ITC, Godfrey Phillips shares: గోల్డ్‌ఫ్లేక్‌ ధర మళ్లీ పెంపు.. 2% వరకు పెరిగిన ఐటీసీ, గాడ్‌ఫ్రే షేర్లు లాభాలు

వ్రాసిన వారు Sirish Praharaju

Sep 23, 2026

03:52 pm

ఈ వార్తాకథనం ఏంటి

ప్రముఖ సిగరెట్ బ్రాండ్ల ధరలు మరోసారి పెరగడంతో ఐటీసీ (ITC), గాడ్‌ఫ్రే ఫిలిప్స్ (Godfrey Phillips) కంపెనీల షేర్లు బుధవారం లాభాల్లో ట్రేడయ్యాయి. సెప్టెంబర్ 23న ఈ రెండు కంపెనీల షేర్లు 2 శాతం వరకు పెరిగాయి. ఐటీసీకి చెందిన గోల్డ్ ఫ్లేక్ ప్రీమియం సిగరెట్ల ధరను ఈ నెలలో మరోసారి పెంచినట్లు వచ్చిన నివేదికల నేపథ్యంలో ఈ పరిణామం చోటుచేసుకుంది. ఎన్‌డీటీవీ ప్రాఫిట్ పేర్కొన్న డీలర్ల వివరాల ప్రకారం.. గోల్డ్ ఫ్లేక్ ప్రీమియం 10 సిగరెట్ల ప్యాక్ ధరను రూ.125 నుంచి రూ.135కు పెంచారు. అంటే ఒక్కసారిగా రూ.10 పెరగడంతో ధర సుమారు 8 శాతం పెరిగింది. ఈ ఏడాదిలో ఈ బ్రాండ్ ధర పెరగడం ఇది రెండోసారి కావడం గమనార్హం.

వివరాలు

గోల్డ్‌ఫ్లేక్‌ ధర పెంపుతో షేర్లకు జోష్

జూన్‌లో గోల్డ్ ఫ్లేక్ ప్రీమియం ధరను 8.7 శాతం పెంచారు. అప్పుడు 10 సిగరెట్ల ప్యాక్ ధర రూ.115 నుంచి రూ.125కు చేరింది.

తాజాగా మరో రూ.10 పెంచడంతో 2026లో ఇప్పటివరకు ఈ బ్రాండ్ ధర మొత్తం 17.4 శాతం పెరిగింది.

ఏడాది ప్రారంభంలో రూ.115గా ఉన్న 10 సిగరెట్ల ప్యాక్ ధర ఇప్పుడు రూ.135కు చేరింది.

సెప్టెంబర్ 23 మధ్యాహ్నం 1.40 గంటల సమయంలో గాడ్‌ఫ్రే ఫిలిప్స్ షేరు 2 శాతం లాభంతో రూ.2,010 వద్ద ట్రేడైంది.

ఐటీసీ షేరు 1.2 శాతం పెరిగి రూ.269.05కు చేరింది. మరో సిగరెట్ తయారీ సంస్థ వీఎస్టీ ఇండస్ట్రీస్ షేరు కూడా స్వల్పంగా లాభపడి రూ.207.05 వద్ద కొనసాగింది.

వివరాలు

పెరిగిన పన్నుల ప్రభావం.. సిగరెట్‌ ధరలకు రెక్కలు

ఈ ఏడాది ప్రారంభంలో పెరిగిన పన్నుల ప్రభావాన్ని భర్తీ చేసుకునేందుకు సిగరెట్ తయారీ సంస్థలు ధరలను పెంచుతున్నాయి.

2026 ఫిబ్రవరి 1 నుంచి సిగరెట్లపై 40శాతం జీఎస్టీ రేటు అమల్లోకి వచ్చింది.

దీనికి అదనంగా కొత్త ఎక్సైజ్ డ్యూటీ విధానాన్ని తీసుకొచ్చారు. సిగరెట్ పొడవు,ఫిల్టర్ ఉన్నదా లేదా అనే అంశాలను బట్టి అదనపు పన్ను మారుతుంది.

ఈ ఏడాది ఐటీసీ పలు సిగరెట్ బ్రాండ్ల ధరలను పెంచింది.సెప్టెంబర్ ప్రారంభంలో డీలర్ల వివరాల ప్రకారం.. క్లాసిక్ కనెక్ట్ 20సిగరెట్ల ప్యాక్ ధర రూ.390 నుంచి రూ.428కు పెరిగింది.

దీంతో ధర 9.74శాతం పెరిగింది.అలాగే గోల్డ్ ఫ్లేక్ సూపర్ స్టార్ 10సిగరెట్ల ప్యాక్ ధర రూ.79 నుంచి రూ.89కు పెంచారు. ఇది 12.66 శాతం పెరుగుదల.

వివరాలు

ఐటీసీ సిగరెట్‌ బ్రాండ్ల ధరలు వరుసగా పెంపు

అంతకుముందు ఫిబ్రవరిలోనూ ఐటీసీ క్లాసిక్ కనెక్ట్ ధరను రూ.300 నుంచి రూ.360కు పెంచింది.

ఆ తర్వాత దానిని రూ.390కు చేర్చింది. ఇదే సమయంలో గోల్డ్ ఫ్లేక్ సూపర్ స్టార్ 10 సిగరెట్ల ప్యాక్ ధర రూ.59 నుంచి రూ.70కు పెరిగింది.

దీంతో పన్నుల పెంపు ప్రభావాన్ని వినియోగదారులపై ధరల రూపంలోకి మార్చే ప్రక్రియను సిగరెట్ కంపెనీలు కొనసాగిస్తున్నాయి.