USS Doris Miller or 'USS Donald Trump':USS డోరిస్ మిల్లర్కు బదులు 'USS డొనాల్డ్ ట్రంప్'? నివేదికలో కీలక అంశాలు
ఈ వార్తాకథనం ఏంటి
అమెరికా నౌకాదళంలో నిర్మాణంలో ఉన్న భవిష్యత్ విమాన వాహక నౌక CVN-81 పేరు మారే అవకాశాలు కనిపిస్తున్నాయి. ప్రస్తుతం ఈ నౌకకు 'USS డోరిస్ మిల్లర్'గా పేరు పెట్టాలని నిర్ణయించారు. అయితే ఇప్పుడు ఆ పేరును మార్చే ప్రయత్నాలు జరుగుతున్నాయని CNNకు రెండు వర్గాలు తెలిపినట్లు నివేదిక వెల్లడించింది. కొత్త పేరుపై స్పష్టత లేకపోయినప్పటికీ.. అంతర్గత చర్చల్లో అమెరికా అధ్యక్షుడు డొనాల్డ్ ట్రంప్ పేరును నౌకకు పెట్టే అంశం కూడా ప్రస్తావనకు వచ్చినట్లు సమాచారం.
వివరాలు
డోరిస్ మిల్లర్కు అరుదైన గౌరవం.. 'మెడల్ ఆఫ్ ఆనర్'కు నేవీ సిఫార్సు
అలా జరిగితే అమెరికా చరిత్రలోనే ఒక కొత్త సంప్రదాయానికి తెరలేచినట్లవుతుంది.
ఎందుకంటే పదవిలో ఉన్న అధ్యక్షుడి పేరును విమాన వాహక నౌకకు పెట్టడం ఇదే తొలిసారి అవుతుంది.
ట్రంప్ తొలి అధ్యక్ష పదవీకాలంలో ఈఫోర్డ్-క్లాస్ విమాన వాహక నౌకకు'USS డోరిస్ మిల్లర్'గా పేరు పెట్టారు.
పర్ల్ హార్బర్పై జపాన్ దాడి సమయంలో అసాధారణ ధైర్యసాహసాలు ప్రదర్శించిన నల్లజాతి నౌకాదళ సిబ్బంది డోరిస్ మిల్లర్ను గౌరవించేందుకు ఈ పేరు పెట్టారు.
అయితే డోరిస్ మిల్లర్ పేరు పూర్తిగా తొలగిపోకుండా మరో యుద్ధనౌకకు ఆయన పేరు పెట్టాలని నౌకాదళం భావిస్తున్నట్లు ఓ అధికారి వెల్లడించినట్లు CNN పేర్కొంది.
అంతేకాకుండా మిల్లర్కు అమెరికా సైనిక రంగంలో అత్యున్నత వీరపతకమైన'మెడల్ ఆఫ్ ఆనర్' అందించాలని నౌకాదళం సిఫార్సు చేస్తోంది.
వివరాలు
డోరిస్ మిల్లర్ పేరుకు చారిత్రక ప్రాధాన్యం
అయితే ఈ పురస్కారానికి తుది అనుమతి కాంగ్రెస్, అధ్యక్షుడు ట్రంప్ నుంచి రావాల్సి ఉంటుంది.
ఈ విషయంపై ప్రస్తుతం ప్రకటించేందుకు ఏమీ లేదని అమెరికా రక్షణ శాఖ ప్రతినిధి CNNకు తెలిపారు.
'USS డోరిస్ మిల్లర్' అనే పేరు ఎన్నో కారణాలతో చారిత్రక ప్రాధాన్యం కలిగింది.
ఒక విమాన వాహక నౌకకు నౌకాదళంలో పనిచేసిన సాధారణ సిబ్బంది పేరు పెట్టడం ఇదే తొలిసారి.
అలాగే ఆఫ్రికన్-అమెరికన్ వ్యక్తి పేరును విమాన వాహక నౌకకు పెట్టడం కూడా ఇదే మొదటిసారి.
సాధారణంగా అమెరికా విమాన వాహక నౌకలకు మాజీ అధ్యక్షులు, ప్రముఖ సైనికాధికారులు లేదా రాజకీయ నాయకుల పేర్లు పెడుతుంటారు.
వివరాలు
పేరు మార్పుపై కసరత్తు.. ఇక 'USS డోరిస్ మిల్లర్' కాదు!
ఈ నౌక పేరు మార్చే ప్రక్రియ ఈ ఏడాది ప్రారంభం నుంచే కొనసాగుతోందని రెండు వర్గాలు తెలిపినట్లు నివేదిక పేర్కొంది.
నౌకాదళ తాత్కాలిక కార్యదర్శి హంగ్ కావో,ఆయన కార్యాలయం కూడా యుద్ధనౌకలకు పేర్లు పెట్టే విధానాన్ని మార్చే అంశాన్ని పరిశీలిస్తున్నట్లు సమాచారం.
ముఖ్యంగా అధ్యక్షులు సహా ఎలాంటి వ్యక్తుల పేర్లను నౌకలకు పెట్టవచ్చనే దానిపై అధికారిక మార్గదర్శకాలను నవీకరించే ప్రయత్నాలు జరుగుతున్నట్లు తెలుస్తోంది.
పేరు మార్పుపై చర్చలు మొదలైన తర్వాత నౌకాదళం అంతర్గతంగా 'USS డోరిస్ మిల్లర్' అనే పేరును ఉపయోగించడం దాదాపు ఆపేసినట్లు సమాచారం.
