Venezuela airstrikes: వెనెజువెలా అధ్యక్షుడు మదురో మా అదుపులోనే ఉన్నారు: డొనాల్డ్ ట్రంప్
ఈ వార్తాకథనం ఏంటి
అమెరికా-వెనెజువెలా మధ్య తీవ్ర ఉద్రిక్తతలు నెలకొన్నాయి. యూఎస్ సైన్యం శనివారం తెల్లవారుజామున వెనెజువెలా రాజధాని కరాకస్పై భీకర వైమానిక దాడులు జరిపినట్లు సమాచారం. ఈదాడులు జరిగిన విషయాన్ని అమెరికా అధ్యక్షుడు డొనాల్డ్ ట్రంప్ తాజాగా అధికారికంగా ధ్రువీకరించారు. ఈ దాడుల అనంతరం వెనెజువెలా అధ్యక్షుడు నికోలస్ మదురోతో పాటు ఆయన సతీమణి అమెరికా కస్టడీలో ఉన్నారని ట్రంప్ వెల్లడించారు. వారిద్దరినీ వెనెజువెలా వెలుపలికి తరలించినట్లు కూడా ఆయన స్పష్టం చేశారు. ఈ పరిణామాలపై అమెరికా కాలమానం ప్రకారం ఉదయం 11 గంటలకు మీడియా సమావేశం నిర్వహించనున్నట్లు ట్రంప్ తన ట్రూత్ సోషల్ మీడియా వేదికగా పోస్టు చేశారు. ఈ ఆపరేషన్లో అమెరికా సైన్యానికి చెందిన డెల్టా ఫోర్స్ కీలక పాత్ర పోషించినట్లు సమాచారం.
Details
వారు సజీవంగా ఉన్నట్లు ఆధారాలను చూపించాలి
ఇదిలా ఉండగా, వెనెజువెలా అధ్యక్షుడిని అమెరికా కస్టడీలోకి తీసుకున్న విషయంపై ఆ దేశ ఉపాధ్యక్షుడు డెల్సీ రోడ్రిగ్జ్ స్పందించారు. మదురోతో పాటు ఆయన సతీమణి ప్రస్తుతం ఎక్కడ ఉన్నారో తమకు తెలియదని తెలిపారు. వారు సజీవంగా ఉన్నారని నిరూపించే ఆధారాలను చూపించాలని అమెరికాను డిమాండ్ చేశారు. 1989 తర్వాత లాటిన్ అమెరికా దేశంలో అమెరికా నేరుగా జోక్యం చేసుకోవడం ఇదే తొలిసారి కావడం గమనార్హం. ఆ ఏడాది పనామాపై దాడి చేసిన అమెరికా.. అక్కడి మిలిటరీ నేత మాన్యుయెల్ నోరిగాను పదవీచ్యుతుడిని చేసింది. ఈ పరిణామాల నేపథ్యంలో వెనెజువెలాకు పొరుగు దేశమైన కొలంబియా అప్రమత్తమైంది. సరిహద్దు ప్రాంతాల్లో భద్రతను కట్టుదిట్టం చేస్తూ అదనపు బలగాలను మోహరించింది.