UAE scam alert: యూఏఈలో భారతీయులకు ఎంబసీ హెచ్చరిక.. బయోమెట్రిక్ వివరాలు ఇవ్వొద్దు
ఈ వార్తాకథనం ఏంటి
యూఏఈలో నివసిస్తున్న భారతీయులు అనధికారిక ఏజెంట్ల విషయంలో అప్రమత్తంగా ఉండాలని దుబాయ్లోని భారత రాయబార కార్యాలయం హెచ్చరించింది. వీసా క్రమబద్ధీకరణ, అత్యవసర ధ్రువపత్రాల జారీ, ఎగ్జిట్ పర్మిట్లు, ఎమిరేట్స్ ఐడీ, ఉపాధి విషయంలో సహాయం చేస్తామంటూ నమ్మించే వ్యక్తులను విశ్వసించవద్దని సూచించింది. ముఖ్యంగా బ్లూకాలర్ ఉద్యోగులు ఇలాంటి ఏజెంట్ల చేతిలో మోసపోతున్న ఘటనలు వెలుగులోకి రావడంతో ఈ హెచ్చరిక జారీ చేసినట్లు తెలిపింది.
వివరాలు
నకిలీ ఏజెంట్లు.. బయోమెట్రిక్ డేటాతో మోసాలు
కొంతమంది నకిలీ ఏజెంట్లు బాధితుల అనుమతి లేకుండానే వారి బయోమెట్రిక్ వివరాలను సేకరిస్తున్నట్లు కథనాలు వెలువడ్డాయి.
అనంతరం ఆ సమాచారాన్ని ఉపయోగించి బాధితులకు తెలియకుండానే ఆర్థిక లావాదేవీలు నిర్వహిస్తున్నట్లు తెలుస్తోంది.
వారి పేర్లతో బ్యాంకు ఖాతాలు తెరవడం, రుణాలు తీసుకోవడం, క్రెడిట్ కార్డులు పొందడం వంటి మోసాలకు పాల్పడుతున్నట్లు సమాచారం.
దీంతో తమ బయోమెట్రిక్ వివరాలను ఎవరితోనూ పంచుకోవద్దని భారతీయులకు రాయబార కార్యాలయం స్పష్టం చేసింది.
వివరాలు
ప్రభుత్వ కేంద్రాల్లోనే బయోమెట్రిక్ స్కాన్
ఎగ్జిట్ పర్మిట్లు, ఎమిరేట్స్ ఐడీలు, వీసా క్రమబద్ధీకరణ వంటి సేవల కోసం బయోమెట్రిక్ స్కాన్ తప్పనిసరిగా చేయాల్సిన పరిస్థితి ఉన్న భారతీయులు.. తమ ఫింగర్ప్రింట్, ఫేస్, ఐ స్కాన్ వంటి వివరాలను యూఏఈ ప్రభుత్వ అధికారిక కేంద్రాలు లేదా సంబంధిత కౌంటర్లలో మాత్రమే సమర్పించాలని రాయబార కార్యాలయం సూచించింది.
పాస్పోర్టు, అత్యవసర పత్రాలకు స్కాన్ తీసుకోరు
భారత పాస్పోర్టులు లేదా అత్యవసర ధ్రువపత్రాల జారీ ప్రక్రియలో భాగంగా దుబాయ్, అబుధాబిలోని భారత రాయబార కార్యాలయాలు దరఖాస్తుదారుల నుంచి ఫింగర్ప్రింట్, ఫేస్, ఐ స్కాన్ వంటి బయోమెట్రిక్ వివరాలను తీసుకోవడం లేదని స్పష్టం చేసింది.
అందువల్ల రాయబార కార్యాలయం పేరుతో బయోమెట్రిక్ డేటా అడిగే ఏజెంట్లను నమ్మవద్దని హెచ్చరించింది.
వివరాలు
అనుమానం ఉంటే వెంటనే ధ్రువీకరించుకోండి
రాయబార కార్యాలయం పేరుతో ఎవరైనా బయోమెట్రిక్ వివరాలు అడిగినా, ఇతర అనుమానాస్పద పరిస్థితులు ఎదురైనా వెంటనే అధికారిక మార్గాల్లో వివరాలను ధ్రువీకరించుకోవాలని సూచించింది.
ఇందుకోసం ప్రవాసీ భారతీయ సహాయత కేంద్రం సంప్రదింపు వివరాలను కూడా షేర్ చేసింది.
టోల్ఫ్రీ నంబర్ 80046342, వాట్సప్ లేదా ఎస్ఎంఎస్ కోసం 00971543090571, అలాగే pbsk.dubai@mea.gov.in ద్వారా సంప్రదించవచ్చని తెలిపింది.
తమకు మోసం జరిగినట్లు అనుమానం వచ్చినా, అనధికారిక వ్యక్తులు బయోమెట్రిక్ వివరాలు సేకరించినట్లు తెలిసినా ఆలస్యం చేయకుండా వెంటనే సంబంధిత అధికారులకు సమాచారం ఇవ్వాలని రాయబార కార్యాలయం భారతీయులను కోరింది.