Noro virus: హంటా, నోరో, కోవిడ్.. ఆందోళన కలిగిస్తున్న వైరస్లు.. అసలు నిజాలు ఇవే!
ఈ వార్తాకథనం ఏంటి
ప్రపంచవ్యాప్తంగా ఇటీవల నమోదవుతున్న నోరో వైరస్ కేసులు, విదేశీ ప్రయాణికుల్లో గుర్తించిన అరుదైన హంటా వైరస్ ఘటనలు మళ్లీ ప్రజల్లో ఆందోళనను పెంచుతున్నాయి. ఈ పరిణామాలు కరోనా మహమ్మారి రోజులను గుర్తు చేస్తున్నాయి. అయితే హంటా వైరస్, నోరోవైరస్, కోవిడ్-19 మూడు వ్యాధులూ వ్యాప్తి విధానం, లక్షణాలు, తీవ్రత పరంగా పూర్తిగా భిన్నంగా ఉంటాయని వైద్య నిపుణులు చెబుతున్నారు. ఇప్పుడు వాటి గురించి పూర్తిగా తెలుసుకుందాం.
వివరాలు
హంటా వైరస్: అరుదుగా కనిపించినా ప్రమాదకరం
హంటా వైరస్ సాధారణంగా ఎలుకల ద్వారా మనుషులకు వ్యాపిస్తుంది. ఇది ఎక్కువగా కనిపించకపోయినా, సోకినప్పుడు తీవ్రమైన ఆరోగ్య సమస్యలకు కారణమవుతుంది. ఎలుకల మూత్రం, విసర్జన లేదా లాలాజలం కలిసిన గాలిని పీల్చడం వల్ల ఈ వైరస్ మనుషుల్లోకి చేరుతుంది. మొదట్లో జ్వరం, శరీర నొప్పులు, తీవ్రమైన తలనొప్పి వంటి సాధారణ ఫ్లూ లక్షణాలు కనిపిస్తాయి. అనంతరం పరిస్థితి విషమించి ఊపిరితిత్తుల్లో ద్రవం చేరే 'హంటావైరస్ పల్మనరీ సిండ్రోమ్'గా మారే ప్రమాదం ఉంటుంది. దీంతో శ్వాస తీసుకోవడం కష్టమవుతుంది. అయితే ఈ వైరస్ ఒక మనిషి నుంచి మరొకరికి వ్యాపించే అవకాశాలు చాలా తక్కువగా ఉండటం కొంత ఊరటనిచ్చే విషయం.
వివరాలు
నోరోవైరస్: వేగంగా వ్యాపించే కడుపు సంబంధిత ఇన్ఫెక్షన్
నోరోవైరస్ ముఖ్యంగా పాఠశాలలు, కార్యాలయాలు, క్రూయిజ్ షిప్లు వంటి రద్దీ ప్రదేశాల్లో వేగంగా వ్యాపిస్తుంది. కలుషితమైన ఆహారం, నీరు లేదా వైరస్ ఉన్న ఉపరితలాలను తాకడం ద్వారా ఇది సోకుతుంది. ఈ వైరస్ ప్రధానంగా జీర్ణవ్యవస్థపై ప్రభావం చూపుతుంది. అకస్మాత్తుగా వాంతులు, విరేచనాలు, తీవ్రమైన కడుపునొప్పి వంటి సమస్యలు తలెత్తుతాయి. సాధారణంగా ఆరోగ్యంగా ఉన్నవారిలో రెండు నుంచి మూడు రోజుల్లో పరిస్థితి మెరుగవుతుంది. కానీ చిన్నపిల్లలు, వృద్ధుల్లో శరీరంలో నీటి శాతం ప్రమాదకరంగా తగ్గిపోయే అవకాశం ఉంటుంది. దీనికి ప్రత్యేకమైన ఔషధం అందుబాటులో లేదు. విశ్రాంతి తీసుకోవడం, తగినంత ద్రవాలు తీసుకోవడం మాత్రమే ఉపశమనానికి ఉపయోగపడుతుంది.
వివరాలు
కోవిడ్-19: శ్వాసకోశాన్ని ప్రభావితం చేసే వైరస్
కోవిడ్-19 గాలి ద్వారా, తుంపర్ల ద్వారా చాలా సులభంగా వ్యాపిస్తుంది. ఇది ప్రధానంగా శ్వాసకోశ వ్యవస్థపై ప్రభావం చూపుతుంది. పొడి దగ్గు, గొంతు నొప్పి, వాసన లేదా రుచి తెలియకపోవడం వంటి లక్షణాలు ఎక్కువగా కనిపిస్తాయి. వ్యాక్సిన్లు అందుబాటులోకి వచ్చిన తర్వాత కరోనా తీవ్రత కొంతవరకు తగ్గినా, వృద్ధులు, ఇతర అనారోగ్య సమస్యలు ఉన్నవారికి ఇది ఇప్పటికీ ప్రమాదకరంగానే ఉంది. కొందరిలో దీర్ఘకాలంగా అలసట, శ్వాస సమస్యలు వంటి 'లాంగ్ కోవిడ్' లక్షణాలు కొనసాగుతున్నాయి.
వివరాలు
నివారణకు తీసుకోవాల్సిన జాగ్రత్తలు..
నోరోవైరస్ నుంచి రక్షణ పొందేందుకు చేతులను తరచుగా శుభ్రంగా కడుక్కోవాలి. కోవిడ్ వ్యాప్తి తగ్గించేందుకు గాలి సరిగా ఆడే ప్రదేశాల్లో ఉండడం మంచిది. హంటా వైరస్ నివారణకు ఎలుకల సంచారాన్ని నియంత్రించడం అత్యంత అవసరం.