BNPL: ఫైనాన్షియల్ సర్వీసుల్లోకి అమెజాన్, ఫ్లిప్కార్ట్.. బ్యాంకులకు కొత్త పోటీ!
ఈ వార్తాకథనం ఏంటి
ఇ-కామర్స్ దిగ్గజాలు అమెజాన్, ఫ్లిప్‌కార్ట్‌లు భారత ఆర్థిక సేవల రంగంలో తమ స్థాపనను వేగంగా విస్తరించుకుంటున్నాయి. సంప్రదాయ బ్యాంకింగ్ వ్యవస్థకు సవాల్ విసురుతూ, చిన్న వ్యాపారులు, వినియోగదారులను లక్ష్యంగా చేసుకుని కొత్త రుణ ఉత్పత్తులను ప్రవేశపెట్టేందుకు సిద్ధమవుతున్నాయి. ఇటీవల బ్యాంకింగేతర సంస్థ 'ఎక్సియో'ను అమెజాన్ కొనుగోలు చేయడంతో, ఇప్పుడు భారతీయ చిన్న వ్యాపారులకు నేరుగా రుణాలు అందించే దిశగా సంస్థ ప్రణాళికలు వేస్తోందని ఒక అంతర్జాతీయ ఇంగ్లీష్ వార్తాసంస్థ వెల్లడించింది. ఇదే సమయంలో, బై నౌ పే లేటర్‌ (BNPL) ఉత్పత్తులను దేశవ్యాప్తంగా విస్తరించాలని ఫ్లిప్కార్ట్ కూడా భావిస్తున్నట్లు కథనంలో పేర్కొంది.
Details
డిజిటల్ వినియోగదారులకే ప్రధాన టార్గెట్‌
దేశంలో రుణ వృద్ధి విస్తరణకు పెద్ద అవకాశాలు ఉన్నాయని అమెజాన్ ప్రతినిధి ఒకరు వెల్లడించారు. ముఖ్యంగా మహానగరాలకు బయట ఉన్న ప్రాంతాల్లో డిజిటల్ అవగాహన పెరగడంతో, చిన్న వ్యాపారులు మరియు వినియోగదారుల్లో రుణాలపై ఆసక్తి స్పష్టంగా కనిపిస్తోందని తెలిపారు. వీరి అవసరాలకు అనుగుణంగా ప్రత్యేకంగా మర్చెంట్ల కోసం రూపుదిద్దిన రుణ ఉత్పత్తులను అమెజాన్ అందించనున్నట్లు వివరించారు. నగదు నిర్వహణను మెరుగుపర్చుకునేందుకు కూడా ఈ సేవలు ఉపకరిస్తాయని అన్నారు.
Details
ఫ్లిప్కార్ట్ ఫైనాన్స్‌కు ఆర్‌బీఐ ఆమోదం కోసం ఎదురుచూపులు
ఫ్లిప్‌కార్ట్‌కి చెందిన NBFC అయిన ఫ్లిప్కార్ట్ ఫైనాన్స్ ప్రస్తుతం రిజర్వ్ బ్యాంక్ ఆఫ్ ఇండియా తుది అనుమతుల కోసం ఎదురుచూస్తోంది. సంస్థ 3 నుండి 24 నెలలపాటు నో కాస్ట్ EMI లోన్లు, అలాగే మన్నికైన వినియోగదారు వస్తువుల కోసం సంవత్సరానికి 18-26% వడ్డీ రేటుతో రుణాలను అందించే ఆలోచనలో ఉంది. సాధారణంగా సంప్రదాయ బ్యాంకులు వినియోగదారు రుణాలపై 12-22% వడ్డీ వసూలు చేస్తున్న నేపథ్యంలో, ఫ్లిప్కార్ట్ వడ్డీ రేట్లు కొంత ఎక్కువగానే ఉండబోతున్నాయి. వచ్చే ఏడాదిలో ఈ రుణ ఉత్పత్తులను ప్రారంభించే అవకాశం ఉందని సమాచారం. అయితే, ఈ విషయం పై ఫ్లిప్కార్ట్, ఆర్‌బీఐ స్పందించలేదు.
Details
రూ. 1000 తోనే ఎఫ్‌డీలు - అమెజాన్ కొత్త ప్రయోగం
అంతేకాకుండా, కనీసం రూ.1000తో ఫిక్స్‌డ్ డిపాజిట్ సదుపాయాన్ని వినియోగదారులకు అందించేందుకు అమెజాన్ ఆరు స్థానిక రుణదాతలతో ఒప్పందాలు కుదుర్చుకున్న విషయం మరింత ఆసక్తికరంగా నిలుస్తోంది. ఈ భాగస్వామ్యాల ద్వారా చిన్న మొత్తాలతో కూడిన సేవింగ్స్ ఉత్పత్తులను కూడా మార్కెట్లోకి తీసుకురాబోతోంది.