Ukrainian strikes: రష్యా చమురు కేంద్రాలపై ఉక్రెయిన్ భారీ దాడులు..
ఈ వార్తాకథనం ఏంటి
రష్యా-ఉక్రెయిన్ యుద్ధం మరోసారి తీవ్రరూపం దాల్చింది.రష్యాలోని కీలక చమురు కేంద్రాలను లక్ష్యంగా చేసుకుని ఉక్రెయిన్ దాడులకు దిగింది. దక్షిణ రష్యాలోని క్రాస్నోడార్ క్రాయ్తో పాటు రష్యా ఆధీనంలో ఉన్న క్రిమియాలోని చమురు క్షేత్రాలపై దాడులు నిర్వహించినట్లు ఉక్రెయిన్ జనరల్ స్టాఫ్ వెల్లడించింది. ఈ ప్రాంతంలోని చమురు సముదాయం దక్షిణ రష్యాలో చమురు,పెట్రోలియం ఉత్పత్తుల నిల్వలు, రవాణాకు కీలక కేంద్రంగా గుర్తింపు పొందింది. ఈ దాడులతో రష్యా ఇంధన సరఫరా వ్యవస్థపై ప్రభావం చూపడమే ఉక్రెయిన్ లక్ష్యంగా భావిస్తున్నారు. మరోవైపు రష్యా భూభాగాలతో పాటు రష్యా ఆక్రమిత ఉక్రెయిన్ ప్రాంతాలపై కూడా డ్రోన్లతో దాడులు జరిగాయి. ఈ ఘటనల్లో ఇద్దరు పౌరులు మృతి చెందగా, మరో 18 మంది గాయపడినట్లు స్థానిక అధికారులు వెల్లడించారు.
వివరాలు
ఉక్రెయిన్పై రష్యా భారీగా డ్రోన్ దాడులు
ఇదిలా ఉండగా, ఆదివారం రాత్రి నుంచి సోమవారం తెల్లవారుజాము వరకు మాస్కో ప్రాంతం, పశ్చిమ, నైరుతి రష్యా, రష్యా ఆక్రమిత క్రిమియా, నల్ల సముద్రం, అజోవ్ సముద్ర ప్రాంతాలపై ఉక్రెయిన్ ప్రయోగించిన 310 డ్రోన్లను తమ వైమానిక దళాలు కూల్చివేశాయని రష్యా రక్షణ మంత్రిత్వ శాఖ ప్రకటించింది. అదే సమయంలో రష్యా కూడా ఉక్రెయిన్పై భారీగా డ్రోన్ దాడులు చేసింది. మొత్తం 155 డ్రోన్లతో దాడులకు పాల్పడగా, వాటిలో 124 డ్రోన్లను తమ వైమానిక రక్షణ వ్యవస్థలు విజయవంతంగా ధ్వంసం చేశాయని ఉక్రెయిన్ వైమానిక దళం వెల్లడించింది. ఇరు దేశాలు పరస్పరం డ్రోన్ దాడులను మరింత ఉధృతం చేయడంతో యుద్ధం కొత్త దశలోకి ప్రవేశిస్తున్న సంకేతాలు కనిపిస్తున్నాయి.