Mumbai-Pune Expressway: ఫోటోలు కోసం వాహనం ఆపితే జరిమానా.. 'మిస్సింగ్ లింక్'పై పోలీసుల కఠిన చర్యలు
ఈ వార్తాకథనం ఏంటి
మహారాష్ట్రలో కొత్తగా ప్రారంభమైన ముంబై-పుణే ఎక్స్ప్రెస్వే 'మిస్సింగ్ లింక్' మార్గంపై సెల్ఫీలు, ఫోటోలు కోసం వాహనాలను ఆపుతున్న వారిపై హైవే పోలీసులు కఠిన చర్యలు ప్రారంభించారు. ఈ విషయాన్ని ఆదివారం ఓ ఉన్నతాధికారి వెల్లడించారు. మొత్తం 13.3 కిలోమీటర్ల పొడవున్న ఈ 'మిస్సింగ్ లింక్' మార్గం, భోర్ ఘాట్ ప్రాంతంలోని క్లిష్టమైన వంపులను తప్పించుకుని, ముంబై-పుణే ప్రయాణ సమయాన్ని 25 నుంచి 30 నిమిషాల వరకు తగ్గిస్తుంది. ఈ ప్రాజెక్టును మే 1న మహారాష్ట్ర ముఖ్యమంత్రి దేవేంద్ర ఫడ్నవీస్ ప్రారంభించారు. మహారాష్ట్ర స్టేట్ రోడ్ డెవలప్మెంట్ కార్పొరేషన్ (MSRDC) ఆధ్వర్యంలో రూపొందించిన ఈ ప్రాజెక్టును 'ఇంజినీరింగ్ అద్భుతం'గా పేర్కొంటున్నారు.
వివరాలు
ఈ మార్గంలో వాహనాలు ఆపడం పూర్తిగా నిషేధం
ఇందులో రెండు సొరంగాలు, రెండు వైడక్ట్లు, టైగర్ వ్యాలీపై నిర్మించిన కేబుల్-స్టేడ్ వంతెన ఉన్నాయి. ఈ సుందర దృశ్యాల కారణంగా కొంతమంది ప్రయాణికులు వాహనాలను ఆపి ఫోటోలు, సెల్ఫీలు దిగుతున్నారు. అయితే హైవే పోలీసులు ఈ మార్గంలో వాహనాలను ఆపడం పూర్తిగా నిషేధించారు. ఈ నిబంధనలను ఉల్లంఘించే వారిపై జరిమానాలతో పాటు క్రిమినల్ కేసులు కూడా నమోదు చేసే అవకాశముందని హెచ్చరించారు. "హై-స్పీడ్ కారిడార్లో ఫోటోలు తీసేందుకు వాహనాలను ఆపుతున్న ఘటనలు అనేకం వెలుగులోకి వచ్చాయి. ఈ మార్గంలో వాహనాలు సాధారణంగా గంటకు 100-120 కిలోమీటర్ల వేగంతో ప్రయాణిస్తాయి.
వివరాలు
గతంలో రోజూ ప్రమాదాలు జరిగేవి
ఇలాంటి పరిస్థితుల్లో ఆకస్మికంగా వాహనాలు ఆపడం ప్రమాదాలకు దారి తీస్తుందని అధికారులు తెలిపారు. ఈ కొత్త మార్గం ప్రారంభమైన తర్వాత ముంబై-పుణే మధ్య ట్రాఫిక్ ప్రవాహం గణనీయంగా మెరుగుపడిందని అధికారులు పేర్కొన్నారు. గతంలో రోజుకు 10 నుంచి 15 వరకు ప్రమాదాలు లేదా ట్రాఫిక్ జామ్లకు సంబంధించిన కాల్స్ కంట్రోల్ రూమ్కు వచ్చేవి. అయితే 'మిస్సింగ్ లింక్' ప్రారంభమైన తర్వాత ఇప్పటివరకు అలాంటి కాల్స్ నమోదు కాలేదని తెలిపారు.