Pakistan- IMF Deal: IMF ఒప్పందంలో భాగంగా పాకిస్థాన్ 1.5 లక్షల ఉద్యోగాల కోత.. ఆరు మంత్రిత్వ శాఖల రద్దు
ఈ వార్తాకథనం ఏంటి
పాకిస్థాన్ (Pakistan) గత కొంతకాలంగా తన ఆర్థిక వ్యవస్థను స్థిరపర్చడానికి తీవ్రంగా కృషి చేస్తోంది. ఆర్థిక సంక్షోభం నుంచి బయటపడేందుకు రుణ సహాయం పొందడంలో ఎన్నో సమస్యలను ఎదుర్కొంటోంది. తాజాగా, అంతర్జాతీయ ద్రవ్యనిధి సంస్థ (IMF) తో 7 బిలియన్‌ డాలర్ల రుణ ఒప్పందం విషయంలో పెట్టిన షరతులను స్వీకరించింది. ఈ ఒప్పందంలో భాగంగా, దేశంలో దాదాపు 1,50,000 ప్రభుత్వ ఉద్యోగాలను తొలగించడం, ఆరు మంత్రిత్వ శాఖలను మూసివేయడం, మరో రెండు మంత్రిత్వ శాఖలను విలీనం చేయడం వంటి చర్యలు చేపట్టనున్నట్లు ప్రకటించింది.
వివరాలు
దివాలా దశకు చేరువై..
గతంలో పాకిస్థాన్ దివాలా స్థితికి చేరువైంది, కానీ ఐఎంఎఫ్‌ నుండి మూడు బిలియన్‌ డాలర్ల రుణం పొందడంతో ఆపదను తప్పించుకుంది. దీర్ఘకాలిక రుణం కోసం పాకిస్థాన్ ఐఎంఎఫ్‌తో సుదీర్ఘ చర్చలు జరిపింది. ఎట్టకేలకు, 2024 సెప్టెంబరు 26న ఐఎంఎఫ్‌ పాకిస్థాన్‌కు రుణ ప్యాకేజీని ఆమోదించింది. ఈ ఒప్పందంలో భాగంగా, ఖర్చులను తగ్గించడం, పన్ను-జీడీపీ నిష్పత్తిని పెంచడం, వ్యవసాయం, రియల్ ఎస్టేట్ రంగాల్లో పన్నులు, రాయితీలను తగ్గించడం వంటి హామీలను పాకిస్థాన్ ఇచ్చింది. మొదటి విడతలో, ఒక బిలియన్‌ డాలర్లను IMF విడుదల చేసింది.
వివరాలు
పన్ను చెల్లింపుదారుల సంఖ్య 16 లక్షల నుంచి 32 లక్షలకు..
పాకిస్థాన్ ఆర్థిక మంత్రి మహమ్మద్ ఔరంగజేబు ప్రకటనలో, ''ఇదే చివరి సహాయ ప్యాకేజీ అని నిరూపించే విధంగా మా ఆర్థిక విధానాలను అమలు చేయాల్సి ఉంది. జీ20 సభ్యత్వం కోసం, దేశ ఆర్థిక వ్యవస్థను బలోపేతం చేయాల్సి ఉంది. ఆర్థిక సంస్కరణల కింద, 1,50,000 ప్రభుత్వ ఉద్యోగాలను తొలగిస్తాము, ఆరు మంత్రిత్వ శాఖలను మూసివేస్తాము, రెండు మంత్రిత్వ శాఖలను విలీనం చేస్తాము'' అని తెలిపారు. అంతేకాకుండా, పన్ను చెల్లింపుదారుల సంఖ్యను 16 లక్షల నుంచి 32 లక్షలకు పెంచినట్లు ఆయన పేర్కొన్నారు. పన్నులు చెల్లించని వారు ఇకపై ఆస్తులు, వాహనాలు కొనలేరని కూడా ఆయన హెచ్చరించారు.