Diwali Day Act:అమెరికాలో దీపావళికి అధికారిక సెలవు.. ప్రతినిధుల సభలో బిల్లు
ఈ వార్తాకథనం ఏంటి
అమెరికాలో దీపావళి పండుగకు జాతీయ స్థాయిలో అధికారిక సెలవు ప్రకటించే దిశగా మరో ముందడుగు పడింది. ఈ మేరకు దీపావళిని ఫెడరల్ హాలిడేగా గుర్తించాలని కోరుతూ అమెరికా కాంగ్రెస్‌లో మరోసారి బిల్లు ప్రవేశపెట్టారు. కాంగ్రెస్ సభ్యురాలు గ్రేస్ మెంగ్ నేతృత్వంలో పలువురు చట్టసభ సభ్యులు 'దీపావళి డే యాక్ట్' పేరుతో ఈ బిల్లును ప్రతినిధుల సభలో ప్రవేశపెట్టారు. ఈ ప్రతిపాదనకు భారత సంతతికి చెందిన ఐదుగురు కాంగ్రెస్ సభ్యులు రాజా కృష్ణమూర్తి, సుహాస్ సుబ్రహ్మణ్యం, శ్రీ థానేదార్, రో ఖన్నా, అమీ బేరాతో పాటు మొత్తం 19 మంది సభ్యులు మద్దతు తెలిపారు.
వివరాలు
పెరుగుతున్న విద్వేష దాడుల నేపథ్యంలో కీలక పరిణామం
కాంగ్రెషనల్ ఏషియన్ పసిఫిక్ అమెరికన్ కాకస్ చైర్‌పర్సన్‌గా వ్యవహరిస్తున్న గ్రేస్ మెంగ్ ఈ బిల్లు గురించి మాట్లాడుతూ.. దీపావళి పండుగ ప్రాముఖ్యతను అమెరికా ప్రజలకు తెలియజేయడంతో పాటు దేశంలో అన్ని వర్గాలకు సమాన గౌరవం లభించే వాతావరణాన్ని ప్రోత్సహించేందుకు ఈ చట్టం ఉపయోగపడుతుందని ఆశాభావం వ్యక్తం చేశారు.
దీపావళి అనేది చెడుపై మంచి, అజ్ఞానంపై జ్ఞానం సాధించిన విజయానికి ప్రతీక అని గ్రేస్ మెంగ్ పేర్కొన్నారు.
ప్రస్తుతం అమెరికాలో హిందువులు, దక్షిణాసియా ప్రజలపై విద్వేష ఘటనలు పెరుగుతున్నాయని ఆందోళన వ్యక్తం చేశారు.
ఇలాంటి పరిస్థితుల్లో దీపావళిని ఫెడరల్ హాలిడేగా గుర్తించడం ద్వారా హిందువులు, సిక్కులు, జైనులు, బౌద్ధులు అమెరికా సమాజంలో గౌరవనీయమైన భాగమనే సందేశం బలంగా వెళ్తుందని వివరించారు.
వివరాలు
చట్టం అమలైతే 12వ ఫెడరల్ హాలిడేగా దీపావళి
ఈ బిల్లు ఆమోదం పొంది చట్టంగా మారితే అమెరికాలో దీపావళి 12వ ఫెడరల్ హాలిడేగా చేరనుంది.
ఇందుకోసం అమెరికా చట్టంలోని యూఎస్ కోడ్ టైటిల్ 5లో మార్పులు చేసి, అధికారిక ప్రభుత్వ సెలవుల జాబితాలో 'దీపావళి డే'ను చేర్చాలని ప్రతిపాదించారు.
హిందువులతో పాటు సిక్కులు, జైనులు, బౌద్ధులు, దక్షిణాసియా, ఆగ్నేయాసియా, ఇండో-కరేబియన్ ప్రాంతాలకు చెందిన ప్రజలు కూడా దీపావళి పండుగను జరుపుకుంటారని ఈ బిల్లుకు మద్దతు ఇస్తున్న సభ్యులు పేర్కొన్నారు.
వివరాలు
చట్టం అమలైతే 12వ ఫెడరల్ హాలిడేగా దీపావళి
ఇటీవలి కాలంలో అమెరికాలో హిందూ దేవాలయాలపై దాడులు, ఇల్లినాయిస్‌లో హిందువుల సమావేశాన్ని లక్ష్యంగా చేసుకుని సామూహిక కాల్పులకు కుట్ర, వాషింగ్టన్‌లో నిర్వహించిన దీపావళి వేడుకలకు అంతరాయం కలిగించడం వంటి ఘటనలు చోటుచేసుకున్నాయి.
ఈ నేపథ్యంలో వివిధ మత, సామాజిక వర్గాలకు చెందిన ప్రజల పండుగగా దీపావళిని అధికారికంగా గుర్తించాలనే ప్రతిపాదనకు ప్రాధాన్యత ఏర్పడింది.
ఏషియన్ అమెరికన్స్ అడ్వాన్సింగ్ జస్టిస్, కోయలిషన్ ఆఫ్ హిందూస్ ఆఫ్ నార్త్ అమెరికా, సిఖ్ కోయలిషన్ వంటి పలు సంస్థలు కూడా ఈ బిల్లుకు మద్దతు ప్రకటించాయి.
గతంలోనూ గ్రేస్ మెంగ్ ఇదే తరహాలో లూనార్ న్యూ ఇయర్ పండుగకు అధికారిక గుర్తింపు కల్పించే చట్టం తీసుకొచ్చేందుకు ప్రయత్నించిన విషయం తెలిసిందే.