ఈపీఎఫ్ఓ వడ్డీ రేట్లు ఖరారు.. 8.15 శాతం ఇచ్చేందుకు కేంద్రం గ్రీన్ సిగ్నల్
ఈ వార్తాకథనం ఏంటి
ఉద్యోగుల భవిష్య నిధి (EPFO) ఖాతాల్లో ఉండే సొమ్ముపై వడ్డీ రేటు ఖారారైంది. ఆర్థిక సంవత్సరం(2022-23)కి సంబంధించి ఈపీఎఫ్ వడ్డీ రేటును కేంద్రం 8.15 శాతంగా నిర్ణయించింది.
గతేడాదితో పోలిస్తే ఈపీఎఫ్ఓ తాజా వడ్డీ రేటు 0.05 శాతం ఎక్కువ. 2022-23 ఆర్థిక సంవత్సరానికి 8.15 శాతం మేర వడ్డీ రేటు ఇవ్వాలని సెంట్రల్ బోర్డ్ ట్రస్టీ (సీబీటీ) నిర్ణయం తీసుకుంది.
ఈ మేరకు సదరు నిర్ణయాన్ని కేంద్ర ప్రభుత్వం ఆమోదించింది. ఈ క్రమంలో ఈపీఎఫ్‌వో సోమవారం అధికారికంగా ఉత్తర్వులు జారీ చేసింది.
మార్చి 28, 2023న డిపాజిట్లపై వడ్డీ రేటును రిటైర్‌మెంట్ ఫండ్ బాడీ ఈపీఎఫ్ఓ(EPFO) 8.15 శాతనికి పెంచింది.
DETAILS
వడ్డీ మొత్తాన్ని సభ్యుల ఖాతాల్లో జమ చేయనున్న ఈపీఎఫ్ఓ
ఈ నిర్ణయాన్ని సెంట్రల్ బోర్డ్ ట్రస్టీ కేంద్ర ఆర్థిక శాఖకు పంపించింది. అక్కడ ఆమోదం లభించడంతో సోమవారం కీలక ప్రకటనను వెలువరించింది.
ఈ నేపథ్యంలో ఆరుకోట్ల మంది ఈపీఎఫ్ ఖాతాదారులకు ప్రయోజనం చేకూరనుంది. త్వరలోనే ఈపీఎఫ్ఓ 2022-23 వడ్డీ మొత్తాన్ని సభ్యుల ఖాతాల్లో జమ చేయనున్నట్లు కేంద్ర ఆర్థిక శాఖ వెల్లడించింది.
ఈ మేరకు 8.15 శాతం చొప్పున వడ్డీని చందాదారుల ఖాతాల్లో జమ చేసే ప్రక్రియను ఫీల్డ్ కార్యాలయాలు ప్రారంభించనున్నాయి.
ఈపీఎఫ్ఓ 2021-22 వడ్డీ రేటును 8.5 శాతం నుంచి 4 దశాబ్దాల కనిష్టం 8.10 శాతానికి మార్చి 2022లో తగ్గించింది. 1977-78లో వడ్డీ రేటు 8 శాతంగా ఉండటం గమనార్హం.