White House : ట్రంప్ నిర్ణయాలతో పన్ను చెల్లింపుదారులకు ఊరట.. రికార్డు స్థాయిలో రీఫండ్లు
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ ప్రభుత్వం అమలు చేసిన పనిచేసే కుటుంబాల పన్నుకోతలు అమెరికా ప్రజలకు చారిత్రాత్మక స్థాయిలో ఊరటనిచ్చాయని వైట్హౌస్ వెల్లడించింది. బుధవారం నిర్వహించిన పన్నుల గడువు దినోత్సవం సందర్భంగా ఈ వివరాలను ప్రకటించింది. ఈమార్పులతో లక్షలాది కుటుంబాల చేతుల్లోకి నేరుగా నగదు చేరిందని ప్రభుత్వ ప్రతినిధులు తెలిపారు. పన్నుల దాఖలు కాలం ఈసారి ఎంతో సజావుగా జరిగిందని ఆర్థిక శాఖ తెలిపింది. ఈ పన్ను కోతల ద్వారా ప్రజలకు ఇప్పటివరకు లేని స్థాయిలో రీఫండ్లు అందినట్టు పేర్కొంది. అదనపు పని ద్వారా వచ్చిన ఆదాయం,సేవలపై అందే చెల్లింపులపై పన్ను రద్దు,వృద్ధులకు పెరిగిన మినహాయింపులు,దేశంలో తయారైన వాహనాల రుణాలపై వడ్డీ ఉపశమనం వంటి కీలక సడలింపులను కోట్లాది మంది వినియోగించుకున్నారని వివరించింది.
వివరాలు
5.3 కోట్ల మందికి పైగా కొత్త పన్ను ప్రయోజనాల క్లెయిమ్
ప్రజలే తమ సంపాదనను ఎలా వినియోగించుకోవాలో బాగా తెలుసనే నమ్మకంతో ఈ నిర్ణయాలు తీసుకున్నామని అధికారులు స్పష్టం చేశారు. ఆర్థిక శాఖ విడుదల చేసిన గణాంకాల ప్రకారం దాదాపు 5.3 కోట్ల మంది పన్ను చెల్లింపుదారులు ఈ కొత్త ప్రయోజనాల్లో కనీసం ఒకదాన్ని పొందారు. సగటున ఒక్కొక్కరికి 3,400 డాలర్లకు పైగా రీఫండ్ లభించింది. ఇందులో అత్యధికంగా 2.5 కోట్ల మంది అదనపు పని ఆదాయంపై మినహాయింపును పొందగా, 60 లక్షల మందికి పైగా సేవలపై చెల్లింపుల పన్ను రద్దు లబ్ధి అందింది. సుమారు 3 కోట్ల మంది వృద్ధులు ఒక్కొక్కరికి సగటున 7,500 డాలర్ల చొప్పున పెరిగిన మినహాయింపులను ఉపయోగించుకున్నారు.
వివరాలు
10.5 కోట్ల మంది ప్రయోజనం
ఇక పిల్లల కోసం ఇచ్చే పన్ను రాయితీ విస్తరణతో 3.4 కోట్ల కుటుంబాలు లాభపడగా, శాశ్వతంగా రెట్టింపు చేసిన సాధారణ మినహాయింపుతో 10.5 కోట్ల మంది ప్రయోజనం పొందారు. Internal Revenue Serviceలో డిజిటల్ సేవలను పెంచి పన్ను దాఖలాల పరిశీలన వేగవంతం చేసినట్టు తెలిపారు. పిల్లల్లో పొదుపు అలవాటు, ఆర్థిక అవగాహన పెంచేందుకు కొత్తగా ప్రవేశపెట్టిన ట్రంప్ ఖాతాలకు మంచి స్పందన లభిస్తున్నట్టు ప్రభుత్వం వెల్లడించింది.