Trump: బిల్‌ మహర్‌పై ట్రంప్‌ ఫైర్‌.. ట్రూత్‌ సోషల్‌లో అత్యంత సుదీర్ఘ పోస్ట్
ఈ వార్తాకథనం ఏంటి
అమెరికా అధ్యక్షుడు డొనాల్డ్‌ ట్రంప్‌ తన సోషల్‌ మీడియా వేదిక ట్రూత్‌ సోషల్‌లో ఇప్పటివరకు రాసిన అత్యంత సుదీర్ఘమైన పోస్ట్ ఇప్పుడు చర్చనీయాంశంగా మారింది. థర్డ్‌ పార్టీ ట్రాకింగ్‌ సంస్థ ఫ్యాక్ట్‌బేస్‌, సీఎన్‌ఎన్‌ వెల్లడించిన వివరాల ప్రకారం.. ట్రంప్‌ ఏకంగా 1,323 పదాలతో ఓ పోస్ట్ పెట్టారు. ప్రముఖ హాస్యనటుడు బిల్‌ మహర్‌,ఆయన వ్యాపార భాగస్వామి చక్‌ లాబెల్లా,హెచ్‌బీఓ సంస్థను లక్ష్యంగా చేసుకుని ఈ వ్యాఖ్యలు చేశారు. బిల్‌ మహర్‌ను ఉద్దేశించి ట్రంప్‌ తీవ్ర పదజాలంతో విరుచుకుపడ్డారు. ఆయనను పూర్తిగా ఓడిపోయిన వ్యక్తి అంటూ క్యాపిటల్‌ లెటర్స్‌లో వ్యాఖ్యానించారు. ఇదే సమయంలో వైట్‌హౌస్‌లో మీడియా ప్రతినిధులు పనిచేసే కార్యాలయాన్ని మరోచోటుకు మార్చే ఆలోచన చేస్తున్నట్లు వచ్చిన వార్తలపై కూడా ట్రంప్‌ స్పందించారు.
వివరాలు
ట్రంప్‌ స్పందనకు కారణమైన బిల్‌ మహర్‌ షో
మరింత స్థలం అందుబాటులోకి తీసుకురావడానికే ఈ నిర్ణయాన్ని పరిశీలిస్తున్నట్లు తెలిపారు.
అక్టోబర్‌ 15న వైట్‌హౌస్‌లో ట్రంప్‌తో కలిసి విందులో పాల్గొన్న బిల్‌ మహర్‌.. ఆ తర్వాత తొలిసారిగా తన 'రియల్‌ టైమ్‌' కార్యక్రమంలో కనిపించారు.
ఆ షోలో మహర్‌ చేసిన వ్యాఖ్యలే ట్రంప్‌ తాజా ఆగ్రహానికి కారణమయ్యాయి.
విందు అనంతరం ట్రంప్‌ ఆ సమావేశాన్ని అద్భుతంగా అభివర్ణించారు.
ప్రజలు అనుకుంటున్న దానికంటే బిల్‌ మహర్‌కు తనంటే ఎక్కువ ఇష్టమని కూడా వ్యాఖ్యానించారు.
అయితే మహర్‌ కార్యక్రమాన్ని చూసిన తర్వాత ట్రంప్‌ వైఖరి పూర్తిగా మారిపోయింది.
ఇకపై ఆయన షోను ఎప్పటికీ చూడబోనని స్పష్టం చేశారు. ఆ కార్యక్రమం మొత్తం నకిలీ వార్తలతో నిండి ఉందని ఆరోపించారు.
వివరాలు
బిల్‌ మహర్‌ జోక్స్ కు ఎవరూ నవ్వరు
బిల్‌ మహర్‌పై ట్రంప్‌ చేసిన వ్యాఖ్యల్లో ప్రతీకార ధోరణి కనిపించింది.
మహర్‌ కార్యక్రమానికి రిపబ్లికన్లు మద్దతు ఇవ్వకుండా చూస్తానని ఆయన పేర్కొన్నారు.
మహర్‌ షోలో ప్రేక్షకులు నవ్వుతున్న తీరుపైనా ట్రంప్‌ సందేహాలు వ్యక్తం చేశారు.
ఆ కార్యక్రమంలో ప్రత్యేకంగా నవ్వులు వినిపించే 'లాఫ్టర్‌ మెషీన్‌'ను ఉపయోగిస్తున్నారా? అంటూ ప్రశ్నించారు.
మహర్‌ తనతో అబద్ధం చెప్పారని, ఆయన ప్రతిదాని గురించి అబద్ధాలు చెబుతుంటారని ట్రంప్‌ ఆరోపించారు.
తన కార్యక్రమంలో దాదాపు ప్రతి మాటకూ చప్పట్లు, నవ్వులు వినిపిస్తున్నాయని, అసలు మహర్‌ చెప్పే మాటలకు ప్రజలు నిజంగానే నవ్వుతున్నారా? అని ప్రశ్నించారు.
ఈ వ్యాఖ్యలతో బిల్‌ మహర్‌ షోపై ట్రంప్‌ తన అసంతృప్తిని బహిరంగంగా వ్యక్తం చేశారు.
వివరాలు
2011 తర్వాత ట్రంప్‌ చేసిన అత్యంత సుదీర్ఘ పోస్ట్ ఇదే!
బిల్‌ మహర్‌పై ట్రంప్‌ రాసిన ఈ పోస్ట్ ఆయన గతంలో చేసిన రెండో అత్యంత సుదీర్ఘ పోస్ట్ కంటే దాదాపు రెట్టింపు పొడవు కలిగి ఉంది.
ఫ్యాక్ట్‌బేస్‌ వివరాల ప్రకారం.. ఈ ఏడాది మేలో ట్రంప్‌ 723 పదాలతో ఓ పోస్ట్ చేశారు. ఇప్పటివరకు అదే ఆయన రెండో అతిపెద్ద పోస్ట్‌గా ఉంది.
తాజాగా బిల్‌ మహర్‌ను లక్ష్యంగా చేసుకుని రాసిన 1,323 పదాల వ్యాసం.. 2011 నుంచి ట్రంప్‌ చేసిన మొత్తం 97,455 సోషల్‌ మీడియా పోస్టుల్లోనే అత్యంత సుదీర్ఘమైనదని ఫ్యాక్ట్‌బేస్‌ నిర్వాహకులు ఎక్స్‌ వేదికగా వెల్లడించారు.