Tata: ఎంజీ విండ్సర్‌కు చెక్ పెట్టేందుకు టాటా మాస్టర్ ప్లాన్
ఈ వార్తాకథనం ఏంటి
ఎలక్ట్రిక్ కార్ల మార్కెట్లో ఇప్పటికే మంచి పట్టున్న టాటా మోటార్స్‌.. మరో కొత్త మోడల్‌తో తన స్థానాన్ని మరింత బలోపేతం చేసుకునేందుకు సిద్ధమవుతున్నట్లు తెలుస్తోంది. ప్రస్తుతం ఎంజీ విండ్సర్‌కు పోటీగా నిలిచేలా 'కునో' అనే కోడ్‌నేమ్‌తో ఓ మిడ్‌సైజ్ ఎలక్ట్రిక్ ఎస్‌యూవీని అభివృద్ధి చేస్తున్నట్లు ఆటో మొబైల్ వర్గాల సమాచారం. సుమారు 4.3 మీటర్ల పొడవుండే ఈ కారు 2027-2028 మధ్య అధికారికంగా ఆవిష్కృతమయ్యే అవకాశం ఉంది. అయితే దీని అసలు పేరు, ధర, పూర్తి ఫీచర్లపై కంపెనీ ఇంకా స్పష్టత ఇవ్వలేదు.
Details
నెక్సాన్, సియెర్రా మధ్యలో కొత్త మోడల్
టాటా ఎలక్ట్రిక్ కార్ల విభాగంలో కునోకు ప్రత్యేక స్థానం కల్పించనున్నట్లు తెలుస్తోంది.
నెక్సాన్ తర్వాత, సియెర్రా ఈవీ కంటే దిగువ స్థాయిలో ఈ మోడల్‌ను తీసుకురావచ్చని అంచనా. ఇప్పటికే మార్కెట్లో ఉన్న కర్వ్ ఈవీ, సియెర్రా వంటి కార్లకు ఇది అదనపు ఎంపికగా మారనుంది.
ముఖ్యంగా కుటుంబ అవసరాలకు సరిపోయేలా విశాలమైన క్యాబిన్, సౌకర్యవంతమైన ప్రయాణం, రోజువారీ వినియోగానికి అనువైన ఫీచర్లపై టాటా దృష్టి పెట్టినట్లు సమాచారం.
అంటే కేవలం స్టైలిష్ లుక్ మాత్రమే కాకుండా, కుటుంబంతో ప్రయాణించే వారికి ఉపయోగపడేలా దీన్ని తీర్చిదిద్దే అవకాశం ఉంది.
Details
యాక్టీ.ఈవీ ప్లాట్‌ఫామ్‌తో ఎక్కువ స్థలం
కునోను టాటా ప్రత్యేకంగా అభివృద్ధి చేసిన Acti.ev ఎలక్ట్రిక్ ప్లాట్‌ఫామ్‌పై నిర్మించనున్నట్లు తెలుస్తోంది.
ఈ ప్లాట్‌ఫామ్‌లో ఫ్రంట్ వీల్ డ్రైవ్ (FWD), రియర్ వీల్ డ్రైవ్ (RWD), ఆల్ వీల్ డ్రైవ్ (AWD) వంటి విభిన్న డ్రైవ్ ఆప్షన్లకు అవకాశం ఉంది.
ఫ్లాట్ ఫ్లోర్, బ్యాటరీ అమరికలో మార్పుల వల్ల కారులో ప్రయాణికులకు ఎక్కువ స్థలం లభించవచ్చు.
అయితే బ్యాటరీ సామర్థ్యం, ఒక్కసారి ఛార్జ్ చేస్తే ప్రయాణించే దూరం, ఛార్జింగ్ సమయం వంటి వివరాలు ఇంకా వెల్లడికాలేదు.
Details
సనంద్ ప్లాంట్‌లో తయారీ.. భారీ లక్ష్యం
గుజరాత్‌లోని సనంద్ ప్లాంట్‌లో కునో తయారీ చేపట్టే అవకాశముంది. ఈ మోడల్ కోసం ఏడాదికి 80 వేల నుంచి లక్ష యూనిట్ల వరకు ఉత్పత్తి లక్ష్యంగా పరిశీలిస్తున్నట్లు సమాచారం.
ఇదే జరిగితే సనంద్ కేంద్రం టాటా ఈవీల తయారీలో కీలక పాత్ర పోషించనుంది. 2031 ఆర్థిక సంవత్సరం నాటికి తన ఎలక్ట్రిక్ కార్ల సంఖ్యను ఆరు నుంచి 10కి పెంచాలని టాటా లక్ష్యంగా పెట్టుకుంది.
కునో ధర కర్వ్ ఈవీ, సియెర్రా ఈవీ ధరల పరిధిలో ఉండవచ్చని అంచనా. అయితే అధికారిక ధరలు, ఫీచర్లు ప్రకటించే వరకు వీటిని అంచనాలుగానే చూడాలి.