Bangladesh Violence: రాడికల్ విద్యార్థి నేత హత్యపై బంగ్లాదేశ్లో హింస.. స్పందించిన మహ్మద్ యూనస్ ప్రభుత్వం..
ఈ వార్తాకథనం ఏంటి
భారత వ్యతిరేక భావజాలంతో పాటు బంగ్లాదేశ్లో రాడికల్ విద్యార్థి సంఘంగా గుర్తింపు పొందిన ఇంక్విలాబ్ మంచో ప్రతినిధి షరీఫ్ ఉస్మాన్ హాది హత్య అనంతరం ఆ దేశంలో ఒక్కసారిగా హింసాత్మక పరిణామాలు చోటుచేసుకున్నాయి. ఈ ఘటన తర్వాత రాడికల్ శక్తులు ముఖ్యంగా హిందూ వర్గాన్ని లక్ష్యంగా చేసుకుని దాడులకు తెగబడుతున్నాయి. ఈ క్రమంలో మైమన్సింగ్ జిల్లాలో ఒక హిందూ వ్యక్తిని 'దైవదూషణ' ఆరోపణల పేరిట కొట్టి చంపిన ఘటన తీవ్ర కలకలం రేపింది. మృతుడిని 30 ఏళ్ల దీపు చంద్ర దాస్గా గుర్తించారు. గురువారం రాత్రి సుమారు 9 గంటల సమయంలో అతనిపై దాడి జరిగినట్లు సమాచారం.
వివరాలు
తీవ్రవాద సంఘాలు రెచ్చగొడుతున్న హింస పట్ల ప్రజలు అప్రమత్తంగా ఉండాలి: మహ్మద్ యూనస్
ఈ హింసాత్మక ఘటనలపై బంగ్లాదేశ్ తాత్కాలిక ప్రభుత్వాధినేత మహ్మద్ యూనస్ తీవ్రంగా స్పందించారు. "మైమన్సింగ్లో హిందూ వ్యక్తిని కొట్టి చంపిన సంఘటనను మేము ఘాటుగా ఖండిస్తున్నాం. న్యూ బంగ్లాదేశ్లో ఇలాంటి హింసకు ఏమాత్రం చోటు లేదు. ఈ అమానుష నేరానికి పాల్పడ్డ వారిని ఎట్టి పరిస్థితుల్లోనూ వదిలిపెట్టము" అని ఆయన ప్రకటనలో తెలిపారు. కొంతమంది తీవ్రవాద సంఘాలు రెచ్చగొడుతున్న హింస పట్ల ప్రజలు అప్రమత్తంగా ఉండాలని తాత్కాలిక ప్రభుత్వం సూచించింది. హింస, భయభ్రాంతులు, దహనం, విధ్వంసం వంటి చర్యలను ప్రభుత్వం ఖండిస్తున్నట్లు వెల్లడించింది. ప్రస్తుతం బంగ్లాదేశ్ కీలక దశలో చారిత్రాత్మక ప్రజాస్వామ్య మార్పుల దారిలో ముందుకెళ్తోందని, అశాంతిని సృష్టించే ప్రయత్నాలను సహించబోమని హెచ్చరించింది.
వివరాలు
ఢాకాలో షరీఫ్ ఉస్మాన్ హాదిని హత్య
ఇదిలా ఉండగా, షేక్ హసీనా నేతృత్వంలోని అవామీ లీగ్ ప్రభుత్వాన్ని కూల్చివేయడంలో కీలకంగా వ్యవహరించిన విద్యార్థి నాయకుడు, భారత వ్యతిరేకిగా పేరుగాంచిన షరీఫ్ ఉస్మాన్ హాదిని కొన్ని రోజుల క్రితం ఢాకాలో గుర్తుతెలియని వ్యక్తులు కాల్చి వెళ్లారు. తీవ్రంగా గాయపడిన ఆయన చికిత్స పొందుతూ ప్రాణాలు కోల్పోయారు. మరోవైపు, రాడికల్ శక్తులు బంగ్లాదేశ్లోని ప్రముఖ మీడియా సంస్థలు ది డైలీ స్టార్, ప్రొథోమ్ అలో కార్యాలయాలపై దాడులకు పాల్పడ్డాయి. ఈ పరిణామాలపై ప్రభుత్వం స్పందిస్తూ, జర్నలిస్టుల పక్షాన తాము నిలుస్తామని, ఉగ్రవాదం, హింసాత్మక చర్యలను తీవ్రంగా ఖండిస్తున్నామని స్పష్టం చేసింది.