Tesla: 2027 మధ్య నాటికి సైబర్‌ట్రక్‌ ఉత్పత్తిని నిలిపివేయనున్న టెస్లా
ఈ వార్తాకథనం ఏంటి
టెస్లా (Tesla) సంస్థ కీలక నిర్ణయం తీసుకుంది. 2027 మధ్య నాటికి అమెరికాలోని టెక్సాస్‌ గిగాఫ్యాక్టరీలో సైబర్‌ట్రక్‌ (Cybertruck) ఉత్పత్తిని నిలిపివేయాలని యోచిస్తోంది. ఈ విషయాన్ని సంస్థ సీఈఓ ఎలాన్‌ మస్క్‌ (Elon Musk) వెల్లడించారు. సైబర్‌ట్రక్‌ తయారీని తగ్గించి, రోబోట్యాక్సీ ప్రాజెక్టులో కీలకమైన సైబర్‌క్యాబ్‌ (Cybercab) ఉత్పత్తిని పెంచడంపై దృష్టి పెట్టాలని టెస్లా భావిస్తోంది. ఈ మేరకు మస్క్‌ ఎక్స్‌ (X) వేదికగా ఓ పోస్టు చేశారు. అయితే సైబర్‌ట్రక్‌ ఉత్పత్తిని మరో ప్రాంతానికి తరలిస్తారా? లేక పూర్తిగా నిలిపివేస్తారా? అనే విషయంపై ఆయన స్పష్టత ఇవ్వలేదు.
వివరాలు
మార్కెట్లో సైబర్‌ట్రక్‌కు ఎదురవుతున్న సవాళ్లు
2023లో విడుదలైనప్పటి నుంచి సైబర్‌ట్రక్‌ మార్కెట్లో ఆశించిన స్థాయిలో వినియోగదారుల ఆదరణ పొందలేకపోతోంది.
పలుమార్లు రీకాల్స్‌, నాణ్యతకు సంబంధించిన సమస్యలు ఈ వాహనాన్ని ఇబ్బందులకు గురిచేశాయి.
దీంతో టెస్లా తరచూ ధరల్లోనూ మార్పులు చేస్తూ వచ్చింది. ఇన్ని సమస్యలు ఎదురవుతున్నప్పటికీ సైబర్‌ట్రక్‌ భవిష్యత్తుపై మస్క్‌ ఆశాభావంతోనే ఉన్నారు.
ఫోర్డ్‌ (Ford) వంటి సంస్థలు తయారు చేస్తున్న సంప్రదాయ పికప్‌ ట్రక్కులకు సైబర్‌ట్రక్‌ గట్టి పోటీ ఇవ్వగలదని ఆయన భావిస్తున్నారు.
వివరాలు
సైబర్‌క్యాబ్‌, రోబోట్యాక్సీ నెట్‌వర్క్‌పై టెస్లా దృష్టి
టెస్లా భవిష్యత్తు ప్రణాళికల్లో సైబర్‌క్యాబ్‌కు మస్క్‌ అధిక ప్రాధాన్యం ఇస్తున్నారు.
సంస్థ ఏర్పాటు చేయాలనుకుంటున్న రోబోట్యాక్సీ నెట్‌వర్క్‌లో ఈ వాహనమే ప్రధాన సెల్ఫ్‌ డ్రైవింగ్‌ మోడల్‌గా ఉండనుంది.
ఇందుకోసం సైబర్‌క్యాబ్‌ ఉత్పత్తిని పెంచాలని కంపెనీ భావిస్తోంది.
రానున్న రోజుల్లో సరికొత్త సాంకేతికత, పర్యావరణానికి అనుకూలమైన రవాణా వ్యవస్థల అభివృద్ధిపై టెస్లా దృష్టి సారిస్తున్నట్లు ఈ నిర్ణయం స్పష్టం చేస్తోంది.