TVS Jupiter 110: కొత్త డ్యూయల్ టోన్ వేరియంట్ వచ్చేసింది.. ధర ఎంతంటే?
ఈ వార్తాకథనం ఏంటి
ప్రముఖ ద్విచక్ర వాహన తయారీ సంస్థ టీవీఎస్ మోటార్ కంపెనీ.. జూపిటర్ 110లో కొత్త డ్యూయల్ టోన్ స్పెక్ట్రల్ రేంజ్ను భారత మార్కెట్లో విడుదల చేసింది. ఈ కొత్త వేరియంట్ ఎక్స్-షోరూమ్ ధర రూ.89,825గా నిర్ణయించింది. జూపిటర్ 110 శ్రేణిలో ఇది టాప్-స్పెక్ వేరియంట్గా నిలవనుంది. కొత్త రంగులు, కొన్ని అదనపు ఫీచర్లను ఇందులో అందించినప్పటికీ.. ఇంజిన్, మెకానికల్ సెటప్లో ఎలాంటి మార్పులు చేయలేదు.
వివరాలు
రెండు కొత్త రంగుల్లో..
టీవీఎస్ జూపిటర్ 110 డ్యూయల్ టోన్ స్పెక్ట్రల్ రేంజ్ను రెండు రంగుల్లో అందిస్తోంది.
స్పెక్ట్రల్ బ్లూ, స్పెక్ట్రల్ కాపర్ కలర్ ఆప్షన్లు ఉన్నాయి. రెండు రంగుల్లోనూ డ్యూయల్ టోన్ పెయింట్ ట్రీట్మెంట్, కలర్-మ్యాచింగ్ ఇంటీరియర్ ప్యానెల్స్, కొత్త సీట్ ఫినిష్, మిర్రర్లపై పాక్షిక క్రోమ్ డీటైలింగ్ ఉన్నాయి.
స్పెక్ట్రల్ బ్లూ కలర్లో తెలుపుతో పాటు నీలం, పర్పుల్ షేడ్స్ ఉంటాయి.
స్పెక్ట్రల్ కాపర్ వేరియంట్లో తెలుపుతో పాటు కాపర్, పర్పుల్ రంగుల యాక్సెంట్స్ కనిపిస్తాయి.
ఈ పెయింట్ ట్రీట్మెంట్కు టీవీఎస్ 'స్పెక్ట్రల్ కలర్ టెక్నాలజీ' అని పేరు పెట్టింది.
వివిధ లైటింగ్ పరిస్థితుల్లో రంగులు మారుతున్నట్లుగా కనిపించేలా ఈ టెక్నాలజీని రూపొందించినట్లు కంపెనీ తెలిపింది.
వివరాలు
110cc స్కూటర్లో తొలిసారి..
రెండు కలర్ ఆప్షన్లలోనూ బ్రౌన్ కలర్ సీట్ ఉంటుంది. ప్రీమియం లాంగ్ సీట్కు పిలియన్ ప్రయాణికుడి కోసం ఇంటిగ్రేటెడ్ బ్యాక్రెస్ట్ను స్టాండర్డ్గా అందించారు.
కొత్త స్పెక్ట్రల్ రేంజ్లో డిజైన్ మార్పులతో పాటు సీక్వెన్షియల్ టర్న్ సిగ్నల్ ల్యాంప్స్ను కూడా అందించారు.
110cc స్కూటర్ విభాగంలో ఇది తొలిసారి అందిస్తున్న ఫీచర్ అని టీవీఎస్ పేర్కొంది.
అదే విధంగా కొత్త టాప్-స్పెక్ జూపిటర్ 110లో USB టైప్-C ఛార్జింగ్ పోర్ట్ కూడా ఉంది.
స్కూటర్లో టీవీఎస్ స్మార్ట్ఎక్స్ఆనెక్ట్ కనెక్టెడ్ టెక్నాలజీ కొనసాగుతుంది.
దీని ద్వారా నావిగేషన్ సాయం, కాల్స్, ఎస్ఎంఎస్ అలర్ట్స్ వంటి ఫీచర్లను ఉపయోగించుకోవచ్చు.
వివరాలు
రెండు హెల్మెట్లు పట్టే స్టోరేజ్..
జూపిటర్ 110లోని 33 లీటర్ల అండర్-సీట్ స్టోరేజ్ను కొత్త వేరియంట్లోనూ కొనసాగించారు.
ఇందులో రెండు హెల్మెట్లను ఉంచుకోవచ్చని టీవీఎస్ తెలిపింది.
అలాగే ఫ్యూయల్ ఫిల్లర్ క్యాప్ను స్కూటర్ ముందు భాగంలోని ఏప్రాన్పైనే ఏర్పాటు చేశారు.
కొత్త డ్యూయల్ టోన్ స్పెక్ట్రల్ రేంజ్లో మెకానికల్గా ఎలాంటి మార్పులు చేయలేదు.
ఇది 113.3cc సింగిల్ సిలిండర్, ఫోర్ స్ట్రోక్ ఇంజిన్తో వస్తుంది. ఈ ఇంజిన్ 7.9 bhp గరిష్ఠ పవర్, 9.8 Nm పీక్ టార్క్ను ఉత్పత్తి చేస్తుంది. దీనికి CVT ఆటోమేటిక్ గేర్బాక్స్ను జత చేశారు.
వివరాలు
ఇంజిన్లో మార్పుల్లేవ్..
ఇందులో టీవీఎస్ iGO Assist టెక్నాలజీ కూడా ఉంది. ఇందులో సైలెంట్ స్టార్ట్ సిస్టమ్, స్టార్ట్-స్టాప్ ఫంక్షన్ వంటి ఫీచర్లు ఉన్నాయి.
ముఖ్యంగా నగరాల్లో ట్రాఫిక్ సమయంలో సౌకర్యంతో పాటు మెరుగైన ఇంధన సామర్థ్యాన్ని అందించేందుకు ఇవి ఉపయోగపడతాయని కంపెనీ చెబుతోంది.
కొత్త ఫీచర్లు, డ్యూయల్ టోన్ కలర్ స్కీమ్స్తో వచ్చిన టీవీఎస్ జూపిటర్ 110.. మార్కెట్లో హోండా యాక్టివా 110కు పోటీగా కొనసాగనుంది.