ప్రస్తుతం నౌకను దాని హల్ నంబర్ 'CVN-81'తోనే పిలుస్తున్నట్లు రెండు వర్గాలు తెలిపాయి.
వివరాలు
డోరిస్ మిల్లర్ కుటుంబానికి తెలియకుండానే కీలక నిర్ణయాలు?
ఇటీవల వైట్హౌస్ జారీ చేసిన నౌకా నిర్మాణానికి సంబంధించిన కార్యనిర్వాహక ఉత్తర్వులో కూడా ఈ నౌకను 'CVN-81'గానే పేర్కొన్నట్లు CNN తెలిపింది.
ఇక డోరిస్ మిల్లర్ కుటుంబానికి ఈ పరిణామాలపై ముందస్తు సమాచారం లేదని ఆయన మేనల్లుడి కుమారుడు థామస్ బ్లెడ్సో CNNకు తెలిపారు.
మిల్లర్కు మెడల్ ఆఫ్ ఆనర్ ఇవ్వాలనే కొత్త ప్రయత్నం గురించి కూడా కుటుంబానికి తెలియదన్నారు.
అయితే ఎన్నో ఏళ్లుగా తమ కుటుంబం ఆయనకు ఈ అత్యున్నత సైనిక పురస్కారం ఇవ్వాలని ప్రయత్నిస్తోందని, నౌకాదళం ఇప్పుడు సిఫార్సు చేయడం చాలా సానుకూల పరిణామమని బ్లెడ్సో పేర్కొన్నారు.
వివరాలు
పర్ల్ హార్బర్ దాడిలో డోరిస్ మిల్లర్ వీరోచిత పోరాటం
ఈ విమాన వాహక నౌకకు ఈ ఏడాది చివర్లో కీల్ లేయింగ్ కార్యక్రమం నిర్వహించే అవకాశం ఉంది.
దీంతో పేరు ఖరారు చేయడానికి నౌకాదళంపై ఒత్తిడి పెరుగుతోంది. అయితే నౌక నిర్మాణంలో ఎదురవుతున్న ఇబ్బందుల కారణంగా ఇది 2034 వరకు అమెరికా నౌకాదళానికి అందుబాటులోకి వచ్చే అవకాశం లేదని USNI News గతంలో వెల్లడించింది.
డోరిస్ 'డోరీ' మిల్లర్ టెక్సాస్లోని వాకోకు చెందినవారు.ఆయన 1939లో అమెరికా నౌకాదళంలో చేరారు.
1941 డిసెంబర్ 7న జపాన్ పర్ల్ హార్బర్పై దాడి చేసిన సమయంలో ఆయన'మెస్ అటెండెంట్ థర్డ్ క్లాస్'గాపనిచేస్తున్నారు.
బాంబులు పడటం ప్రారంభమైనప్పుడు ఆయన బట్టలు సేకరిస్తున్నారు.
అప్పట్లో నల్లజాతి సిబ్బందికి నౌకాదళంలో అందుబాటులో ఉన్న కొద్దిపాటి ఉద్యోగాల్లో మెస్ అటెండెంట్ పని ఒకటి.
వివరాలు
పర్ల్ హార్బర్ దాడిలో మిల్లర్ అసమాన ధైర్యసాహసాలు
జపాన్ దాడి కారణంగా తనకు కేటాయించిన యుద్ధ స్థావరానికి వెళ్లే అవకాశం లేకపోవడంతో మిల్లర్ గాయపడిన తన కమాండింగ్ అధికారికి సహాయం చేశారు.
విమాన నిరోధక తుపాకీని ఎలా ఉపయోగించాలో శిక్షణ లేకపోయినా దాన్ని తన ఆధీనంలోకి తీసుకుని జపాన్ విమానాలపై కాల్పులు జరిపారు.
మందుగుండు సామగ్రి అయిపోయే వరకు ఆయన కాల్పులు కొనసాగించారు.
నౌక మునిగిపోతున్న సమయంలోనూ తోటి సిబ్బందిని రక్షించేందుకు ప్రయత్నించినట్లు అమెరికా వెటరన్స్ వ్యవహారాల శాఖ పేర్కొంది.
వివరాలు
మాకిన్ యుద్ధంలో మరణించిన మిల్లర్
1942లో అడ్మిరల్ చెస్టర్ నిమిట్జ్ ఆయనకు 'నేవీ క్రాస్' పురస్కారం అందించారు.
ఆ తర్వాత పలువురు శ్వేతజాతి సైనికులతో కలిసి యుద్ధ బాండ్ల ప్రచార కార్యక్రమంలో పాల్గొనే అవకాశం మిల్లర్కు లభించింది.
ఈ కార్యక్రమంలో ప్రసంగించేందుకు అనుమతి పొందిన తొలి ఆఫ్రికన్-అమెరికన్ వ్యక్తిగా ఆయన నిలిచారు.
అయితే దాదాపు ఏడాది తర్వాత మాకిన్ యుద్ధంలో మిల్లర్ ప్రాణాలు కోల్పోయారు.
జపాన్ జలాంతర్గామి నుంచి వచ్చిన టార్పెడో ఆయన ప్రయాణిస్తున్న నౌకను తాకడంతో ఆయన మరణించారు.
2001లో విడుదలైన 'Pearl Harbor' సినిమాలో నటుడు క్యూబా గుడింగ్ జూనియర్ డోరిస్ మిల్లర్ పాత్రను పోషించారు.