'Toll of hate': అమెరికా ఎన్నికల్లో మారుతున్న ఓటర్లు.. రిపబ్లికన్లకు దూరంగా దక్షిణాసియా అమెరికన్లు..!
ఈ వార్తాకథనం ఏంటి
అమెరికా రాజకీయాల్లో దక్షిణాసియా అమెరికన్ల ఓటింగ్ సరళి మారుతున్నట్లు తాజా సర్వే వెల్లడించింది. గత అధ్యక్ష ఎన్నికల్లో డొనాల్డ్ ట్రంప్ విజయానికి మద్దతుగా నిలిచిన ఈ వర్గం ఓటర్లు.. ఇప్పుడు రిపబ్లికన్ పార్టీకి దూరమవుతున్న సంకేతాలు కనిపిస్తున్నాయి. దేశంలో పెరుగుతున్న జాతి వివక్ష, విద్వేషపూరిత ఘటనల నేపథ్యంలో రాబోయే మధ్యంతర ఎన్నికల్లో డెమోక్రటిక్ పార్టీ అభ్యర్థుల వైపు మొగ్గు చూపుతున్నట్లు సర్వే తెలిపింది. సౌత్ ఏషియన్ అమెరికన్ ఓటర్ ఎంపవర్‌మెంట్ ఆఫ్ టెక్సాస్ ఎడ్యుకేషన్ ఫండ్ (SAAVETX EF), యూనివర్సిటీ ఆఫ్ కాలిఫోర్నియా శాన్‌డియాగో సంయుక్తంగా ఈ సర్వే నిర్వహించాయి. ముఖ్యంగా దక్షిణాసియా అమెరికన్లు ఎక్కువగా నివసించే టెక్సాస్‌లో ఓటర్ల అభిప్రాయాలను సేకరించాయి.
వివరాలు
63 శాతం మంది డెమోక్రటిక్ అభ్యర్థి గినా హినోజోసాకు మద్దతు
ఈ సర్వే ప్రకారం.. అమెరికా సెనేట్ ఎన్నికల్లో 66 శాతం మంది డెమోక్రటిక్ అభ్యర్థి జేమ్స్ తలారికోకు మద్దతు తెలిపారు.
మరోవైపు 21 శాతం మంది మాత్రమే రిపబ్లికన్ అభ్యర్థి కెన్ పాక్స్‌టన్‌కు అనుకూలంగా ఉన్నారు.
ఇక టెక్సాస్ గవర్నర్ ఎన్నికల విషయానికి వస్తే.. 63 శాతం మంది డెమోక్రటిక్ అభ్యర్థి గినా హినోజోసాకు మద్దతు ప్రకటించారు.
రిపబ్లికన్ అభ్యర్థి గ్రెగ్ అబాట్‌కు 27 శాతం మంది తమ మద్దతు తెలిపారు.
ఈ గణాంకాలు టెక్సాస్‌లో దక్షిణాసియా అమెరికన్ ఓటర్ల అభిప్రాయాల్లో మార్పు వస్తున్నట్లు సూచిస్తున్నాయి.
వివరాలు
జాతి వివక్ష ఘటనలతో మారుతున్న అభిప్రాయాలు
తమపై తరచూ జరుగుతున్న జాతి వివక్ష దాడులు, విద్వేషపూరిత ప్రసంగాలు, ప్రార్థనా మందిరాలపై దాడులు వంటి ఘటనలు ఈ మార్పునకు ప్రధాన కారణాలుగా కనిపిస్తున్నాయి.
ఇలాంటి పరిణామాల నేపథ్యంలో తమ భద్రత, హక్కులకు ప్రాధాన్యం ఇచ్చే రాజకీయ నాయకత్వానికి మద్దతు ఇవ్వాలని దక్షిణాసియా అమెరికన్లు భావిస్తున్నట్లు సర్వే పేర్కొంది.
అమెరికాలో జాతి వివక్షకు వ్యతిరేకంగా కఠిన చర్యలు తీసుకుంటామని హామీ ఇచ్చే అభ్యర్థులకే తమ మద్దతు ఉంటుందని ఈ వర్గం ఓటర్లు స్పష్టం చేస్తున్నట్లు వెల్లడించింది.
మొత్తంగా గతంలో ట్రంప్‌కు మద్దతుగా నిలిచిన దక్షిణాసియా అమెరికన్ ఓటర్లలో ఇప్పుడు రాజకీయ ప్రాధాన్యతలు మారుతున్న సంకేతాలు కనిపిస్తున్నాయి.