Anthropic IPO: నాస్డాక్లో ఆంత్రోపిక్ షేర్ల జోరు.. తొలిరోజే ఇన్వెస్టర్లకు భారీ లాభాలు
ఈ వార్తాకథనం ఏంటి
ఆర్టిఫిషియల్ ఇంటెలిజెన్స్ (ఏఐ) రంగానికి చెందిన ప్రముఖ సంస్థ ఆంత్రోపిక్ స్టాక్ మార్కెట్లో సరికొత్త రికార్డు సృష్టించింది. చరిత్రలోనే అతిపెద్ద పబ్లిక్ ఆఫరింగ్ (ఐపీఓ)గా నిలిచిన ఈ కంపెనీ షేర్లు మార్కెట్లోకి వచ్చిన తొలిరోజే భారీ లాభాలను అందించాయి. ప్రముఖ ఏఐ చాట్బాట్ క్లాడ్ను రూపొందించిన ఆంత్రోపిక్కు గురువారం జరిగిన ట్రేడింగ్లో ఇన్వెస్టర్ల నుంచి ఊహించని స్థాయిలో స్పందన లభించింది. ఆంత్రోపిక్ తన ఐపీవోలో ఒక్కో షేరు ధరను 83 డాలర్లుగా నిర్ణయించింది. ఈ ఆఫర్ ద్వారా సుమారు 81.3 బిలియన్ డాలర్ల నిధులను సమీకరించింది. దీనికి అదనంగా గూగుల్, మైక్రోసాఫ్ట్, ఎన్విడియా వంటి ప్రముఖ సంస్థల భాగస్వామ్యంతో చేపట్టిన ప్రైవేట్ ప్లేస్మెంట్ ద్వారా మరో 26 బిలియన్ డాలర్లను అందుకుంది.
వివరాలు
ఐపీవో, ప్రైవేట్ ప్లేస్మెంట్ ద్వారా 107 బిలియన్ డాలర్ల సమీకరణ
దీంతో కంపెనీ మొత్తం నిధుల సమీకరణ 107 బిలియన్ డాలర్లకు చేరింది. ఇప్పటివరకు ఈ విషయంలో స్పేస్ఎక్స్ పేరిట ఉన్న రికార్డును ఆంత్రోపిక్ అధిగమించింది.
నాస్డాక్ స్టాక్ ఎక్స్ఛేంజ్లో 'ANT' ట్రేడింగ్ గుర్తుతో ఆంత్రోపిక్ షేర్లు మార్కెట్లోకి ప్రవేశించాయి.
ఐపీవో ధరతో పోలిస్తే 34 శాతం అధికంగా, ఒక్కో షేరు 111.50 డాలర్ల వద్ద ట్రేడింగ్ ప్రారంభమైంది.
ట్రేడింగ్ సమయంలో ఒక దశలో కంపెనీ మార్కెట్ విలువ 2 ట్రిలియన్ డాలర్ల స్థాయిని కూడా దాటింది.
అయితే, చివరికి 17 శాతం లాభంతో ఒక్కో షేరు 97.17 డాలర్ల వద్ద ముగిసింది.
దీంతో ట్రేడింగ్ ముగిసే సమయానికి కంపెనీ మార్కెట్ విలువ సుమారు 1.75 ట్రిలియన్ డాలర్లుగా నమోదైంది.
వివరాలు
టెక్నాలజీ రంగానికి లభించిన అతిపెద్ద విజయాల్లో ఒకటి
ప్రస్తుతం ప్రపంచవ్యాప్తంగా ఏఐ రంగంలో భారీ పెట్టుబడులు, కంపెనీల విలువలపై చర్చలు కొనసాగుతున్నాయి.
ఏఐ బబుల్ ఏర్పడుతోందన్న ఆందోళనలు, ఇటీవల మార్కెట్లలో నెలకొన్న ఒడుదొడుకులు ఉన్నప్పటికీ ఆంత్రోపిక్ ఐపీవోకు ఇన్వెస్టర్ల నుంచి బలమైన మద్దతు లభించింది.
మరోవైపు, కంపెనీ ఆర్థిక పరిస్థితికి సంబంధించి కొన్ని కీలక విషయాలను కూడా వెల్లడించింది.
తమపై 6.2 బిలియన్ డాలర్ల అప్పులు ఉన్నాయని, ఇప్పటికీ లాభాల బాట పట్టలేదని సంస్థ అంగీకరించింది.
ఈ సందర్భంగా ఆంత్రోపిక్ సీఈవో డారియో అమోడీ మాట్లాడుతూ.. ఏఐ భద్రతకు అత్యంత ప్రాధాన్యం ఇస్తూనే విజయవంతమైన వ్యాపార సంస్థను నిర్మించడం సాధ్యమేనని తమ కంపెనీ నిరూపిస్తోందని పేర్కొన్నారు.
ఆంత్రోపిక్ ఐపీవో టెక్నాలజీ రంగానికి లభించిన అతిపెద్ద విజయాల్లో ఒకటని మార్కెట్ విశ్లేషకులు అభిప్రాయపడ్డారు.