Trump: 250 శాతం సుంకాల బెదిరింపుతోనే భారత్‌-పాక్‌ యుద్ధం ఆగింది: ట్రంప్
ఈ వార్తాకథనం ఏంటి
అమెరికా అధ్యక్షుడు డొనాల్డ్‌ ట్రంప్ మరోసారి భారత్‌-పాకిస్థాన్‌ సైనిక ఘర్షణను తానే ఆపానని చెప్పుకున్నారు. ఇరు దేశాలు పోరాటాన్ని కొనసాగిస్తే అమెరికాతో వాణిజ్యం చేయలేవని, 250 శాతం సుంకాలు విధిస్తానని హెచ్చరించినట్లు తెలిపారు. ఆ ఒత్తిడితోనే రెండు దేశాలు కాల్పులు ఆపాయని పేర్కొన్నారు. అయితే, భారత్‌-పాక్‌ ఘర్షణలో 11 విమానాలు కూలిపోయాయన్న ట్రంప్ వాదనలను భారత్‌ ఖండిస్తోంది. ద్వైపాక్షిక సమస్యల పరిష్కారంలో మూడో దేశం జోక్యాన్ని కూడా వ్యతిరేకిస్తోంది. తాను అంతర్జాతీయంగా ఎనిమిది యుద్ధాలను పరిష్కరించానని ట్రంప్ పేర్కొన్నారు. ఇన్ని దౌత్యపరమైన ప్రయత్నాలు చేసినప్పటికీ తనకు నోబెల్‌ శాంతి బహుమతి రాలేదంటూ అసంతృప్తి వ్యక్తం చేశారు. వివిధ దేశాల మధ్య ఘర్షణలను నివారించడంలో తన పాత్ర కీలకమని ఆయన మరోసారి చెప్పుకున్నారు.
వివరాలు
ఇరాన్‌పై మరో దాడికి సంకేతాలు
ఇరాన్‌ దౌత్యపరమైన ఒప్పందానికి అంగీకరించకపోతే అమెరికా మరోసారి దాడి చేసే అవకాశం ఉందని ట్రంప్ హెచ్చరించారు.
ఫ్లోరిడాలో జరిగిన మధ్యంతర ఎన్నికల ప్రచార సభలో మాట్లాడుతూ, ఒప్పందానికి అంగీకరించేలా ఒత్తిడి తెచ్చేందుకు మరో చిన్న 'ఎపిక్‌ ఫ్యూరీ' సైనిక చర్య చేపట్టవచ్చన్నారు.
లేదంటే ఇరాన్‌ ఒప్పందానికి రావాలని వ్యాఖ్యానించారు. ఇరాన్‌ నాయకత్వం తెలివిగా వ్యవహరిస్తుందన్న నమ్మకం తనకు లేదంటూ ఎద్దేవా చేశారు.
వివరాలు
క్యూబాపైనా ట్రంప్ వ్యాఖ్యలు
ఇరాన్‌ యుద్ధం నుంచి తిరిగొచ్చే అమెరికా యుద్ధనౌకలు క్యూబా సమీపంలో ఆగవచ్చని ట్రంప్ వ్యాఖ్యానించారు.
ఓ యుద్ధనౌకను తీరానికి సుమారు 50 గజాల దూరంలో నిలిపితే, క్యూబా లొంగిపోతుందని, ఆ తర్వాత మార్కో రూబియోను లోపలికి పంపుతామని అన్నారు.
ఈ వ్యాఖ్యలపై క్యూబా విదేశాంగ మంత్రి బ్రూనో రోడ్రిగ్జ్‌ తీవ్రంగా స్పందించారు.
క్యూబాపై అమెరికా ఆధిపత్య ప్రయత్నాలకు సంబంధించిన బెదిరింపులను తిరస్కరిస్తున్నట్లు ఎక్స్‌లో పేర్కొన్నారు.
తమ దేశంలో అందమైన బీచ్‌లతో పాటు, శత్రుపూరిత ఉద్దేశాలతో వచ్చేవారిని అడ్డుకునే దృఢమైన వైఖరి కూడా ఉందని స్పష్టం చేశారు.