Spain: స్పెయిన్‌లో రెండు రైళ్లు ఢీ.. సిగ్నల్‌ వ్యవస్థలో లోపమే కారణమా?
ఈ వార్తాకథనం ఏంటి
స్పెయిన్‌లో ఘోర రైలు ప్రమాదం చోటుచేసుకుంది. టోలెడో ప్రావిన్స్‌లోని ఉర్డా పట్టణం సమీపంలో మాడ్రిడ్‌-సెవిల్లా హైస్పీడ్‌ రైలు మార్గంలో రెండు రైళ్లు ఢీకొన్నాయి. ఈ ప్రమాదంలో కనీసం 68 మంది ప్రాణాలు కోల్పోగా.. 100 మందికి పైగా గాయపడ్డారు. మృతుల్లో 24 మంది రెన్ఫే రైలులో, 44 మంది ఇరియో రైలులో ప్రయాణిస్తున్నవారు ఉన్నారు. ప్రమాదానికి కంప్యూటర్‌ వ్యవస్థలో లోపం, మానవ తప్పిదం కారణమై ఉండొచ్చని అధికారులు ప్రాథమికంగా భావిస్తున్నారు.
వివరాలు
సిగ్నల్‌ వ్యవస్థలో లోపం.. కంట్రోలర్‌ తప్పిదంతోనే ప్రమాదమా?
స్పెయిన్‌ జాతీయ రైల్వే సంస్థ రెన్ఫేకు చెందిన హైస్పీడ్‌ రైలు.. ప్రైవేటు సంస్థ ఇరియోకు చెందిన నిలిచి ఉన్నరైలును వెనుక నుంచి ఢీకొట్టింది.
రైళ్ల రాకపోకలను నియంత్రించే ఎల్‌జెడ్‌బీ భద్రతా వ్యవస్థలో సాంకేతిక సమస్య తలెత్తడంతో సుమారు 63 కిలోమీటర్ల మార్గంలో రైళ్లు ఆటోమేటిక్‌గా నిలిచిపోయాయి.
ఆ తర్వాత రైల్వే నిర్వహణ సంస్థ ఏడీఐఎఫ్‌ అధికారులు వ్యవస్థను మాన్యువల్‌గా నియంత్రించారు.
ఈ సమయంలో ఎర్ర సిగ్నల్‌ ఉన్నప్పటికీ, రైలు కంట్రోలర్‌ నుంచి తప్పుగా వచ్చిన ఆదేశాల కారణంగా రెన్ఫే రైలుకు ముందుకు వెళ్లేందుకు అనుమతి లభించింది.
దీంతో ఆ రైలు గంటకు సుమారు 124 మైళ్ల వేగంతో ప్రయాణిస్తూ నిలిచి ఉన్న రైలును ఢీకొట్టినట్లు రవాణా మంత్రి ఆస్కార్‌ పుయెంటె వెల్లడించారు.
వివరాలు
సహాయక చర్యలు ముమ్మరం..
ప్రమాద సమయంలో ప్రయాణికులు సీట్ల నుంచి ఎగిరిపడ్డారని, బోగీల్లో తీవ్ర గందరగోళం నెలకొందని బాధితులు తెలిపారు.
కొన్ని బోగీల్లో మంటలు చెలరేగగా, మరికొన్నింటిలో ప్రయాణికులు శిథిలాల కింద చిక్కుకున్నారు.
సమాచారం అందుకున్న అధికారులు 500 మందికి పైగా సహాయక సిబ్బంది, అంబులెన్సులు, అగ్నిమాపక వాహనాలు, హెలికాప్టర్లను రంగంలోకి దించారు.
క్షతగాత్రులను ఆసుపత్రులకు తరలించారు. గాయపడినవారికి రక్తం అవసరం కావడంతో స్థానిక ప్రభుత్వం రక్తదానానికి పిలుపునిచ్చింది.
వివరాలు
స్పెయిన్‌లో జరిగిన మూడో ఘోర రైలు ప్రమాదం
స్పెయిన్‌ ప్రధాని పెడ్రో శాంచెజ్‌ బాధిత కుటుంబాలకు సానుభూతి తెలిపారు.
ప్రమాదంపై పూర్తిస్థాయి విచారణ జరిపిస్తామని, నిర్లక్ష్యం లేదా భద్రతా వ్యవస్థలో లోపాలు బయటపడితే కఠిన చర్యలు తీసుకుంటామని స్పష్టం చేశారు.
ఈ ఏడాది స్పెయిన్‌లో జరిగిన మూడో ఘోర రైలు ప్రమాదం ఇది.
జనవరిలో కార్డోబా ప్రావిన్స్‌లో జరిగిన ప్రమాదంలో 40 మందికి పైగా మరణించగా, బార్సిలోనా సమీపంలో జరిగిన మరో ప్రమాదంలో రైలు డ్రైవర్‌ ప్రాణాలు కోల్పోయారు.
వరుస ప్రమాదాలతో రైల్వే భద్రత, సాంకేతిక వ్యవస్థలు, నిర్వహణపై ఆందోళనలు వ్యక్తమవుతున్నాయి.
ప్రమాదం నేపథ్యంలో మాడ్రిడ్‌ నుంచి దక్షిణ అండలూసియా ప్రాంతానికి వెళ్లే రైలు మార్గంలో సేవలను నిలిపివేశారు.