Trump: సౌదీతో అమెరికా 30 ఏళ్ల అణు ఒప్పందానికి ట్రంప్ గ్రీన్ సిగ్నల్
ఈ వార్తాకథనం ఏంటి
పశ్చిమాసియాలో కీలక వ్యూహాత్మక పరిణామం చోటుచేసుకుంది. సౌదీ అరేబియాతో 30 ఏళ్ల కాలపరిమితి గల పౌర అణు సహకార ఒప్పందానికి అమెరికా అధ్యక్షుడు డొనాల్డ్ ట్రంప్ అధికారికంగా ఆమోదం తెలిపారు. ఈ ఒప్పందం అమల్లోకి వస్తే, సౌదీ అరేబియా భూభాగంలోనే యూరేనియం శుద్ధి (ఎన్రిచ్మెంట్) కేంద్రాన్ని ఏర్పాటు చేసుకునే అవకాశాన్ని ఆ దేశం పొందనుంది. ఈ ప్రాజెక్టుకు సంబంధించి వాషింగ్టన్, రియాద్ సంయుక్తంగా సాంకేతిక అధ్యయనం నిర్వహించనున్నాయి. ఆ అధ్యయనంలో ప్రాజెక్టు సాధ్యసాధ్యాలు అనుకూలంగా తేలితే,యూరేనియం శుద్ధి కేంద్ర నిర్మాణ బాధ్యతలను అమెరికాకు చెందిన సంస్థలే చేపట్టనున్నాయి.
వివరాలు
అమెరికా కంపెనీలకు బిలియన్ డాలర్ల కాంట్రాక్టులు
దీంతో ఇతర దేశాలకు అవకాశాలు తగ్గిపోగా,సౌదీ అణు మౌలిక సదుపాయాల అభివృద్ధిలో అమెరికా కంపెనీలు కీలక స్థానాన్ని సంపాదించడంతో పాటు వేల కోట్ల డాలర్ల విలువైన వ్యాపార ఒప్పందాలను దక్కించుకునే అవకాశం ఏర్పడనుంది.
పౌర అణు రియాక్టర్లకు అవసరమైన ఇంధనాన్ని అందించేందుకు యూరేనియం శుద్ధి సాంకేతికతను వినియోగిస్తారు.
అయితే ఇదే సాంకేతికతను అత్యున్నత స్థాయికి అభివృద్ధి చేస్తే అణ్వాయుధాల తయారీకీ ఉపయోగించే అవకాశం ఉందన్న ఆందోళనలు ఉన్నాయి.
అయినప్పటికీ ఈ ప్రాజెక్టులో అమెరికా ప్రత్యక్ష భాగస్వామిగా ఉండటం వల్ల సౌదీ అణు కార్యక్రమాలపై సమగ్ర పర్యవేక్షణ కొనసాగుతుందని, ఈ సాంకేతికత సైనిక అవసరాల కోసం మళ్లించబడకుండా నియంత్రించగలమనే అభిప్రాయాన్ని ట్రంప్ ప్రభుత్వం వ్యక్తం చేస్తోంది.
వివరాలు
అణు సాంకేతికత విస్తరణపై కాంగ్రెస్లో ఆందోళన
ఈ ఏడాది ఏప్రిల్లో జరిగిన సౌదీ పర్యటన సందర్భంగా అమెరికా ఇంధనశాఖ మంత్రి క్రిస్ రైట్, సౌదీ ఇంధన మంత్రి ప్రిన్స్ అబ్దుల్ అజీజ్ బిన్ సల్మాన్ ఈ ఒప్పందానికి సంబంధించిన ప్రాథమిక చర్చలు నిర్వహించారు.
త్వరలోనే వీరిద్దరూ అధికారిక ఒప్పంద పత్రాలపై సంతకాలు చేయనున్నారు.
చమురు ఆధారిత ఇంధన వినియోగాన్ని క్రమంగా తగ్గిస్తూ ప్రత్యామ్నాయ విద్యుత్ వనరులను విస్తరించాలన్న సౌదీ అరేబియా లక్ష్యాలకు ఈ ఒప్పందం కీలకంగా మారనుంది.
అదే సమయంలో ఈ ఒప్పందాన్ని సమీక్ష కోసం త్వరలో అమెరికా కాంగ్రెస్కు పంపించనుండటంతో, పశ్చిమాసియాలో అణు సాంకేతిక పరిజ్ఞానం విస్తరణపై కాంగ్రెస్ సభ్యుల నుంచి తీవ్ర చర్చతో పాటు వ్యతిరేకత వ్యక్తమయ్యే అవకాశాలు కనిపిస్తున్నాయి.