారు.
ప్రతి ఏడాది వేలాది మంది భారతీయ ఇంజనీర్లు,ఐటీ నిపుణులు,వైద్యులు,శాస్త్రవేత్తలు H-1B వర్క్ వీసాలపై అమెరికాకు వెళ్లి ఉద్యోగాలు పొందుతున్నారు.
అనంతరం గ్రీన్ కార్డ్ కోసం దరఖాస్తు చేస్తున్నప్పటికీ,దేశాల వారీగా అమల్లో ఉన్న కోటా పరిమితుల కారణంగా చాలామంది దశాబ్దాల పాటు నిరీక్షించాల్సిన పరిస్థితి ఏర్పడుతోంది.
ప్రస్తుతం ఉద్యోగ ఆధారిత గ్రీన్ కార్డ్ల కేటాయింపులో ఒక్కో దేశానికి 7 శాతం పరిమితి అమలులో ఉంది.
భారత్ నుంచి భారీ సంఖ్యలో దరఖాస్తులు రావడంతో పెండింగ్ కేసులు నిరంతరం పెరుగుతున్నాయి.
అందుబాటులో ఉన్న అంచనాల ప్రకారం, ఉద్యోగ ఆధారిత గ్రీన్ కార్డ్ పెండింగ్ దరఖాస్తుల్లో భారతీయుల వాటా గణనీయంగా ఉంది.
వివరాలు
వీరికి గ్రీన్ కార్డ్ కోసం దరఖాస్తు చేసే అవకాశం
సెనేటర్ అలెక్స్ పాడిల్లా ప్రతిపాదించిన బిల్లు 1929 నాటి ఇమ్మిగ్రేషన్ చట్టంలోని రిజిస్ట్రీ నిబంధనలను సవరించాలని సూచిస్తోంది.
ప్రస్తుతం ఈ నిబంధనలు చాలా కాలం క్రితమే అమెరికాలో నివసించడం ప్రారంభించిన కొద్దిమందికే వర్తిస్తున్నాయి.
అయితే ప్రతిపాదిత సవరణల ప్రకారం,దరఖాస్తు చేసుకునే తేదీకి ముందు కనీసం ఏడు సంవత్సరాల పాటు నిరంతరంగా అమెరికాలో నివసించిన వ్యక్తులకు గ్రీన్ కార్డ్ కోసం దరఖాస్తు చేసే అవకాశం కల్పించాలని బిల్లులో పేర్కొన్నారు.
ఈ మార్పు అమల్లోకి వస్తే,H-1B వీసాదారులు ఉద్యోగ ఆధారిత గ్రీన్ కార్డ్ కోసం ఉన్న సుదీర్ఘ క్యూపై మాత్రమే ఆధారపడాల్సిన అవసరం తగ్గే అవకాశముంది.
వివరాలు
ఈ బిల్లు అమెరికాలో ఉన్న భారతీయ విద్యార్థుల భవిష్యత్తుపైనా ప్రభావం చూపే అవకాశం
అలాగే తరచూ వీసా పొడిగింపుల కోసం ఆందోళన చెందాల్సిన పరిస్థితి తగ్గడంతో పాటు, ఉద్యోగ మార్పులు, కుటుంబ భవిష్యత్తు, పిల్లల విద్య వంటి అంశాల్లో మరింత స్థిరత్వం లభిస్తుందని ఇమ్మిగ్రేషన్ నిపుణులు అభిప్రాయపడుతున్నారు.
ఈ బిల్లు అమెరికాలో ఉన్న భారతీయ విద్యార్థుల భవిష్యత్తుపైనా ప్రభావం చూపే అవకాశముంది.
ప్రస్తుతం చాలా మంది విద్యార్థులు స్టూడెంట్ వీసా నుంచి OPT,అనంతరం H-1Bవీసాకు మారి, చివరకు గ్రీన్ కార్డ్ కోసం దీర్ఘకాల నిరీక్షణ జాబితాలో చేరుతున్నారు.
అయితే ఈ బిల్లు అమలులోకి వచ్చిన వెంటనే H-1Bవీసాదారులందరికీ ఆటోమేటిక్గా గ్రీన్ కార్డ్ లభిస్తుందని భావించడం సరైంది కాదని నిపుణులు స్పష్టం చేస్తున్నారు.
ప్రతిపాదిత నిబంధనల్లో పేర్కొన్న అర్హత ప్రమాణాలను తప్పనిసరిగా పూర్తి చేయాల్సి ఉంటుందని వారు చెబుతున్నారు.
వివరాలు
బిల్లుకు డెమోక్రటిక్ పార్టీ సెనేటర్లతో పాటు 30కి పైగా సంస్థల మద్దతు
అధ్యక్షుడు డొనాల్డ్ ట్రంప్ వలస విధానాలను విమర్శించిన సెనేటర్ అలెక్స్ పాడిల్లా, అమెరికా ఆర్థికాభివృద్ధికి ఎన్నో సంవత్సరాలుగా సేవలందిస్తున్న దీర్ఘకాలిక వలసదారులకు చట్టబద్ధమైన శాశ్వత నివాస మార్గాన్ని కల్పించడం అవసరమని పేర్కొన్నారు.
ఈ బిల్లుకు పలువురు డెమోక్రటిక్ పార్టీ సెనేటర్లతో పాటు 30కి పైగా సంస్థలు మద్దతు ప్రకటించాయి.
ఇప్పటికే ఈ ప్రతిపాదనపై భారతీయ వలసదారులు, H-1B వీసాదారులు, అమెరికాలో చదువుతున్న విద్యార్థులు ఆసక్తిగా ఎదురుచూస్తున్నారు.
అయితే బిల్లు చట్టరూపం దాల్చే వరకు ప్రస్తుతం అమల్లో ఉన్న గ్రీన్ కార్డ్ ప్రక్రియలో ఎలాంటి తక్షణ మార్పులు ఉండవని ఇమ్మిగ్రేషన్ నిపుణులు స్పష్టం చేస్తున్నారు.