GST Collections: మేలో జీఎస్టీ వసూళ్లు రూ.1.94 లక్షల కోట్లు.. 3.2% వృద్ధి నమోదు
ఈ వార్తాకథనం ఏంటి
దేశంలో వస్తు, సేవల పన్ను (జీఎస్టీ) వసూళ్లు మే నెలలో స్వల్ప వృద్ధిని నమోదు చేశాయి. ఈ మేరకు కేంద్ర ఆర్థిక శాఖ సోమవారం విడుదల చేసిన గణాంకాల ప్రకారం, మే నెలలో మొత్తం జీఎస్టీ రాబడి రూ.1.94 లక్షల కోట్లకు చేరుకుంది. గత ఏడాది ఇదే కాలంతో పోల్చితే ఇది 3.2 శాతం ఎక్కువగా ఉంది. రిఫండ్లను మినహాయించిన తర్వాత మే నెలకు నికర జీఎస్టీ వసూళ్లు రూ.1,66,904 కోట్లుగా నమోదయ్యాయి. మరోవైపు మొత్తం రీఫండ్ల విలువ 2.6 శాతం పెరిగి రూ.27,281 కోట్లకు చేరుకుంది. ఇందులో దేశీయ రీఫండ్లు 4.3 శాతం తగ్గగా, ఎగుమతులకు సంబంధించిన రీఫండ్లు మాత్రం 16.6 శాతం మేర పెరగడం గమనార్హం.
వివరాలు
గణనీయంగా పెరిగిన దిగుమతులపై వసూలైన జీఎస్టీ ఆదాయం
స్థూల దేశీయ జీఎస్టీ ఆదాయం గత ఏడాదితో పోల్చితే 2.6 శాతం తగ్గి రూ.1.34 లక్షల కోట్లుగా నమోదైంది. అయితే దిగుమతులపై వసూలైన జీఎస్టీ ఆదాయం గణనీయంగా పెరిగింది. ఈ విభాగంలో వసూళ్లు 19.1 శాతం వృద్ధితో రూ.59,654 కోట్లకు చేరుకున్నాయి. ఇక ప్రస్తుత ఆర్థిక సంవత్సరంలో తొలి రెండు నెలలైన ఏప్రిల్, మే కాలాన్ని కలిపి చూసినప్పుడు జీఎస్టీ వసూళ్లు 6.2 శాతం పెరిగాయి. ఈ రెండు నెలల్లో కలిపి మొత్తం జీఎస్టీ ఆదాయం రూ.4.37 లక్షల కోట్లకు చేరుకోవడం విశేషం. దీంతో ప్రభుత్వానికి పన్ను ఆదాయ పరంగా సానుకూల సంకేతాలు కనిపిస్తున్నాయి.