Turkey: టర్కీ పాఠశాలలో విద్యార్థి కాల్పులు.. నిందితుడు,8 మంది విద్యార్థులు, ఒక టీచర్ మృతి
ఈ వార్తాకథనం ఏంటి
టర్కీలో మరోసారి విషాదకర ఘటన చోటుచేసుకుంది. 14 ఏళ్ల విద్యార్థి తాను చదువుతున్న పాఠశాలలోనే విచక్షణారహితంగా కాల్పులకు పాల్పడ్డాడు. ఈ దాడిలో ఎనిమిది మంది సహ విద్యార్థులు, ఒక ఉపాధ్యాయుడు ప్రాణాలు కోల్పోయారు. ఘటన అనంతరం కాల్పులకు పాల్పడిన విద్యార్థి కూడా మరణించినట్లు అధికారులు తెలిపారు. ఈ దారుణం నిన్న కహ్రామన్మరాస్ ప్రాంతంలోని అయ్సెర్ కాలిక్ మధ్య పాఠశాలలో జరిగింది. ఎనిమిదో తరగతి చదువుతున్న ఇసా అరాస్ మెర్సిన్లీ అనే విద్యార్థి, తన తండ్రికి చెందిన ఐదు తుపాకులతో పాఠశాలలోకి ప్రవేశించాడు. అనంతరం రెండు తరగతి గదుల్లోకి వెళ్లి కాల్పులు జరిపినట్లు అధికారులు వెల్లడించారు.
వివరాలు
మాజీ పోలీస్ అయిన తండ్రి తుపాకులతో ఘాతుకానికి పాల్పడినట్లు నిర్ధారణ
ఈ ఘటనలో మొత్తం 13 మంది విద్యార్థులు గాయపడగా, వారిలో ఆరుగురి పరిస్థితి అత్యంత విషమంగా ఉన్నట్లు అంతర్గత వ్యవహారాల మంత్రి ముస్తఫా సిఫ్త్సీ తెలిపారు. గాయపడిన వారికి ఆసుపత్రిలో చికిత్స అందిస్తున్నారు. నిందితుడి తండ్రి ఉగుర్ మెర్సిన్లీ మాజీ పోలీస్ అధికారి అని తెలిసింది. ఆయనను అదుపులోకి తీసుకుని విచారణ కొనసాగిస్తున్నట్లు అధికారులు వెల్లడించారు. అయితే నిందితుడు తనను తాను కాల్చుకున్నాడా లేదా పోలీసుల కాల్పుల్లో మరణించాడా అన్నది ఇంకా స్పష్టంగా తెలియలేదు. ఈ దాడికి గల కారణాలు ఇంకా వెలుగులోకి రాలేదు. రెండు రోజుల వ్యవధిలోనే పాఠశాలలో కాల్పుల ఘటన మళ్లీ జరగడం అక్కడి ప్రజల్లో ఆందోళన కలిగిస్తోంది.