Cult.fit IPO: ఈ నెలలోనే Cult.fit ఐపీఓ.. రూ.4,000 కోట్ల సమీకరణకు సిద్ధం!

వ్రాసిన వారు Sirish Praharaju

Jun 18, 2026

12:13 pm

ఈ వార్తాకథనం ఏంటి

భారత్‌లో ప్రముఖ ఫిట్‌నెస్ సేవల సంస్థ కల్ట్.ఫిట్ (Cult.fit) ఈ నెలలోనే సుమారు రూ.3,500 నుంచి రూ.4,000 కోట్ల విలువైన ఐపీఓ (ఇనిషియల్ పబ్లిక్ ఆఫరింగ్) కోసం ముసాయిదా పత్రాలను దాఖలు చేయడానికి సిద్ధమవుతోంది. ఈ ఐపీఓలో కొత్త షేర్ల జారీతో పాటు ప్రస్తుతం ఉన్న పెట్టుబడిదారులు తమ వాటాలను విక్రయించే ఆఫర్ ఫర్ సేల్ (OFS) కూడా ఉండనుంది. 2016లో ప్రారంభమైన కల్ట్.ఫిట్ దేశవ్యాప్తంగా జిమ్‌లు, గ్రూప్ వర్కౌట్లు, అవుట్‌డోర్ ఫిట్‌నెస్ కార్యక్రమాలు, ఇంటి వద్ద వ్యాయామ సేవలు, ఫిట్‌నెస్ దుస్తులు, వ్యాయామ పరికరాల విక్రయం వంటి పలు విభాగాల్లో సేవలు అందిస్తోంది. విభిన్న సేవలతో దేశంలో ప్రముఖ ఫిట్‌నెస్ బ్రాండ్‌గా ఎదిగింది.

వివరాలు

గత ఏడాదితో పోలిస్తే దాదాపు 40 శాతం వృద్ధి

సంస్థ ఆర్థిక పనితీరు కూడా బలంగా కొనసాగుతోంది. కంపెనీ ఆదాయం రూ.1,700 కోట్ల మార్క్‌ను దాటగా, గత ఏడాదితో పోలిస్తే దాదాపు 40 శాతం వృద్ధిని నమోదు చేసింది. అలాగే 2025-26 ఆర్థిక సంవత్సరం చివరి త్రైమాసికంలో కంపెనీ ఈబీఐటిడీఏ (EBITDA) స్థాయిలో లాభదాయకతను సాధించడం విశేషం. రెండు అంకెల వృద్ధితో కంపెనీ ఆర్థిక పరిస్థితి మరింత బలోపేతమైందని తెలుస్తోంది. కల్ట్.ఫిట్ వ్యాపారంలో ఆదాయ వనరులు కూడా సమతుల్యంగా ఉన్నాయి. మొత్తం ఆదాయంలో సుమారు 70 శాతం ఫిట్‌నెస్ సేవల ద్వారా, మిగిలిన 30 శాతం ఫిట్‌నెస్ ఉత్పత్తుల విక్రయాల ద్వారా వస్తోంది. దీంతో కంపెనీకి స్థిరమైన ఆదాయంతో పాటు వ్యాపార విస్తరణకు అవకాశాలు పెరుగుతున్నాయి.

వివరాలు

75కి పైగా నగరాల్లో 10 లక్షల మంది paid subscribers

2025-26 ఆర్థిక సంవత్సరంలో కంపెనీకి దేశవ్యాప్తంగా 75కి పైగా నగరాల్లో 10 లక్షల మంది paid subscribers ఉన్నట్లు సమాచారం. ఇది సంస్థ సేవలకు ఉన్న ఆదరణను సూచిస్తోంది.ఐపీఓకు ముందు కంపెనీ తన బోర్డును మరింత బలోపేతం చేసే చర్యలు చేపట్టింది. కల్పనా మోర్పారియా,అరుణ్ ఎం.కుమార్,ఇందు భూషణ్,ప్రగ్యా మిశ్రాలను స్వతంత్ర డైరెక్టర్లుగా నియమించింది. బాలీవుడ్ నటుడు హృతిక్ రోషన్ సంస్థ బ్రాండ్ అంబాసిడర్‌గా కొనసాగుతున్నారు. ఈ భారీ ఐపీఓ ప్రక్రియకు యాక్సిస్ క్యాపిటల్,గోల్డ్‌మన్ సాక్స్,జెఫరీస్, జేఎం ఫైనాన్షియల్, మోర్గాన్ స్టాన్లీ వంటి ప్రముఖ ఆర్థిక సంస్థలు సలహాదారులుగా వ్యవహరిస్తున్నాయి. కల్ట్.ఫిట్ ఐపీఓ ఫిట్‌నెస్ రంగంలోనే కాకుండా భారతీయ స్టాక్ మార్కెట్‌లో కూడా ఆసక్తికర పరిణామంగా మారే అవకాశం ఉందని మార్కెట్ వర్గాలు భావిస్తున్నాయి.