Cooking oil: పండగల ముందు గుడ్న్యూస్.. వంట నూనె ధరలు తగ్గే అవకాశం
ఈ వార్తాకథనం ఏంటి
పండగ సీజన్ ప్రారంభానికి ముందే కేంద్ర ప్రభుత్వం కీలక నిర్ణయం తీసుకుంది. వంట నూనెల ధరలు పెరగకుండా చర్యలు చేపట్టింది. క్రూడ్ పామాయిల్, సోయాబీన్ ఆయిల్, సన్ఫ్లవర్ ఆయిల్తో పాటు రిఫైన్డ్ ఎడిబుల్ ఆయిల్స్పై దిగుమతి సుంకాలను తగ్గించింది. సవరించిన సుంకాలు ఈ అర్ధరాత్రి నుంచే అమల్లోకి రానున్నాయి. క్రూడ్ సోయాబీన్, క్రూడ్ పామాయిల్పై బేసిక్ కస్టమ్స్ డ్యూటీని కేంద్రం 10 శాతం నుంచి 5 శాతానికి తగ్గించింది. మరోవైపు క్రూడ్ సన్ఫ్లవర్ ఆయిల్పై ఉన్న 10 శాతం దిగుమతి సుంకాన్ని పూర్తిగా ఎత్తివేసింది.
వివరాలు
రిఫైన్డ్ ఆయిల్స్పైనా భారీగా కోత
రిఫైన్డ్ సోయాబీన్, పామ్ ఆయిల్పై దిగుమతి సుంకాన్ని 32.5 శాతం నుంచి 27.5 శాతానికి తగ్గించారు.
అలాగే రిఫైన్డ్ సన్ఫ్లవర్ ఆయిల్పై సుంకాన్ని 32.5 శాతం నుంచి 22.5 శాతానికి కుదించారు.
దిగుమతి సుంకాలు తగ్గడంతో విదేశాల నుంచి వంట నూనెలను కొనుగోలు చేసి భారత్కు తీసుకురావడానికి అయ్యే వ్యయం తగ్గనుంది.
ఈ తగ్గిన వ్యయ ప్రయోజనాన్ని కంపెనీలు, దిగుమతిదారులు, వ్యాపారులు వినియోగదారులకు బదిలీ చేస్తే రిటైల్ మార్కెట్లో వంట నూనె ధరలు తగ్గే అవకాశం ఉంటుంది.
అయితే అంతర్జాతీయ ధరలు, రూపాయి మారకం విలువ, ఇతర మార్కెట్ పరిస్థితులు కూడా తుది ధరలపై ప్రభావం చూపుతాయి.
వివరాలు
పండగల ముందు ఎందుకంటే..
దేశీయ అవసరాలను తీర్చేందుకు భారత్ వంట నూనెలను భారీ స్థాయిలో దిగుమతి చేసుకుంటోంది.
అందువల్ల అంతర్జాతీయ మార్కెట్లో నూనెల ధరలతో పాటు దిగుమతి సుంకాల్లో మార్పులు దేశీయ మార్కెట్పై ప్రభావం చూపుతాయి.
పండగల సీజన్లో వంట నూనెలకు డిమాండ్ సాధారణంగా పెరిగే నేపథ్యంలో ధరల ఒత్తిడిని తగ్గించే ఉద్దేశంతో కేంద్రం ఈ నిర్ణయం తీసుకుంది.