Pakistani Taliban: ఇస్లామాబాద్ ఆత్మాహుతి దాడి .. ఖండించిన తాలిబాన్
ఈ వార్తాకథనం ఏంటి
ఇస్లామాబాద్‌లో మంగళవారం (నవంబర్ 11) జరిగిన ఆత్మాహుతి దాడి తర్వాత పరిస్థితులు మలుపు తిరిగాయి. తొలుత తహ్రీక్-ఇ-తాలిబాన్ పాకిస్తాన్ (టిటిపి) నుంచి విడిపోయిన జమాత్-ఉల్-అహ్రార్ అనే తీవ్రవాద సంస్థ ఈ దాడికి బాధ్యత వహిస్తున్నట్లు ప్రకటించగా, తాజాగా ఆ సంస్థ సీనియర్ నాయకుడు సర్బకఫ్ మొహ్మండ్, టిటిపి ప్రతినిధి మహ్మద్ ఖురసానీ మాత్రం తమకిది సంబంధం లేదని ప్రకటించారు. ఈ దాడిలో 12 మంది ప్రాణాలు కోల్పోయారు. పాకిస్థాన్ రాజధాని ఇస్లామాబాద్‌లోని జిల్లా కోర్టుల దగ్గర ఈ ఘటన జరిగింది. దాడి జరిగిన వెంటనే పాకిస్తాన్ నేతలు పొరుగు దేశాలైన భారత్, ఆఫ్ఘనిస్తాన్‌లపై ఆరోపణలు గుప్పించారు.
వివరాలు
న్యాయవ్యవస్థలో పనిచేసే అధికారులే లక్ష్యం
దీనిపై భారత విదేశాంగ శాఖ ప్రతినిధి రంధీర్ జైస్వాల్ స్పందిస్తూ, "పాకిస్తాన్ నాయకత్వం అవాస్తవ, ఆధారంలేని ఆరోపణలు చేస్తోంది. భారత్ వాటిని పూర్తిగా ఖండిస్తోంది" అని అన్నారు. పాకిస్తాన్‌లో జరుగుతున్న సైనిక ఆధారిత రాజ్యాంగ విపరిణామం, అధికార దుర్వినియోగం నుండి ప్రజల దృష్టి మరల్చేందుకు భారత్‌పై తప్పుడు కథనాలు సృష్టించడం పాకిస్తాన్‌కు కొత్తది కాదు. అంతర్జాతీయ సమాజం ఈ వాస్తవాన్ని బాగా తెలుసు, పాకిస్తాన్ ప్రయత్నాలతో మోసపోవదు" అని స్పష్టం చేశారు. మొదటగా విడుదలైన ప్రకటనలో పాకిస్తానీ తాలిబాన్, న్యాయవ్యవస్థలో పనిచేసే అధికారులనే (జడ్జీలు,న్యాయవాదులు,కోర్టు సిబ్బంది వంటి వారిని) లక్ష్యంగా చేసుకున్నామని పేర్కొంది.
వివరాలు
భారత్ ప్రోత్సహించిన ఉగ్రవాదం
వార్తా సంస్థ ఏఎఫ్‌పీకి అందిన ప్రకటనలో,"మా యోధుడు ఇస్లామాబాద్ న్యాయ కమిషన్‌పై దాడి చేశాడు. పాకిస్తాన్‌లోని ఇస్లామిక్ కాని చట్టాల ప్రకారం తీర్పులు ఇచ్చిన న్యాయమూర్తులు, న్యాయవాదులు, అధికారులు మా లక్ష్యం" అని చెప్పింది. ఇంకా "ఇస్లామిక్ షరియా చట్టం అమలు అయ్యే వరకు ఇలాంటి దాడులు కొనసాగుతాయి"అని బెదిరింపులు జారీ చేసింది. అయితే పాకిస్తాన్ ప్రధాని షెహ్‌బాజ్ షరీఫ్ ఈ దాడిని"భారత్ ప్రోత్సహించిన ఉగ్రవాదం"గా అభివర్ణించారు. రక్షణశాఖ మంత్రి ఖవాజా అసిఫ్ మాట్లాడుతూ,"మేము యుద్ధ పరిస్థితుల్లో ఉన్నాం" అని, "కాబూల్ పాలకులు పాకిస్తాన్‌లో ఉగ్రవాదాన్ని ఆపగలరు" అని పేర్కొన్నారు. అంతర్గత వ్యవహారాల మంత్రి మోహ్సిన్ నక్వీ మాట్లాడుతూ,"ఈ దాడి భారత మద్దతుతో ఉన్న గుంపులు,ఆఫ్ఘన్ తాలిబాన్ ప్రతినిధుల ద్వారా జరిగింది"అని ఆరోపించారు.