Iran: ముందు మా డబ్బులు విడుదల చేయండి.. ఆ తర్వాతే చర్చలు: అమెరికాకు ఇరాన్ షరతు
ఈ వార్తాకథనం ఏంటి
అమెరికా-ఇరాన్ మధ్య శాంతి ఒప్పందం కుదిరిన నేపథ్యంలో ప్రపంచవ్యాప్తంగా ఈ డీల్పై ఆసక్తికర చర్చ జరుగుతోంది. 107 రోజులుగా కొనసాగిన సంక్షోభానికి ఈ ఒప్పందం ఎంతవరకు ముగింపు పలికిందనే అంశంపై విశ్లేషణలు సాగుతున్నాయి. ఈ క్రమంలో అమెరికా అధ్యక్షుడు డొనాల్డ్ ట్రంప్ మెత్తబడ్డారా? లేక ఇరాన్ ఒక అడుగు వెనక్కి వేసిందా? అనే ప్రశ్నలు కూడా చర్చనీయాంశంగా మారాయి. ఇరుదేశాల మధ్య కుదిరిన అంగీకార ఒప్పందానికి సంబంధించిన కీలక నిబంధనలను ఇరాన్ అధికారిక వార్తా సంస్థ మెహ్రా న్యూస్ వెల్లడించింది. ఇవే భవిష్యత్తులో కుదిరే విస్తృత శాంతి ఒప్పందానికి పునాదిగా నిలవనున్నాయని పేర్కొంది.
వివరాలు
ఒప్పందంలోని కీలక నిబంధనలు ఇవే
లెబనాన్ సహా ఇరాన్ మిత్రపక్షాలపై జరుగుతున్న యుద్ధ చర్యలను తక్షణమే నిలిపివేయాలి. ఇరాన్ అంతర్గత వ్యవహారాల్లో అమెరికా జోక్యం చేసుకోకూడదు. అలాగే ఇరాన్ సార్వభౌమాధికారాన్ని గౌరవించాలి. అమెరికా విధించిన నౌకాదళ దిగ్బంధాన్ని 30 రోజులలో పూర్తిగా ఎత్తివేయాలి. ఇరాన్ పరిసర ప్రాంతాల్లో మోహరించిన అమెరికా దళాలను పూర్తిగా వెనక్కి తీసుకునేందుకు అమెరికా కట్టుబడి ఉండాలి. పరస్పర అంగీకార ఏర్పాట్ల ప్రకారం ఇరాన్ 30 రోజులలోపు హర్మూజ్ జలసంధిని పూర్తిగా తెరవాలి. ఇరాన్పై విధించిన చమురు ఆంక్షలను తొలగించాలి. పెట్రోకెమికల్ ఉత్పత్తులు, వాటి అనుబంధ ఉత్పత్తుల ద్వారా వచ్చే ఆదాయం పూర్తిగా ఇరాన్కే అందేలా చర్యలు తీసుకోవాలి.
వివరాలు
ఒప్పందంలోని కీలక నిబంధనలు ఇవే1/2
యుద్ధ ప్రభావంతో దెబ్బతిన్న ఇరాన్ పునర్నిర్మాణం కోసం అమెరికా, దాని మిత్రదేశాలు 300 బిలియన్ డాలర్ల విలువైన ఆర్థిక ప్రణాళికను సమర్పించాలి. అణు అంశాలపై సమగ్ర ఒప్పందం, అమెరికా విధించిన ప్రాథమిక మరియు ద్వితీయశ్రేణి ఆంక్షల తొలగింపు, అలాగే ఐక్యరాజ్యసమితి (UN) మరియు అంతర్జాతీయ అణుశక్తి సంస్థ (IAEA) బోర్డ్ ఆఫ్ గవర్నర్స్ తీర్మానాల ఉపసంహరణపై 60 రోజులపాటు చర్చలు జరపాలి. అణ్వాయుధ వ్యాప్తి నిరోధక ఒప్పందం (NPT) ప్రకారం తాము అణ్వాయుధాలను అభివృద్ధి చేయబోమని ఇరాన్ మరోసారి పునరుద్ఘాటించాలి. చర్చలు కొనసాగుతున్న సమయంలో అమెరికా ఈ ప్రాంతంలో అదనపు సైనిక బలగాలను మోహరించకూడదు.
వివరాలు
ఒప్పందంలోని కీలక నిబంధనలు ఇవే1/3
అమెరికా స్తంభింపజేసిన ఇరాన్కు చెందిన 24 బిలియన్ డాలర్ల నిధులను విడుదల చేయాలి. చర్చలు ప్రారంభమయ్యే ముందే వాటిలో సగభాగాన్ని విడుదల చేయాలని ఒప్పందంలో పేర్కొన్నారు. ఒప్పంద అమలును పర్యవేక్షించేందుకు ప్రత్యేక మానిటరింగ్ వ్యవస్థను ఏర్పాటు చేయాలి. తుది శాంతి ఒప్పందానికి ఐక్యరాజ్యసమితి భద్రతా మండలి తీర్మానం ద్వారా ఆమోదం పొందాలి. ఈ నిబంధనలతో కూడిన ప్రాథమిక ఒప్పందం అమెరికా-ఇరాన్ మధ్య ఉద్రిక్తతలను తగ్గించడంలో కీలక అడుగుగా భావిస్తున్నప్పటికీ, దీనిపై పూర్తి స్పష్టత రావాల్సి ఉందని అంతర్జాతీయ విశ్లేషకులు అభిప్రాయపడుతున్నారు. ముఖ్యంగా అణు కార్యక్రమం, హర్మూజ్ జలసంధి, ఆర్థిక ఆంక్షల ఎత్తివేత వంటి అంశాలపై రాబోయే చర్చలే ఈ ఒప్పంద భవితవ్యాన్ని నిర్ణయించనున్నాయి.